ರಾಮದೇವರ ಹಳ್ಳದಲ್ಲಿ ಹುಲಿಯ ಶವ ಪತ್ತೆ

ಕನ್ನಡಪ್ರಭ ವಾರ್ತೆ ಹಾಸನ

ಕೆಲ ದಿನಗಳ ಹಿಂದೆ ಮೈಸೂರು ಜಿಲ್ಲೆಯಲ್ಲಿ ಸೆರೆ ಹಿಡಿದಿದ್ದ ಹುಲಿಗೆ ರೇಡಿಯೋ ಕಾಲರ್‌ ಅಳವಡಿಸಿ ಚಿಕ್ಕಮಗಳೂರು ಜಿಲ್ಲೆಯ ಭದ್ರ ಅಭಯಾರಣ್ಯಕ್ಕೆ ಬಿಡಲಾಗಿತ್ತು. ಆದರೆ ಇದೀಗ ಅದೇ ಹುಲಿ ಜಿಲ್ಲೆಯ ಹಳೇಬೀಡು ವ್ಯಾಪ್ತಿಯಲ್ಲಿರುವ ರಾಮದೇವರಹಳ್ಳದ ಅರಣ್ಯದಲ್ಲಿರುವ ಹಳ್ಳದಲ್ಲಿ ಸಾವನ್ನಪ್ಪಿದೆ.

ಹಾಸನ ಜಿಲ್ಲೆಯಲ್ಲಿ ಹುಲಿಯ ಒಂದೂ ಸಂತಾನವಿಲ್ಲ. ಆದರೆ, ಇದೀಗ ರಾಮದೇವರಹಳ್ಳದಲ್ಲಿ ಹುಲಿ ದೇಹ ಪತ್ತೆಯಾಗಿದೆ. ತನ್ನ ಮೂಲ ಕಾಡಿನತ್ತ ಹೊರಟ ಹುಲಿ ಮಾರ್ಗಮಧ್ಯೆ ಸಾವನ್ನಪ್ಪಿದೆ.

ರಾಮದೇವರ ಹಳ್ಳದ ಮೀಸಲು ಅರಣ್ಯದಲ್ಲಿ ಗಂಧದ ಮರಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ. ಹಾಗಾಗಿಯೇ ಈ ಭಾಗದಲ್ಲಿ ಗಂಧದ ಮರಗಳ್ಳರ ಹಾವಳಿ ಕೂಡ ಹೆಚ್ಚಿದೆ. ಈ ಹಿಂದೆಯೂ ಹಲವಾರು ಬಾರಿ ಇಲ್ಲಿ ಗಂಧದ ಮರಗಳನ್ನು ಕಡಿದ ಪ್ರಕರಣಗಳು ದಾಖಲಾಗಿವೆ. ಒಮ್ಮೆ ಮರಗಳ್ಳರು ಹಾಗೂ ಅರಣ್ಯ ಸಿಬ್ಬಂದಿ ನಡುವೆ ಗುಂಡಿನ ಚಕಮಕಿ ನಡೆದು ಮರಗಳ್ಳನೊಬ್ಬ ಸಾವನ್ನಪ್ಪಿದ್ದ. ಜತೆಗೆ ಈ ಭಾಗದಲ್ಲಿ ಕಾಡು ಪ್ರಾಣಿಗಳ ಬೇಟೆ ಕೂಡ ಇದ್ದು, ಬೇಟೆಗಾರರ ಇಲ್ಲವೇ ಮರಗಳ್ಳರ ಗುಂಡಿಗೆ ಹುಲಿ ಬಲಿಯಾಗಿರುವ ಸಾಧ್ಯತೆಗಳನ್ನೂ ತಳ್ಳಿಹಾಕುವಂತಿಲ್ಲ.