ಗ್ಯಾರಂಟಿ ಅನುಷ್ಠಾನ ಸಭೆ ನಡುವಳಿಕೆ ದಾಖಲಿಕರಣ ಮಾಡಿ

ಶಿಗ್ಗಾಂವಿ: ಹಿಂದಿನ ಅವಧಿಯಲ್ಲಿ ಗ್ಯಾರಂಟಿ ಅನುಷ್ಠಾನದ ಸಭೆ ನಡೆಸಿದ ಸಭಾ ನಡುವಳಿಕೆಗಳನ್ನು ದಾಖಲಿಕರಣ ಮಾಡಿ ಸದಸ್ಯರಿಗೆ ನೀಡಬೇಕು. ಇದರಿಂದಾಗಿ ಹಿಂದೆ ಚರ್ಚಿಸಿದ ವಿಚಾರಗಳನ್ನು ಸಮಸ್ಯೆಗಳನ್ನು ಸರಿಪಡಿಸಲಾಯಿತೇ ಇಲ್ಲವೇ ಮಾಹಿತಿಯೇ ನಮಗೆ ಸಿಗುತ್ತಿಲ್ಲೆಂದು ತಾಪಂ ಕಾರ್ಯ ನಿರ್ವಾಹಕ ಅಧಿಕಾರಿಗಳ ಮೇಲೆ ಸದಸ್ಯರಾದ ದಾವಲ್‌ಸಾಬ ಬೊಮ್ಮನಹಳ್ಳಿ ಹಾಗೂ ಪರಶುರಾಮ ಕಾಳೆ ಗರಂ ಆದ ಘಟನೆ ನಡೆಯಿತು. ತಾಪಂ ಆವರಣದ ಸಭಾ ಭವನದಲ್ಲಿ ತಾಲೂಕು ಗ್ಯಾರಂಟಿ ಅನುಷ್ಠಾನ ಸಮಿತಿ ಅಧ್ಯಕ್ಷ ಶೇಖಪ್ಪ ಮಣಕಟ್ಟಿ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಸದಸ್ಯರು ಆಕ್ಷೇಪ ವ್ಯಕ್ತಪಡಿಸಿದರು. ಕಾರ್ಯನಿರ್ವಾಹಕ ಅಧಿಕಾರಿ ಪಿ.ವಿಶ್ವನಾಥ ಮಾತನಾಡಿ, ಈಗಾಗಲೇ ಎರಡನೇ ಸಭೆ ನಡೆಸುತ್ತಿದ್ದೇವೆ. ಸರ್ಕಾರ ಘೋಷಣೆ ಮಾಡಿದ ಪಂಚ ಗ್ಯಾರಂಟಿ ಯೋಜನೆಯ ಜಾರಿ ವಿಚಾರದಲ್ಲಿ ಈ ಹಿಂದಿನ ಸಭೆಯಲ್ಲಿ ಚರ್ಚಿಸಲಾಗಿ ಅಧಿಕಾರಿಗಳಿಗೆ ಯೋಜನೆಯಿಂದ ಹೊರಗುಳಿದ ಫಲಾನುಭವಿಗಳ ದಾಖಲಾತಿ ಸಮಸ್ಯೆಗಳನ್ನು ಚರ್ಚಿಸಿ ಅಧಿಕಾರಿಗಳಿಗೆ ಕ್ರಮ ವಹಿಸುವಂತೆ ಸೂಚನೆ ನೀಡಿದ್ದೇನೆ ಎಂದರು.

ಸದಸ್ಯ ಅತ್ತಾವುಲ್ಲಾಖಾನ್ ಖಾಜೇಖಾನ ಮಾತನಾಡಿ ಹಲವಾರು ತಿಂಗಳಿಂದಲೂ ಕರೆಂಟ್ ಬಿಲ್ಲುಗಳು ಬರುತ್ತಲೇ ಇವೆ. ಸರಿಯಾದ ಪ್ರಮಾಣೀಕರಣ ನಡೆಯುತ್ತಿಲ್ಲ ಉಚಿತ ವಿದ್ಯುತ್‌ ವಿತರಣೆ ಬಗ್ಗೆ ಅನುಷ್ಠಾನ ಬಗ್ಗೆ ಜನರಲ್ಲಿ ಸಾಕಷ್ಟು ತಕರಾರುಗಳಿವೆ. ನಮ್ಮ ಸರ್ಕಾರ ೨೦೦ ಯುನಿಟ್ ವಿದ್ಯುತ್ತ ಉಚಿತ ವೆಂದು ಗ್ಯಾರಂಟಿ ಪ್ರಸ್ತಾಪ ಹೇಳಿದೆ ಅದರ ಪ್ರಕಾರವೇ ಇಲಾಖೆ ಕ್ರಮವಹಿಸಬೇಕು ಪ್ರತಿ ತಿಂಗಳೂ ಬಿಲ್ಲುಗಳು ಬರುತ್ತಲೇ ಇವೆ ಎಂದು ಹೆಸ್ಕಾಂ ಎಇಇ ಯಲ್ಲಪ್ಪ ನೀರಲಗಿ ಅವರಿಗೆ ತರಾಟೆ ತೆಗೆದುಕೊಂಡರು. ಪ್ರತಿ ಮನೆಗಳಿಗೆ ಹಿಂದಿನ ಬಳಕೆಯ ಅಧಾರದ ಮೇಲೆ ಶೇಖಡಾ ೧೦ ರಷ್ಟು ಹೆಚ್ಚಳಕ್ಕೆ ಅವಕಾಸವಿದೆ. ಹೊಸಮನೆಗಳಿಗೆ ಸಂಪರ್ಕ ವಿದ್ಯುತ್ತಿಗೆ ೫೮ ಯುನಿಟ್ ನೀಡಲಾಗುತ್ತಿದೆ. ಆದರೇ ಸರ್ಕಾರದ ಮಾನದಂಡದಲ್ಲಿಯೇ ಬಿಲ್ಲುಗಳು ಬರುತ್ತಿವೆ ಎಂದು ಉತ್ತರಿಸಿದರು. ಆಹಾರ ಮತ್ತು ನಾಗರೀಕ ಪೂರೈಕೆಯ ಶಿವಾನಂದ ಅಜಂಪೂರ ಮಾತನಾಡಿ, ಕಾರ್ಡ ನೊಂದಣಿಗೆ ಸರ್ಕಾರವೇ ಲಾಗಿನ್ ಓಪೆನ್ ಮಾಡಿಲ್ಲ. ಹೊಸ ಕಾರ್ಡದಾರರು ಇಲ್ಲ ಎಂದರು. ತಾಪಂ ಯೋಜನಾ ಅಧಿಕಾರಿ ಶಿವಾನಂದ ಸಣ್ಣಕ್ಕಿ ಸ್ವಾಗತಿಸಿ, ವಂದಿಸಿದರು.