ರಾಣೀಕೆರೆ ಒತ್ತುವರಿ ಸರ್ವೆ ಕಾರ್ಯಕ್ಕೆ ಗ್ರಹಣ

-ಭರಮಸಾಗರ ಸರ್ವೆ ನಂಬರಿನ ಒತ್ತುವರಿ ಮಾತ್ರ ಪೂರ್ಣ । ಸರ್ವೆ ಕಾರ್ಯಕ್ಕೆ ಆಮೆ ನಡಿಗೆ । ಸರ್ವೆಯರ್ ಗಳ ನಿರಾಸಕ್ತಿ

ಜಡೇಕುಂಟೆ ಮಂಜುನಾಥ್

ಚಳ್ಳಕೆರೆ ತಾಲೂಕಿನ ಪ್ರಸಿದ್ಧ ಕೆರೆ ಎಂದೇ ಹೆಸರಾಗಿರುವ ಮೀರಾಸಾಬಿಹಳ್ಳಿ ರಾಣೀಕೆರೆಯ ಒತ್ತುವರಿ ಸರ್ವೆ ಕಾರ್ಯಕ್ಕೆ ಯಾಕೋ ಗ್ರಹಣ ಹಿಡಿದಂತಾಗಿದೆ.

ಆದರೆ, ದೊಡ್ಡೇರಿ, ಬೊಮ್ಮಸಮುದ್ರ, ಮೀರಾಸಾಬಿಹಳ್ಳಿ ಸರ್ವೆ ನಂಬರ್ ಗಳಲ್ಲಿ ಒತ್ತುವರಿ ಸರ್ವೆ ಅರೆಬರೆಯಾಗಿದೆ.

ಭರಮಸಾಗರ ಸರ್ವೆ ನಂಬರ್ ಒಂದರಲ್ಲೇ 9 ಕಡೆಗಳಲ್ಲಿ ಒತ್ತುವರಿ ಜಾಗ ಗುರುತಿಸಲಾಗಿತ್ತು. ಇದರಲ್ಲಿ 8 ಕಡೆ ಒತ್ತುವರಿ ತೆರವುಗೊಳಿಸಲಾಗಿದೆ. ಇನ್ನುಳಿದ ಮೂರು ಗ್ರಾಮಗಳ ಸರ್ವೆ ನಂಬರ್ ಗಳಲ್ಲಿ ಹಂಚಿ ಹೋಗಿರುವ ಕೆರೆಯ ಜಾಗದ ಸರ್ವೆ ಮಾಡಿ ಸ್ಕೆಚ್ ತಯಾರಿ ಮಾಡಿಕೊಡಲು ಹಿಂದೇಟು ಹಾಕುತ್ತಿರುವ ಸರ್ವೆ ಇಲಾಖೆಯವರು ಕಾರ್ಯ ಒತ್ತಡದ ಕಾರಣ ಮುಂದಿಡುತ್ತಿದ್ದಾರೆ ಎಂಬ ಮಾತುಗಳು ಕೇಳಿ ಬಂದಿವೆ.

ಮೈಸೂರಿನ ಅರಸ ಜಯಚಾಮರಾಜ ಒಡೆಯರ್ ತಮ್ಮ ರಾಣಿಯ ನೆನಪಿಗಾಗಿ 1907ರಲ್ಲಿ ನಿರ್ಮಾಣ ಮಾಡಿರುವ ತಾಲೂಕಿನ ಮೀರಾಸಾಬಿಹಳ್ಳಿ ಗ್ರಾಮದ ರಾಣೀಕೆರೆಗೆ ಬಹಳ ದಿನಗಳಿಂದಲೂ ಒತ್ತುವರಿಯ ಪೆಡಂಭೂತ ಹೆಗಲೇರಿದೆ. ಸುಮಾರು 2,500 ಎಕರೆ ಪ್ರದೇಶದಲ್ಲಿ ವಿಸ್ತರಿಸಿಕೊಂಡಿರುವ ರಾಣೀಕೆರೆಗೆ ಕಾಲಕ್ಕೆ ಸರಿಯಾಗಿ ಮಳೆ ಬಂದು ತುಂಬಿದರೆ ಸುತ್ತಲ ಸುಮಾರು 60 ಹಳ್ಳಿಗಳ ರೈತರಿಗೆ ಅನುಕೂಲವಾಗಲಿದೆ. ಅಂತರ್ಜಲ ಮಟ್ಟವೂ ಏರಿಕೆಯಾಗಿ ಪಂಪ್ ಸೆಟ್ ಗಳಲ್ಲಿ ನೀರಿನ ಒರತೆಗೆ ಕೊರತೆಯೇ ಆಗುವುದಿಲ್ಲ.

ಭದ್ರಾ ಮೇಲ್ದಂಡೆಯಲಿ ಎಲ್ಲ ಕೆರೆಗಳಿಗೆ ನೀರು ಬರುತ್ತಿವೆ. ಸರ್ವೆಕಾರ್ಯ ಮುಗಿಸಿ ಕೆರೆಗಳ ಹದ್ದು ಬಸ್ತು ನಿಗಧಿಯಾದಲ್ಲಿ ಭವಿಷ್ಯದಲ್ಲಿ ನೀರು ಸಂಗ್ರಹಣೆಗೆ ಅನುಕೂಲವಾಗುತ್ತವೆ. ಅಧಿಕಾರಿ ವರ್ಗದವರ ಕಿವಿಯೊಳಗೆ ಇಂತಹ ಕಾಳಜಿಗಳು ಮಾರ್ದನಿಸುವುದು ಯಾವಾಗ ಎಂಬ ಪ್ರಶ್ನೆಗಳು ಎದುರಾಗಿವೆ.

ಪೋಟೋ ಕ್ಯಾಪ್ಸನ್