ಭೂತಾಯಿ ರಕ್ತನಾಳಗಳಿಗೆ ಘಾಸಿ ಮಾಡಬೇಡಿ: ಸ್ವರ್ಣವಲ್ಲೀ ಶ್ರೀ

ರಾಜ್ಯ ಮಟ್ಟದ ವಿಚಾರ ಸಂಕಿರಣ ಉದ್ಘಾಟಿಸಿ ಆಶೀರ್ವಚನ

ನದಿಗಳು ಭೂತಾಯಿಯ ರಕ್ತನಾಳಗಳು. ಅವುಗಳಿಗೆ ಘಾಸಿ ಉಂಟಾದರೆ ಮಾನವರ ಮೇಲೆ ನೇರವಾಗಿ ಪರಿಣಾಮ ಎದುರಾಗಲಿದ್ದು, ಪರಿಸರದ ಜತೆ ನದಿಗಳನ್ನು ರಕ್ಷಿಸುವ ಹೊಣೆ ಭೂತಾಯಿಯ ಮಕ್ಕಳಾದ ನಮ್ಮದಾಗಿದೆ ಎಂದು ಸೋಂದಾ ಸ್ವರ್ಣವಲ್ಲೀಯ ಗಂಗಾಧರೇಂದ್ರ ಸರಸ್ವತೀ ಸ್ವಾಮೀಜಿ ನುಡಿದರು.

ಬೇಡ್ತಿ-ವರದಾ, ಅಘನಾಶಿನಿ-ವೇದಾವತಿ ನದಿ ತಿರುವು ಯೋಜನೆ, ಕರಾವಳಿಯಲ್ಲಿ ಕೇಣಿ ಬಂದರು, ಶರಾವತಿ ಭೂಗರ್ಭ ಯೋಜನೆಯನ್ನು ಅನುಷ್ಠಾನಗೊಳಿಸಲು ಹೊರಟಿದೆ. ನದಿ ನೀರು ಸಹಜವಾಗಿ ಹರಿದರೆ ಪರಿಸರದಲ್ಲಿ ಸಮತೋಲನೆಯಲ್ಲಿ ಇರುತ್ತದೆ. ಸಹಜವಾದ ನೀರಿನ ಹರಿವು ತಿರುವು ಮಾಡಿದರೆ ಅಸಮತೋಲನ ಉಂಟಾಗಿ ಮೀನುಗಾರಿಕೆ, ಕೃಷಿ, ಅರಣ್ಯದ ವನ್ಯಜೀವಿ, ಭೂಮಿಯ ಮೇಲೆ ಪರಿಣಾಮ ಬೀರಲಿದೆ.

ನದಿ ಪಾತ್ರ ಬದಲಾದರೆ ದುಷ್ಪರಿಣಾಣ ಖಂಡಿತ ಎದುರಾಗುತ್ತದೆ. ಎತ್ತಿನ ಹೊಳೆ ಎತ್ತಲಾರದಷ್ಟು ಹೂಳು ತುಂಬಿದೆ. ಯೋಜನೆ ಕಾರ್ಯಗತವಾದರೂ ಅದರಿಂದ ಪ್ರಯೋಜನವಾಗಿಲ್ಲ. ರಾಜ್ಯ ಮಟ್ಟದ ವಿಚಾರ ಸಂಕಿರಣ ಸರ್ವತೋಮುಖ ಚಿಂತನೆ ಕಾರ್ಯಕ್ರಮವಾಗಿದೆ ಎಂದರು.

ಪರಿಸರಶಾಸ್ತ್ರಜ್ಞ ವಿಜ್ಞಾನಿ ಡಾ. ಟಿ.ವಿ. ರಾಮಚಂದ್ರ, ಭೂಗರ್ಭ ಶಾಸ್ತ್ರಜ್ಞ ಡಾ. ಶ್ರೀನಿವಾಸ ರೆಡ್ಡಿ, ನೀರಾವರಿ ತಜ್ಞ ಡಾ. ರಾಜೇಂದ್ರ ಪೋದ್ದಾರ, ಪರಿಸರ ಅರ್ಥಶಾಸ್ತ್ರಜ್ಞ ಪಿ.ಎಂ. ಕುಮಾರಸ್ವಾಮಿ, ಶ್ರೀಮಠದ ಅಧ್ಯಕ್ಷ ವಿ.ಎನ್. ಹೆಗಡೆ ಬೊಮ್ನಳ್ಳಿ ಮತ್ತಿತರರು ಉಪಸ್ಥಿತರಿದ್ದರು. ಬೇಡ್ತಿ- ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ ಸ್ವಾಗತಿಸಿದರು. ಸಂಚಾಲಕ ಡಾ. ಕೇಶವ ಕೊರ್ಸೆ ಪ್ರಾಸ್ತಾವಿಕ ಮಾತನಾಡಿದರು. ಸುರೇಶ ಹಕ್ಕಿಮನೆ ನಿರೂಪಿಸಿದರು.