ಬರಗಾಲ ಸಮಸ್ಯೆಗಳ ಕುರಿತು ವಿವಿಧ ಸಂಘಟನೆಗಳ ಚರ್ಚೆ

ತೆಂಗು ಸೇರಿ ತೋಟಗಾರಿಕೆ ಬೆಳೆಗಳನ್ನು ಬರಪರಿಹಾರ ವ್ಯಾಪ್ತಿಗೆ ಸೇರಿಸಲು ಆಗ್ರಹ । ಬರ ಪರಿಣಾಮಕಾರಿ ನಿರ್ವಹಣೆಗೆ ತಾಲೂಕು ಆಡಳಿತ ಸಹಮತ

ಭೀಕರ ಬರದಿಂದಾಗಿ ತಾಲೂಕಿನಲ್ಲಿ ಎದುರಾಗಿರುವ ಹಲವು ಸಮಸ್ಯೆಗಳ ಕುರಿತು ತಹಸೀಲ್ದಾರ್ ಸೊಮಶೇಖರ್ ಅಧ್ಯಕ್ಷತೆಯಲ್ಲಿ ಪಟ್ಟಣದ ತಾಲೂಕು ಪಂಚಾಯ್ತಿ ಸಭಾಂಗಣದಲ್ಲಿ ವಿವಿಧ ಸಂಘಟನೆಗಳ ಮುಖಂಡರೊಂದಿಗೆ ಚರ್ಚೆ ನಡೆಸಲಾಯಿತು.

ತೆಂಗು, ರೇಷ್ಮೆ, ಹೈನುಗಾರಿಕೆಯು ರೈತರ ಆದಾಯಕ್ಕೆ ಮೂಲವಾಗಿತ್ತು. ಬರದಿಂದ ರೈತರು ಸಂಕಷ್ಟ ಎದುರಿಸುವಂತಾಗಿದೆ. ಸರ್ಕಾರ ತೆಂಗು ಸೇರಿ ತೊಟಗಾರಿಕೆ ಬೆಳೆಗಳನ್ನು ಬರ ಪರಿಹಾರ ವ್ಯಾಪ್ತಿಗೆ ಪರಿಗಣಿಸಬೇಕು ಎಂದು ಒತ್ತಾಯಿಸಿದರು.

ಗುಣಮಟ್ಟದ ವಿದ್ಯುತ್ ಹಾಗೂ ಅಕ್ರಮ ಸಕ್ರಮ ಯೊಜನೆ ಮುಂದುವರಿಕೆ, ಸೊಲಾರ್ ಪಂಪ್ ಸೆಟ್ ಗಳಿಗೆ ಪ್ರೋತ್ಸಾಹ ಧನ ಹೆಚ್ಚಳ ಮಾಡಬೇಕು. ಖಾಸಗಿ ಶಿಕ್ಷಣ ಸಂಸ್ಥೆಗಳಿಗೆ ತಾಲೂಕು ಆಡಳಿತ ಶಾಲಾ ಶುಲ್ಕ ನಿಗಧಿಗೊಳಿಸಲು ಮತ್ತು ಬರದ ಹಿನ್ನೆಲೆಯಲ್ಲಿ ಆರಂಭಿಕ ಶುಲ್ಕ ಪಾವತಿಗೆ ಕಾಲಾವಕಾಶ ಕೊಡಿಸಲು ಮುಂದಾಗಬೇಕು ಎಂದು ಮನವಿ ಮಾಡಿದರು.

ಕಬ್ಬು ಬೆಳೆಗಾರರನ್ನು ರಕ್ಷಿಸಲು ಸಕ್ಕರೆ ಕಾರ್ಖಾನೆಗಳು ಧಾವಿಸಬೇಕು. ಕಬ್ಬಿನ ಬಿತ್ತನೆ, ರಸಗೊಬ್ಬರ ಹಾಗೂ ಬೇಸಾಯದ ಖರ್ಚಿಗೆ ಬಡ್ಡಿರಹಿತ ಸಾಲ ನೀಡಬೇಕು. ಮನ್ಮುಲ್ ಪಶು ಆಹಾರದಲ್ಲಿ ಇಳಿಕೆ, ಹಾಲಿನ ಬೆಲೆ ಏರಿಕೆ, ಹಾಲಿನ ಪ್ರೊತ್ಸಾಹ ಧನ ಬಾಕಿ, ಜಾನುವಾರು ಮರಣ ಪರಿಹಾರ ಬಾಕಿ ಶೀಘ್ರ ಬಿಡುಗಡೆ ಮಾಡಿ ರೈತನ ಹಿತಕಾಯಬೇಕು ಎಂದು ಸಭೆಯಲ್ಲಿ ಅಧಿಕಾರಿಗಳ ಗಮನ ಸೆಳೆಯಲಾಯಿತು.

ಸಭೆ ನಂತರ ಸಮಗ್ರ ಬರ ನಿರ್ವಹಣೆ, ಪರಿಣಾಮಕಾರಿಯಾಗಿಸಲು ಗ್ರಾಮ ಪಂಚಾಯ್ತಿ ಹಂತದಲ್ಲಿ ವಿಶೇಷ ಗ್ರಾಮ ಸಭೆ ನಡೆಸಲು ತಾಲೂಕು ಆಡಳಿತ ಸಹಮತ ವ್ಯಕ್ತಪಡಿಸಿತು. ಆತಗೂರು ಗೋಶಾಲೆಯಲ್ಲಿ ಮೇವಿಲ್ಲದ ಜಾನುವಾರಗಳ ಪಾಲನೆಗೆ ತೀರ್ಮಾನಿಸಿತು. ಖಾಸಗಿ ಬೋರ್ ವೆಲ್ ಗಳಿಂದ ಕುಡಿಯುವ ನೀರಿನ ಸಮಸ್ಯೆಯಿರುವ ಗ್ರಾಮಗಳಿಗೆ ಸರಬರಾಜು ಮಾಡಲು ಕ್ರಮ ವಹಿಸಲು ತೀರ್ಮಾನಿಸಿತು.