ಹೆಣ್ಣು ಎಂದರೆ ಕೀಳರಿಮೆ ಬೇಡ, ಗೌರವದಿಂದ ಕಾಣಿ: ಡಾ.ಅರ್ಚನಾ

ಕನ್ನಡಪ್ರಭ ವಾರ್ತೆ ಕಾಗವಾಡ

ಇಲ್ಲಿನ ಶಿವಾನಂದ ಮಹಾವಿದ್ಯಾಲಯದಲ್ಲಿ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆ ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ ಆಗಮಿಸಿ ಸನ್ಮಾನ ಸ್ವೀಕರಿಸಿ ಮಾತನಾಡಿದ ಅವರು, ಮಹಿಳೆಯೂ ಮನೆಯಲ್ಲಿ ಗೃಹಿಣಿಯಾಗಿ ಸವಟು ಹಿಡಿದು, ಅಡುಗೆಯೂ ಮಾಡುತ್ತಾಳೆ. ದೇಶಕ್ಕೆ ಗಂಡಾಂತರ ಬಂದರೆ ಬಂದೂಕು ಹಿಡಿದು ದೇಶ ರಕ್ಷಣೆಯೂ ಮಾಡುತ್ತಾಳೆ. ವಿಶ್ವದ ಮಹಾನ್ ಸಾಧಕರಲ್ಲಿ ಮಹಿಳೆಯರ ಸಾಧನೆಯೇ ಹೆಚ್ಚಿದೆ. ಹಾಗಾಗಿ ಹೆಣ್ಣು ಎಂದರೆ ಕೀಳರಿಮೆ ಬೇಡ. ಪೂಜ್ಯನೀಯ ಭಾವನೆಯಿಂದ ಕಾಣುವ ಮೂಲಕ ಗೌರವ ನೀಡಬೇಕೆಂದರು.

ಉಪ ಪ್ರಾಚಾರ್ಯ ಡಾ.ಎಸ್.ಪಿ.ತಳವಾರ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಮನೆ ನಿರ್ವಹಣೆ ಜೊತೆಗೆ ಉದ್ಯೋಗದಲ್ಲಿ ಯಶಸ್ಸು ಸಾಧಿಸಿರುವ ಮಹಿಳೆಯರು ಎಲ್ಲ ಕ್ಷೇತ್ರದಲ್ಲಿ ಪುರುಷರಷ್ಟೇ ಪ್ರಧಾನವಾಗಿ ಮುಂಚೂಣಿ ಸಾಧಿಸಿದ್ದಾರೆ. ಮಾತೆಯರ ಮಮತೆ ಮುಗಿಲಗಲ. ಶ್ರಮವನ್ನರಿಯದೇ, ಸತತ ದುಡಿದು ಪ್ರತಿಯೊಬ್ಬರ ಬಾಳಿಗೆ ಬೆಳಕು ನೀಡಬಲ್ಲ ಸ್ತ್ರೀ ಪ್ರತಿಯೊಬ್ಬರ ಬದುಕಿನಲ್ಲೂ ಪುರುಷನ ಯಶಸ್ಸಿಗೆ ಶ್ರಮಿಸುತ್ತಾಳೆ ಎಂದರು.

ಮಹಿಳೆ ಅಬಲೆ ಅಲ್ಲ ಸಬಲೆಯಾಗಿದ್ದಾಳೆ. ಹಳ್ಳಿಯಿಂದ ದಿಲ್ಲಿಯವರೆಗೆ ಸದ್ದು ಮಾಡುವ ಹಾಗೇ ರಾಜಕೀಯ, ಶೈಕ್ಷಣಿಕ, ಆರ್ಥಿಕ, ಸಾಂಸ್ಕೃತಿಕ, ರಂಗ ಸೇರಿದಂತೆ ಹಲವಾರು ಕ್ಷೇತ್ರಗಳಲ್ಲಿ ಗುರುತಿಸಿಕೊಳ್ಳುವ ಮೂಲಕ ಮಹಿಳೆ ಸಬಲೆ ಎಂದು ಸಾಬೀತುಪಡಿಸಿದ್ದಾಳೆ. ಮಹಿಳೆಯರು ಗಗನಯಾನಿ, ರಾಷ್ಟ್ರಪತಿ, ಪ್ರಧಾನಿ, ಕೃಷಿ, ಸೈನಿಕ ವೃತ್ತಿ ಸೇರಿ ಹಲವಾರು ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ್ದಾರೆ. ಮಹಿಳೆಯರಿಗೆ ಅಸಾದ್ಯವಾದ ಕಾರ್ಯ ಯಾವುದೂ ಇಲ್ಲ.