ಜಿಲ್ಲಾಸ್ಪತ್ರೆ ಮೇಲ್ಚಾವಣಿ ಕುಸಿತ; ರೋಗಿ ಪಾರು

ಕನ್ನಡಪ್ರಭ ವಾರ್ತೆ ದಾವಣಗೆರೆ

ನಗರದ ಜಿಲ್ಲಾ ಆಸ್ಪತ್ರೆಯ ಕೊಠಡಿ ಸಂಖ್ಯೆ 71-72ರ ಮೇಲ್ಚಾವಣಿ ಕಿತ್ತುಕೊಂಡು, ಕೆಳಗೆ ಬಿದ್ದಿದೆ. ಮೇಲ್ಚಾವಣಿ ಬೀಳುವ ಸದ್ದನ್ನು ಗಮನಿಸಿದ ಒಳ ರೋಗಿ ಹಾಗೂ ಇತರರು ತಕ್ಷಣವೇ ದೂರಕ್ಕೆ ಓಡಿದ್ದರಿಂದ ದೊಡ್ಡ ಗಾತ್ರದ ಸಿಮೆಂಟ್ ಕಾಂಕ್ರಿಟ್‌ ಬೀಳುವುದು ತಪ್ಪಿದೆ.

ಕಳೆದ ರಾತ್ರಿ ಜಿಲ್ಲಾಸ್ಪತ್ರೆಯ ವಾರ್ಡ್ ನಂಬರ್ 71-72ರಲ್ಲಿ ಒಳ ರೋಗಿಗಳು ಮಲಗಿದ್ದ ವೇಳೆ ಮೇಲ್ಚಾವಣಿಯಲ್ಲಿ ಏನೋ ಸದ್ದು ಕೇಳಿ ಜಾಗೃತಗೊಂಡ ಒಳ ರೋಗಿಯು ಬೀಳುವುದು ಗಮನಿಸಿ, ಅಕ್ಕಪಕ್ಕದ ಬೆಡ್‌ ನವರಿಗೆ ಎಚ್ಚರಿಸಿ, ಸುರಕ್ಷಿತ ಸ್ಥಳಕ್ಕೆ ಓಡಿದ್ದಾರೆ. ನೋಡ ನೋಡುತ್ತಿದ್ದಂತೆ ಕೊಠಡಿ ಮೇಲ್ಚಾವಣಿ ಪ್ಲಾಸ್ಟರ್‌ನ ಸುಮಾರು ಭಾಗವು ಬೆಡ್‌ ಮೇಲೆ ಬಿದ್ದಿದೆ. ಒಳ ರೋಗಿ ಒಂದು ಕ್ಷಣ ತಡ ಮಾಡಿದ್ದರೂ ತಲೆ ಅಥವಾ ದೇಹದ ಮೇಲೆ ಬಿದ್ದು, ದೊಡ್ಡ ಮಟ್ಟದ ಅಪಾಯವಾಗುವ ಸಾಧ್ಯತೆ ಇತ್ತು ಎನ್ನಲಾಗಿದೆ.

ಅವ್ಯವಸ್ಥೆಯ ಆಗರವಾದ, ಮೂಲ ಸೌಕರ್ಯಗಳ ಕೊರತೆಯಿಂದ ನಲುಗುತ್ತಿರುವ ಜಿಲ್ಲಾಸ್ಪತ್ರೆಯ ಬಹುತೇಕ ಕಡೆ ಇದೇ ರೀತಿ ಆರ್‌ಸಿಸಿ ಮೇಲ್ಚಾವಣಿಯ ಪ್ಲಾಸ್ಟರ್ ಕಿತ್ತು ಬೀಳುತ್ತಿರುವುದು, ಅಲ್ಲಲ್ಲಿ ಆರ್‌ಸಿಸಿಗೆ ಹಾಕಿರುವ ಕಬ್ಬಿಣದ ಸಾಲುಗಳು ಕಂಡು ಬರುತ್ತಿವೆ. ಇನ್ನು ಮಳೆಗಾಲ ಬಂದರಂತೂ ಆಸ್ಪತ್ರೆಯ ಬಹುತೇಕ ಕಡೆ ನೀರು ತೊಟ್ಟಿರುವುದು, ಕಟ್ಟಡ ಶಿಥಿಲಗೊಳ್ಳುವುದು, ಮೇಲ್ಭಾಗದಿಂದ ನೀರು ಬಸಿಯುವುದು ಸಾಮಾನ್ಯ. ಸಾವಿರಾರು ರೋಗಿಗಳು, ಒಳ ರೋಗಿಗಳು, ವೈದ್ಯರು, ತಜ್ಞ ವೈದ್ಯರು, ಶುಶ್ರೂಷಕರು, ಡಿ ದರ್ಜೆ ನೌಕರರು, ರೋಗಿಗಳ ಕಡೆಯವರು ಇರುವಂತಹ ಆಸ್ಪತ್ರೆ ದುರಸ್ತಿ ಕೈಗೊಳ್ಳುವ ಕೆಲಸವನ್ನು ಸರ್ಕಾರ, ಆರೋಗ್ಯ ಇಲಾಖೆ ಮಾಡಬೇಕಾಗಿದೆ. ಪ್ರಸ್ತಾವನೆ ಸಲ್ಲಿಸಿದರೂ ಅನುದಾನ ಬಂದಿಲ್ಲ