ಅಭಿವೃದ್ಧಿ ಆಗದೆ ಉಳಿದ ಹಳೇ ತಲಕಾಡು ಮುಖ್ಯರಸ್ತೆ

ಅಕ್ರಂಪಾಷ ತಲಕಾಡು

ಪ್ರಸಿದ್ಧ ಪ್ರವಾಸಿ ತಾಣ ಹಳೇತಲಕಾಡು ಊರೊಳಗಡೆ ಮುಖ್ಯರಸ್ತೆ ಅಭಿವೃದ್ದಿ ಕಾಮಗಾರಿ ಹತ್ತು ವರ್ಷದಿಂದ ಸ್ಥಗಿತಗೊಂಡು ನಿವಾಸಿಗಳ‌ನೆಮ್ಮದಿ‌ಹಾಳು ಮಾಡಿದೆ.

ಹಳೇ ತಲಕಾಡು ಪಾರಂಪರಿಕ ಪ್ರವಾಸಿ ಪ್ರಸಿದ್ಧ ಸ್ಥಳ, ನೂರಾರು ವರ್ಷಗಳಿಂದ ಗ್ರಾಮದ ನಿವಾಸಿಗಳು ಈಗ ರಸ್ತೆ ವಿಸ್ತರಣೆಯಾಗುವ ಪುರಾತನ ಆಂಜನೇಯ ದೇಗುಲವಿರುವ ರಾಜಬೀದಿಯ ಸುತ್ತಲಿನ ಬೀದಿಗಳಲ್ಲಿ ನೆಲೆಸಿದ್ದಾರೆ.

ಇಲ್ಲಿಯ ರಸ್ತೆ ವಿಸ್ತರಣೆಯಿಂದ ಪಾರಂಪರಿಕ ಗ್ರಾಮದಲ್ಲಿ ನೂರಾರು ವರ್ಷದ ಹಳೆಯ ಕಾಲದ ಮನೆಗಳಿಗೆ ಹಾನಿಯಾಗುತ್ತದೆ, ಹೊರವರ್ತುಲ (ಬೈಪಾಸ್) ರಸ್ತೆ ನಿರ್ಮಿಸುವಂತೆ ಇಲ್ಲಿನ ಪ್ರಜ್ಞಾವಂತರು ಸಲಹೆ ನೀಡಿದ್ದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಪಾರಂಪರಿಕ ಸ್ಥಳದ ಸಂರಕ್ಷಣೆ ದೂರದೃಷ್ಟಿ ಇಲ್ಲದೆ ಊರೊಳಗಡೆ ರಸ್ತೆ ವಿಸ್ತರಣೆಗೆ ಮುಂದಾದ ಲೋಕೋಪಯೋಗಿ ಅಧಿಕಾರಿಗಳು, ಇಲ್ಲಿನ ರಸ್ತೆ ಅಭಿವೃದ್ದಿ ಪೂರ್ಣಗೊಳಿಸಲು ಇದುವರೆಗೂ ಸಫಲವಾಗದೆ ಅವರಿವರ ಮೇಲೆ ದೂರುತ್ತಿದ್ದಾರೆ.

ಆದರೆ ಲೋಕೋಪಯೋಗಿ ಇಲಾಖೆ ಊರೊಳಗಡೆ ರಸ್ತೆ ವಿಸ್ತರಣೆ ಸಲುವಾಗಿ ಶೇ. 80ರಷ್ಟು ರಸ್ತೆ ಬದಿಯ ವಸತಿ ನಿವೇಶನ ತೆರವುಗೊಳಿಸಿದ್ದು. ಕೇವಲ 33 ವಸತಿ ನಿವೇಶನಗಳು ಮಾತ್ರ ತೆರವಿಗೆ ಬಾಕಿ ಉಳಿದಿವೆ. ಮನೆ ತೆರವು ಕಾರ್ಯ ಸ್ಥಗಿತಗೊಂಡ ಕಾರಣದಿಂದ ಊರೊಳಗಡೆ ರಸ್ತೆ ಉದ್ದಕ್ಕೂ ತಲಕಾಡಿಗೆ ಭೇಟಿ ನೀಡುವ ಪ್ರವಾಸಿಗರಿಗೆ ಮೋಟು ಗೋಡೆಗಳು ವಿರೂಪ ರೀತಿಯ ಸ್ವಾಗತ ನೀಡುತ್ತಿವೆ.

ವಸತಿ ಕಳೆದುಕೊಳ್ಳಲು ಇಚ್ಚೆಯಿಲ್ಲದ ಕೆಲವರು ಹಿರಿಯರು ಬಾಳಿ ಬೆಳಗಿದ ಹಳೆಯ ಮನೆಗಳಲ್ಲಿ ಭಾವನಾತ್ಮಕ ಸಂಬಂಧ ಬೆಳೆಸಿಕೊಂಡಿದ್ದಾರೆ. ಸರ್ಕಾರದ ಯಾವುದೇ ಪರಿಹಾರ ಬೇಡ ನನ್ನ ಪೂರ್ವಿಕರು ವಾಸ ಮಾಡಿದ ಗೀತಾ ಸದನ ನಿವಾಸವನ್ನು ಉಳಿಸಿಕೊಟ್ಟರೆ ಸಾಕೆಂದು ಸ್ವತಂತ್ರ ಹೋರಾಟಗಾರ ರಾಮಸ್ವಾಮಿ ಅಯ್ಯಂಗಾರ್ ಅವರ ಪುತ್ರ ಅರ್ಚಕ ವಾಸು ಮೊರೆಯಿಟ್ಟಿದ್ದಾರೆ.

ಲೋಕೋಪಯೋಗಿ ಇಲಾಖೆ ಇಲ್ಲಿನ ರಸ್ತೆ ವಿಸ್ತರಣೆಗೆ 133 ವಸತಿ ನಿವೇಶನಗಳ ತೆರವಿಗೆ ಗುರುತಿಸಿದೆ. ಇದರಲ್ಲಿ ಬಹುಪಾಲು ವಸತಿಗಳನ್ನು ಈಗಾಗಲೆ ಅಧಿಕಾರಿಗಳು ತೆರವು ಗೊಳಿಸಿ ವರ್ಷವಾಗಿದೆ. ಇನ್ನೂ 33 ವಸತಿ ಪ್ರದೇಶ ಮಾತ್ರ ತೆರವಾಗದೆ ಬಾಕಿ ಉಳಿದಿವೆ. ಇದರಿಂದ ಬೇಸಿಗೆಯಲ್ಲಿ ಜನ ನಿತ್ಯ ಧೂಳು ಸೇವನೆಯ ನರಕ ಅನುಭವಿಸುತ್ತಿದ್ದಾರೆ.

- ಸತೀಶ್‌ಚಂದ್ರ, ಎಇಇ, ಲೋಕೋಪಯೋಗಿ ಇಲಾಖೆ, ಟಿ. ನರಸೀಪುರ