ಪೈಗಂಬರ್‌ ಕುರಿತು ಅವಹೇಳನಕಾರಿ ಹೇಳಿಕೆ: ಪ್ರತಿಭಟನೆ

ಕನ್ನಡಪ್ರಭ ವಾರ್ತೆ ಚಿಂಚೋಳಿ

ಪಟ್ಟಣದ ಜಮಾತೆ-ಉಲ್ಮಮೇ-ಇ-ಹಿಂದ್‌ ಮತ್ತು ತಾಲೂಕು ಮುಸ್ಲಿಂ ಅಭಿವೃದ್ಧಿ ಸಮಿತಿ ಸಂಘಟನೆಗಳು ಶನಿವಾರ ಪಟ್ಟಣದ ಪಟೇಲ್ ಕಾಲೋನಿ ದಾರೂಲ್ ಉಲುಮ ಹುಸೇನಿ ಮದರಸಾ ಚಂದಾಪೂರದಿಂದ ತಾಲೂಕು ಆಡಳಿತವರೆಗೆ ನಾರೇ ತಕದೀರ ಅಲ್ಲಾಹು ಅಕಬರ ಎಂಬ ಘೋಷಣೆ ಕೂಗುತ್ತಾ ಸ್ವಾಮಿ ನರಸಿಂಹಾನಂದ ಸರಸ್ವತಿಯವರನ್ನು ಬಂಧಿಸಿ ಜೈಲಿಗೆ ಕಳಿಸಬೇಕೆಂದು ಆಕ್ರೋಶ ವ್ಯಕ್ತಪಡಿಸಿದರು.

ಮಾತನಾಡಿ, ದೇಶದಲ್ಲಿ ಎಲ್ಲ ಜಾತಿ ಜನಾಂಗದವರನ್ನು ಒಂದಾಗಿ ಬಾಳುವ ಸಹೋದರತ್ವ ಭಾವನೆಯಿಂದ ಇರುವ ಸಮಾಜದಲ್ಲಿ ಒಡಕನ್ನುಂಟು ಮಾಡುವ ಡೊಂಗಿ ಸ್ವಾಮಿಯನ್ನು ಕೂಡಲೇ ಬಂಧಿಸಬೇಕೆಂದು ಹೇಳಿದರು.

ಮಹ್ಮದ ಹಾಫೀಜ ಅಬ್ದುಲ್ಲ ಹಮೀದ,ಪುರಸಭೆ ಅಧ್ಯಕ್ಷ ಆನಂದ ಟೈಗರ, ಹಣಮಂತ ಪೂಜಾರಿ, ಲಕ್ಷ್ಮಣ ಆವಂಟಿ, ಪುರಸಭೆ ಸದಸ್ಯ ಅನವರ ಖತೀಬ ಸ್ವಾಮೀಜಿಯ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿದರು.

ಪುರಸಭೆ ಸದಸ್ಯ ಅನವರ ಖತೀಬಸಾವ ಮನವಿ ಪತ್ರವನ್ನು ವಿವರಿಸಿ ತಹಸೀಲ್ದಾರ್‌ ಸುಬ್ಬಣ್ಣ ಜಮಖಂಡಿ ಅವರಿಗೆ ಸಲ್ಲಿಸಿದರು. ಮನವಿ ಸ್ವೀಕರಿಸಿದ ತಹಸೀಲ್ದಾರರು ಸ್ವಾಮೀಜಿಗಳನ್ನು ಈಗಾಗಲೇ ಬಂಧಿಸಲಾಗಿದೆ. ಅಲ್ಲದೇ ಅವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಎಂಬ ಮಾಹಿತಿ ನೀಡಿದ ನಂತರ ಪ್ರತಿಭಟನೆಯನ್ನು ಹಿಂದಕ್ಕೆ ಪಡೆದುಕೊಳ್ಳಲಾಯಿತು. ಚಿಂಚೋಳಿ ಪೋಲಿಸರು ವ್ಯಾಪಕ ಬಿಗಿಭದ್ರತೆಯನ್ನು ಮಾಡಿದ್ದರು.