ಧಾರವಾಡ ತಹಸೀಲ್ದಾರ್ ಕಚೇರಿ ದುರಸ್ತಿ ಯಾವಾಗ?

- ಜೈಲಾಗಿದ್ದ ಕಟ್ಟಡ ಸ್ವಾತಂತ್ರ್ಯಾನಂತರ ತಹಸೀಲ್ದಾರ್ ಕಚೇರಿ

ಶತಮಾನದ ಇತಿಹಾಸ ಹೊಂದಿದ್ದರೂ ಕಟ್ಟಡದ ತಳಪಾಯ, ಗೋಡೆಗಳು ಇನ್ನೂ ಸಾಕಷ್ಟು ಗಟ್ಟಿಯಾಗಿವೆ. ಆದರೆ, ಹೆಂಚಿನ ಕಟ್ಟಡವಾಗಿದ್ದು ಮೇಲ್ಚಾವಣಿ ಶಿಥಿಲವಾಗಿದೆ. ದೊಡ್ಡ ಮಳೆ ಅಥವಾ ಗಾಳಿ ಬಂದಾಗ ಅನಾಹುತ ಸಂಭವಿಸಿದರೂ ಅಚ್ಚರಿ ಏನಿಲ್ಲ. ಆಗಾಗ ದುರಸ್ತಿ ಕಾರ್ಯ ಕೈಗೊಂಡರೂ ಮಳೆ-ಗಾಳಿ-ಬಿಸಿಲಿನ ಹೊಡೆತಕ್ಕೆ ಕಟ್ಟಡ ದಿನದಿಂದ ದಿನಕ್ಕೆ ಸೊರಗುತ್ತಿದೆ. ಶಿಥಿಲಗೊಂಡ ಕಚೇರಿಯಲ್ಲಿಯೇ ಹತ್ತಾರು ವರ್ಷಗಳಿಂದ ಆಡಳಿತ ನಡೆಯುತ್ತಿದ್ದು, ಎಚ್ಚೆತ್ತುಕೊಂಡು ಇನ್ನಾದರೂ ಈ ಕಚೇರಿ ನವೀಕರಣ ಅಥವಾ ಹೊಸ ಕಟ್ಟಡ ನಿರ್ಮಿಸಬೇಕೆಂಬ ಸಾರ್ವಜನಿಕರ ಬೇಡಿಕೆ ಹಲವು ದಿನಗಳಿಂದ ಇದೆ.

ತಹಸೀಲ್ದಾರ್‌ ಕೋಣೆಯ ಪಕ್ಕದಲ್ಲಿಯೇ ಮತ್ತೊಂದು ಕಟ್ಟಡದಲ್ಲಿ (ರೆಕಾರ್ಡ್‌ ರೂಂ) ಇಡೀ ಧಾರವಾಡ ತಾಲೂಕಿನ ರೈತರ ಭೂಮಿಗಳಿಗೆ ಸಂಬಂಧಿಸಿ 14 ಲಕ್ಷ ದಾಖಲೆಗಳು ಕಾಗದದ ರೂಪದಲ್ಲಿವೆ. ಸ್ವಾತಂತ್ರ್ಯ ಪೂರ್ವದಿಂದ ಇಲ್ಲಿಯ ವರೆಗೆ ಆ ದಾಖಲೆಗಳನ್ನು ಕಾಪಿಟ್ಟುಕೊಂಡು ಬಂದಿದ್ದು, ಇನ್ಮುಂದೆ ಕಷ್ಟ ಸಾಧ್ಯ ಎನ್ನುವ ಕಚೇರಿ ಸಿಬ್ಬಂದಿ, ಕೆಲವೇ ದಿನಗಳಲ್ಲಿ ಕಾಗದದ ದಾಖಲೆಗಳು ನಾಶವಾಗುವ ಎಲ್ಲ ಸಾಧ್ಯತೆಗಳಿವೆ. ಕೂಡಲೇ ಅವುಗಳನ್ನು ರಕ್ಷಣೆ ಮಾಡುವ ಜತೆಗೆ ಡಿಜಿಟಲೀಕರಣ ಮಾಡಿದರೆ ಒಳ್ಳೆಯದು. ಇಲ್ಲದೇ ಹೋದಲ್ಲಿ ಕಾಗದದ ದಾಖಲೆಗಳು ಪುಡಿಯಾಗುವ, ಅದರ ಮೇಲಿನ ಅಕ್ಷರಗಳು ಅಳಿಸಿ ಹೋಗುವ ಸಾಧ್ಯತೆ ಇದೆ. ದಾಖಲೆ ರಕ್ಷಣೆ ಮಾಡಿಟ್ಟಿರುವ ಕೋಣೆಯು ಹಂಚಿನದ್ದಾಗಿದ್ದು ಧೂಳಿನಿಂದಲೂ ತುಂಬಿಕೊಂಡಿದೆ.

ಜೈಲಾಗಿತ್ತು ಈ ಕಚೇರಿ

ತಹಸೀಲ್ದಾರ್‌ ಕಚೇರಿ ನೂತನ ಕಟ್ಟಡ ನಿರ್ಮಿಸಬೇಕೆಂದು ಹಲವು ಬಾರಿ ಮನವಿ ಮಾಡಿದರೂ ಯಾವ ಸರ್ಕಾರವೂ ಸ್ಪಂದಿಸಿಲ್ಲ. ಕ್ರಿಯಾಶೀಲರಾಗಿರುವ ಉಸ್ತುವಾರಿ ಸಚಿವ ಸಂತೋಷ ಲಾಡ್‌ ಈ ಕಚೇರಿಗೆ ಭೇಟಿ ನೀಡಿ ಇಲ್ಲಾಗಬೇಕಾದ ಕಾರ್ಯಗಳ ಬಗ್ಗೆ ಗಮನ ಹರಿಸಬೇಕು. ಇಲ್ಲದೇ ಹೋದಲ್ಲಿ ಹೋರಾಟ ಅನಿವಾರ್ಯ ಎಂದು ನರೇಂದ್ರ ಗ್ರಾಮದ ಶಂಕರ ಕೋಮಾರ ದೇಸಾಯಿ ಎಚ್ಚರಿಸಿದರು.