ರಾಮಲಲ್ಲಾ ಸ್ಮರಣೆ, ಅಯೋಧ್ಯೆಗೆ ಬೈಕ್ ರ್‍ಯಾಲಿ

- ಭಕ್ತರಿಂದ ಪ್ರಭು ಶ್ರೀರಾಮನಿಗೆ ವಿಭಿನ್ನ ಸೇವೆ ಸಮರ್ಪಣೆ । ಬುಟೆಲ್‌ನಲ್ಲಿ ದರ್ಶನ್‌ ಪವಾರ್‌ ರಾಮ ಜನ್ಮಭೂಮಿಗೆ

ನಗರದ ಬಿಜೆಪಿ ಹಿರಿಯ ಮುಖಂಡ, ಸಂಘ ಪರಿವಾರ ಮೂಲದ ಎಂ.ಪಿ.ಕೃಷ್ಣಮೂರ್ತಿ ಪವಾರ್ ಪುತ್ರ, ರಾಮಭಕ್ತನಾದ ದರ್ಶನ್ ಕೆ.ಪವಾರ್‌ ನಗರ ದೇವತೆ ಶ್ರೀ ದುರ್ಗಾಂಬಿಕಾ ದೇವಿ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸುವ ಮೂಲಕ ದಾವಣಗೆರೆಯಿಂದ ಹುಬ್ಬಳ್ಳಿ ಮಾರ್ಗವಾಗಿ ಅಯೋಧ್ಯೆಗೆ ರಾಯಲ್ ಎನ್‌ಫೀಲ್ಡ್‌ ಬೈಕ್ ನಲ್ಲಿ ಪ್ರವಾಸ ಕೈಗೊಂಡಿದ್ದಾರೆ.

ಮುಖಂಡರಾದ ಜಿ.ಕೆ.ಶಿವಶಂಕರ, ಸಂತೋಷ ಪೈಲ್ವಾನ್, ಹರೀಶ ಪವಾರ್‌, ತಿಪ್ಪೇಶ ರಾವ್‌ ಚೌಹಾಣ್, ಬಿ.ನೀಲಪ್ಪ, ವಿಹಿಂಪ ರವೀಂದ್ರ ಜಿ, ಪ್ರವೀಣ ಸೇರಿದಂತೆ ಅನೇಕರು ಅಯೋಧ್ಯೆಗೆ ಬುಲೆಟ್‌ನಲ್ಲಿ ಪ್ರವಾಸ ಕೈಗೊಂಡ ದರ್ಶನ್ ಕೃಷ್ಣಮೂರ್ತಿ ಪವಾರ್‌ಗೆ ಶುಭಾರೈಸಿ, ಬೀಳ್ಕೊಟ್ಟರು. ಇದೇ ವೇಳೆ 90ರ ದಶಕದಲ್ಲಿ ಶ್ರೀರಾಮ ಮಂದಿರ ನಿರ್ಮಾಣಕ್ಕಾಗಿ ಶ್ರೀ ರಾಮ ಜ್ಯೋತಿ ರಥಯಾತ್ರೆಯಲ್ಲಿ ಪಾಲ್ಗೊಂಡಿದ್ದ. ನಂತರ ಕೋಮು ಗಲಭೆಯಲ್ಲಿ ಹುತಾತ್ಮರಾದ ಚಂದ್ರಶೇಖರ ಸಿಂಧೆ ಕುಟುಂಬಕ್ಕೆ 10 ಸಾವಿರ ರು., ಆಗಿನ ಗೋಲಿಬಾರ್‌ನಲ್ಲಿ ನೋವುಂಡಿದ್ದ ಶೈಲೇಶ್‌ ಕುಮಾರ್ ರಿಗೆ 5 ಸಾವಿರ ರು., ಸೆರೆಮನೆ ವಾಸ ಅನುಭವಿಸಿದ್ದ ಮಟ್ಟಿಕಲ್ಲು ವೀರಭದ್ರ ಸ್ವಾಮಿಗೆ 5 ಸಾವಿರ ರು. ನಗದು ನೀಡಿ, ಗೌರವ ಸಮರ್ಪಿಸಲಾಯಿತು.

ಶ್ರೀರಾಮ ಜಯ ಜಯರಾಮ ತಾರಕ ಮಂತ್ರ ಜಪ

ರಾಮ ಮಂದಿರ ಉದ್ಘಾಟನೆ ದಿನಾಂಕ ನಿಗದಿಯಾದ ದಿನದಿಂದ 60ಕ್ಕೂ ಹೆಚ್ಚು ಜನರಿಗೆ ಕೋಟಿ ರಾಮನಾಮ ಜಪ ಆರಂಭಿಸಲು ಗುರುರಾದ ಸೇವಾ ಸಂಘ ದಿಂದ ಸೂಚಿಸಲಾಗಿತ್ತು. ಅದರಂತೆ ಬುಧವಾರ ಒಂದು ಲಕ್ಷ ರಾಮ ನಾಮ ಜಪದ ಸಮರ್ಪಣಾ ಹೋಮವನ್ನು ಶ್ರೀ ರಾಘವೇಂದ್ರ ಸ್ವಾಮಿ ಮಠದಲ್ಲಿ ಶ್ರದ್ಧಾಭಕ್ತಿಯಿಂದ ನೆರವೇರಿಸ ಲಾಯಿತು. ತಾರಕ ಮಂತ್ರದ ಜಪ ಹಾಗೂ ಜಪದ ಸಮರ್ಪಣಾ ಹೋಮವು ಕಡೂರು ಪ್ರಾಣೇಶಾ ಚಾರ್‌, ಕಂಪ್ಲಿ ಗುರುರಾಜಾಚಾರ್‌, ಆನಂದ ತೀರ್ಥಾಚಾರ್‌, ವಾಚಸ್ಪತಿ ಆಚಾರ್‌, ಬ್ರಾಹ್ಮಣ ಸಂಘದ ಅಧ್ಯಕ್ಷ ಡಾ.ಶಶಿಕಾಂತ್‌, ಗೌರವಾಧ್ಯಕ್ಷ ಸತ್ಯನಾರಾಯಣರಾವ್‌, ಭಕ್ತರು, ಮಹಿಳಾ ಭಕ್ತರ ಸಮ್ಮುಖದಲ್ಲಿ ನಡೆಯಿತು.