ಸಭೆಯಲ್ಲಿ ಸುಳ್ಳು ದಾಖಲೆ ತೋರಿಸದಿರಿ: ಅಧಿಕಾರಿಗಳಿಗೆ ಶಾಸಕ ಶಿವಣ್ಣನವರ ತರಾಟೆ

ಬ್ಯಾಡಗಿ: ಅರಣ್ಯ ಇಲಾಖೆಯಿಂದ ರಸ್ತೆ ಪಕ್ಕದಲ್ಲಿ ನೆಡುವ ಗಿಡಮರಗಳ ಯಾಕೆ ಸುಳ್ಳು ಅಂಕಿ ಸಂಖ್ಯೆಗಳನ್ನು ನೀಡುತ್ತಿದ್ದಿರಿ. ಇದರಿಂದ ಇಲಾಖೆ ಸೇರಿದಂತೆ ಅರಣ್ಯ ಅಭಿವೃದ್ಧಿ ನಿಗಮದ ಅಧ್ಯಕ್ಷನಾಗಿ ನನ್ನ ಗೌರವಕ್ಕೆ ಧಕ್ಕೆ ಬರುತ್ತಿದೆ. ಇಂತಹ ಪ್ರಕರಣಗಳು ಕೇವಲ ಒಂದು ಕಡೆಯಲ್ಲ, ಬಹಳಷ್ಟು ಕಡೆ ನಡೆಯುತ್ತಿದ್ದು, ಇದರ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಶಾಸಕ ಬಸವರಾಜ ಶಿವಣ್ಣನವರ ಅರಣ್ಯ ಇಲಾಖೆ ಅಧಿಕಾರಿಗೆ ಖಡಕ್ ಎಚ್ಚರಿಕೆ ನೀಡಿದರು.

ಗುಂಡೇನಹಳ್ಳಿಯಿಂದ ಕದಮನಹಳ್ಳಿ ಸಾಗುವ ರಸ್ತೆಯಲ್ಲಿ ನೆಟ್ಟಿರುವ ಸಸಿಗಳ ಲೆಕ್ಕ ಸಾವಿರದಲ್ಲಿದೆ. ಆದರೆ ವಾಸ್ತವದಲ್ಲಿ ಹೆಚ್ಚೆಂದೆರೆ 40ರಿಂದ 50 ಸಸಿಗಳು ಮಾತ್ರ ಕಾಣಸಿಗುತ್ತವೆ. ಖುದ್ದಾಗಿ ನೋಡಿದ್ದೇನೆ. ಇದಕ್ಕೆ ನಾನೇ ಸಾಕ್ಷಿ ಎಂದು ತೀವ್ರ ತರಾಟೆಗೆ ತೆಗೆದುಕೊಂಡರು. ಇದಕ್ಕೆ ಪ್ರತಿಕ್ರಿಯಿಸಿದ ಅರಣ್ಯ ಇಲಾಖೆ ಅಧಿಕಾರಿ ತಮ್ಮವರನ್ನು ಈಗಲೇ ಕಳಿಸಿ ಸರ್. 500ಕ್ಕೂ ಹೆಚ್ಚು ಗಿಡಗಳನ್ನು ನೆಟ್ಟಿರುವ ಬಗ್ಗೆ ತೋರಿಸುತ್ತೇನೆ ಎಂದು ಮರು ಸವಾಲೆಸೆದರು. ಇದಕ್ಕೆ ಪ್ರತಿಕ್ರಿಯಿಸಿದ ಶಾಸಕರು ತಮ್ಮ ಆಪ್ತ ಸಹಾಯಕರಿಗೆ ಇವರನ್ನು ಕರೆದುಕೊಂಡು ಹೋಗಿ ನೋಡಿ ಬರುವಂತೆ ಸೂಚಿಸಿದರು.ಕಾಮಗಾರಿ ಬಗ್ಗೆ ತಕರಾರು: ಬ್ಯಾಡಗಿ ಮತಕ್ಷೇತ್ರದಾದ್ಯಂತ ಜೆಜೆಎಂ ಕಾಮಗಾರಿ ನಡೆಯುತ್ತಿದೆ. 7 ವರ್ಷ ಗತಿಸಿದರೂ ಕಾಮಗಾರಿ ಪೂರ್ಣಗೊಳಿಸದೇ ಸಾರ್ವಜನಿಕರು ತೊಂದರೆ ಅನುಭವಿಸುವಂತಾಗಿದೆ. ಜನರ ಬಗ್ಗೆ ನಿಷ್ಕಾಳಜಿ ಬೇಡ. ಕೆಲವೆಡೆ ಅಧಿಕಾರಿಗಳು ಗುತ್ತಿಗೆದಾರನ ಕೈಯಲ್ಲಿ ಸಿಲುಕಿದ್ದು, ಮನಸ್ಸಿಗೆ ಬಂದಾಗ ಕೆಲಸ ಮಾಡುತ್ತಿದ್ದಾರೆ. ಇನ್ನೂ ಕೆಲವೆಡೆ ಕಾಮಗಾರಿ ಸಂಪೂರ್ಣ ಬಿಲ್ ಪಡೆದು ಗುತ್ತಿಗೆದಾರರೇ ಕೈಗೆ ಸಿಗುತ್ತಿಲ್ಲ. ಇದೇನು ಅವವ್ಯಸ್ಥೆ ಎಂದ ಅವರು, ಅಪೂರ್ಣಗೊಂಡ ಕಾಮಗಾರಿ ಕುರಿತು ಅಸಮಾಧಾನ ವ್ಯಕ್ತಪಡಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಪಂಚಾಯತ್ ರಾಜ್ ಗ್ರಾಮೀಣ ಕುಡಿಯವ ನೀರು ಅಧಿಕಾರಿ ಸುರೇಶ ಬೇಡರ, ತಾಲೂಕಿನ 50 ಗ್ರಾಮಗಳಲ್ಲಿ ಕೆಲಸ ಪೂರ್ಣಗೊಂಡಿದ್ದು, ಇನ್ನುಳಿದ 16 ಗ್ರಾಮಗಳಲ್ಲಿ ಶೀಘ್ರದಲ್ಲೇ ಪುರ್ಣಗೊಳಿಸುವ ಭರವಸೆ ನೀಡಿದರು.

ಜಾನುವಾರು ಸಂತೆ ಅರಂಭಿಸಿ: ತಾಲೂಕಿನ ಚಿಕ್ಕಣಜಿ ಗ್ರಾಮದ ಎಪಿಎಂಸಿ ಉಪ ಪ್ರಾಂಗಣದಲ್ಲಿ ಪ್ರತಿ ಸೋಮವಾರ ಜಾನುವಾರು ಸಂತೆ ಆರಂಭಿಸಬೇಕು ಹಾಗೂ ಚಿಕ್ಕಬಾಸೂರ ಉಪಪ್ರಾಂಗಣದಲ್ಲಿನ ನಿವೇಶನ ಹಂಚಿಕೆ ಸೇರಿದಂತೆ ಗೋದಾಮುಗಳನ್ನು ಟೆಂಡರ್ ಕರೆದು ಸ್ಪರ್ಧಾತ್ಮಕ ದರದಲ್ಲಿ ಬಾಡಿಗೆ ರೂಪದಲ್ಲಿ ನೀಡಬೇಕು ಮತ್ತು ಇದರಲ್ಲಿ ಯಾವುದೇ ನಿಯಮ ಲೋಪವಾಗದಂತೆ ಎಚ್ಚರಿಕೆ ವಹಿಸಲು ಸೂಚಿಸಿದರು.

ಬ್ಯಾಡಗಿ ಪಟ್ಟಣಕ್ಕೆ ಸರಬರಾಜಾಗುತ್ತಿರುವ ಕುಡಿಯುವ ನೀರಿನಲ್ಲಿಯೇ ಕದರಮಂಡಲಗಿ ಗ್ರಾಮಕ್ಕೆ ಸುಮಾರು 4ರಿಂದ 6 ಲಕ್ಷ ಲೀ. ನೀರು ಬಳಸುವಂತೆ ಸೂಚಿಸಲಾಗಿತ್ತು. ಆದರೆ ಉದ್ದಟತನ ತೋರುತ್ತಿರುವ ಪಿಡಿಒ ಮತ್ತೆ 12 ಲಕ್ಷ ಲೀ. ನೀರು ಬಳಸುತ್ತಿರುವುದಾಗಿ ತಿಳಿದುಬಂದಿದ್ದು, ಅವರ ವಿರುದ್ಧ ಕಾನೂನು ಕ್ರಮಕ್ಕೆ ಸಭೆಯಲ್ಲಿ ನಿರ್ಧರಿಸಲಾಯಿತು.