ಶಾಂಕರ ತತ್ವ ಪ್ರಸಾರದಡಿ ರಾಮಾಯಣ ಸ್ಪರ್ಧೆಗೆ ನಿರ್ಧಾರ: ಸದಾಶಿವ ಭಟ್

ಶಾಂಕರ ತತ್ವ ಪ್ರಸಾರದಡಿ ವಲಯ ಮಟ್ಟದ ಭಜನಾ ಸ್ಪರ್ಧೆ ಉದ್ಘಾಟನೆ

ಶಾಂಕರ ತತ್ವ ಪ್ರಸಾರ ಅಭಿಯಾನದಡಿ ಮುಂದಿನ ದಿನಗಳಲ್ಲಿ ರಾಮಾಯಣ ಸ್ಪರ್ಧೆಗಳನ್ನು ಶೃಂಗೇರಿಯ ಶಾರದಾ ಪೀಠದ ನಿರ್ದೇಶನದಂತೆ ಎಲ್ಲಾ ಶಾಲೆಗಳಲ್ಲಿ ಆಯೋಜಿಸಲು ರಾಜ್ಯ ಸಂಚಾಲರು ನಿರ್ಧರಿಸಿದ್ದು ಮಕ್ಕಳನ್ನು ಇದರಲ್ಲಿ ತೊಡಗಿಸಿಕೊಳ್ಳಬೇಕು ಎಂದು ಶಾಂಕರತತ್ತ್ವ ಪ್ರಸಾರ ಅಭಿಯಾನದ ಜಿಲ್ಲಾ ಸಂಚಾಲಕ ಸದಾಶಿವ ಭಟ್ ಹೇಳಿದರು. ಭಾನುವಾರ ಪಟ್ಟಣದ ಅಗ್ರಹಾರದ ಬ್ರಾಹ್ಮಣ ಮಹಾಸಭೆಯ ಅನ್ನಪೂರ್ಣಮ್ಮ ರಂಗನಾಥ ಸಭಾ ಭವನದಲ್ಲಿ ಶಂಕರಾಚಾರ್ಯ ಮಹಾಸಂಸ್ಥಾನ ದಕ್ಷಿಣಾಮ್ನಾಯ ಶಾರದ ಪೀಠಂ ಶೃಂಗೇರಿಯ ಶಾಂಕರತತ್ತ್ವ ಪ್ರಸಾರ ಅಭಿಯಾನ ದಡಿ ಭಜನಾ ಮಂಡಳಿ ಸದಸ್ಯರಿಗೆ ಆಯೋಜಿಸಿದ್ದ ವಲಯಮಟ್ಟದ ಭಜನಾ ಸ್ಪರ್ಧೆಯಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದರು. ಶಾಂಕರ ತತ್ತ್ವ ಪ್ರಸಾರ ಅಭಿಯಾನದಡಿ ಈಹಿಂದೆ ಉಪನ್ಯಾಸ ಹಮ್ಮಿಕೊಳ್ಳಲಾಗಿತ್ತು. ಪ್ರಸ್ತುತ ಮಲೆನಾಡು ವಿಭಾಗದ ಭಜನಾ ಮಂಡಳಿ ಸದಸ್ಯರಿಗೆ ಸ್ಪರ್ಧೆಯನ್ನು 4 ವಲಯಗಳಲ್ಲಿ ಆಯೋಜಿಸಿದ್ದು ಮೊದಲ ವಲಯಮಟ್ಟ ಕಾರ್ಯಕ್ರಮ ಬಸರಿಕಟ್ಟೆಯ ಸದ್ಗುರು ಪ್ರೌಢಶಾಲೆಯಲ್ಲಿ ನಡೆಸಲಾಗಿದೆ. ಎರಡನೇ ಕಾರ್ಯಕ್ರಮ ಇಂದು ನರಸಿಂಹರಾಜಪುರದಲ್ಲಿ ನಡೆಯುತ್ತಿದೆ. ಕೊಪ್ಪದಲ್ಲಿ ಆ.22 ರಂದು, ಶೃಂಗೇರಿಯಲ್ಲಿ ಆ.23 ರಂದು ಆಯೋಜಿಸಲಾಗಿದೆ. ನಂತರ ಬಯಲು ಸೀಮೆ ವಿಭಾಗದಲ್ಲಿ ಸ್ಪರ್ಧೆ ನಡೆದು ಜಿಲ್ಲಾ ಮಟ್ಟದ ಕಾರ್ಯಕ್ರಮ ಶೃಂಗೇರಿ ಮಠದಲ್ಲಿ ನಡೆಯಲಿದೆ. ಭಜನ ಮಂಡಳಿಯಲ್ಲಿ ಮಹಿಳಾ ತಂಡಗಳಂತೆ 4 ಪುರುಷರ ತಂಡಗಳನ್ನು ಸಹ ರಚಿಸಲಾಗಿದೆ. ಮಕ್ಕಳ ತಂಡಗಳು ಸಹ ರಚನೆ ಮಾಡಲಾಗುತ್ತಿದೆ ಎಂದರು.

ತಾಲೂಕು ಬ್ರಾಹ್ಮಣ ಮಹಾ ಸಭಾದ ಖಜಾಂಚಿ ಎ.ಎಸ್.ಅಭಿಷೇಕ್ ಕಾರ್ಯಕ್ರಮ ಉದ್ಘಾಟಿಸಿದರು. ಶಂಕರ ತತ್ವ ಪ್ರಸಾರ ಅಭಿಯಾನದ ಕೊಪ್ಪ ತಾಲೂಕು ಸಂಚಾಲಕ ರವಿಂದ್ರ ಪಟವರ್ಧನ್, ಕಳಸ ಸಂಚಾಲಕ ನಾಗಭೂಷಣ್, ಶೃಂಗೇರಿ ಸಂಚಾಲಕ ಶ್ರೀಧರ್, ಶಿಕ್ಷಕಿ ವಾಗ್ದೇವಿ, ವಾಸಂತಿ ರಾಮಕೃಷ್ಣ,ಭಾರತಿ ಅರವಿಂದ ಆಚಾರ್ಯ ಇದ್ದರು.