ಸದಸ್ಯರೇ ಇಲ್ಲದಿದ್ದರೂ ಮೀಸಲಾತಿ ಭಾಗ್ಯ!

ಶ್ರೀನಿವಾಸ ಬಬಲಾದಿ

ಲೋಕಾಪುರ ಪಪಂ ಆಗಿ ಮೂರು ವರ್ಷ ಕಳೆದಿದೆ. ಹೀಗಾಗಿ ಇನ್ನುವರೆಗೂ ಒಮ್ಮೆಯೂ ಚುನಾವಣೆ ನಡೆದು ಸದಸ್ಯರು ಆಯ್ಕೆ ಆಗಿಲ್ಲ. ಹೀಗಿದ್ದರೂ ಸರ್ಕಾರ ಲೋಕಾಪುರ ಪಪಂಗೆ ಅಧ್ಯಕ್ಷ ಹಾಗೂ ಉಪಾಧ್ಯಕ್ಷ ಸ್ಥಾನ ಮೀಸಲು ಘೋಷಿಸಿ ಅಚ್ಚರಿ ಮೂಡಿಸಿದೆ.

ಮೂರು ವರ್ಷಗಳ ಹಿಂದೆ ಮೇಲ್ದರ್ಜೆಗೇರಿದ ಲೋಕಾಪೂರ ಪಟ್ಟಣ ಪಂಚಾಯತಗೆ ಚುನಾವಣೆ ನಡೆಸುವುದು ಪ್ರಾರಂಭದಲ್ಲಿ ವಾರ್ಡ್‌ ವಿಂಗಡನೆ ನೆಪ ಒಡ್ಡಿ ಚುನಾವಣೆ ಪ್ರಕ್ರಿಯೆಗೆ ವಿಳಂಬವಾಗಿತ್ತು. ಈ ಸಮಸ್ಯೆ ಪರಿಹಾರಗೊಂಡು ಎರಡುವರೆ ವರ್ಷ ಕಳೆದರೂ ಸ್ಥಳೀಯ ಶಾಸಕರ ಹಾಗೂ ಸಂಬಂಧಿಸಿದ ಅಧಿಕಾರಿಗಳ ಇಚ್ಚಾಶಕ್ತಿ ಕೊರತೆಯಿಂದ ಪಟ್ಟಣ ಪಂಚಾಯತ ಚುನಾವಣೆ ಪ್ರಕ್ರಿಯೆಗೆ ವಿಳಂಭವೇ ಕಾರಣ ಎನ್ನಲಾಗಿದೆ.

ಪಟ್ಟಣ ಪಂಚಾಯಿತಿ ಚುನಾವಣೆ ತಯಾರಿಯಲ್ಲಿರುವ ಆಕಾಂಕ್ಷಿಗಳಿಗೆ ಚುನಾವಣೆ ನಡೆಯದಿರುವುದು ನಿರಾಸೆ ಉಂಟು ಮಾಡಿದೆ. ಏಕೆಂದರೆ ಪಟ್ಟಣ ಪಂಚಾಯತಿ ಚುನಾವಣೆಯಲ್ಲಿ ಹೇಗಾದರೂ ಮಾಡಿ ವಿಜಯಶಾಲಿ ಆಗಬೇಕೆಂಬ ಕನಸು ಹೊತ್ತು ಸಾಕಷ್ಟು ಆಕಾಂಕ್ಷಿಗಳು ಪಪಂ ಆದಾಗಿನಿಂದ ಆಯಾ ವಾರ್ಡ್‌ಗಳ ಸಾರ್ವಜನಿಕರೊಂದಿಗೆ ಆಗು ಹೋಗಳೊಂದಿಗೆ ಸಾರ್ವಜನಿಕರಿಗೆ ಸ್ಫಂದಿಸುವ ಮೂಲಕ ತಯಾರಿಯಲ್ಲಿ ತೊಡಗಿದ್ದಾರೆ. ಚುನಾವಣೆ ಎದುರಿಸಲು ಸಿದ್ಧರಿರುವ ಇವರಿಗೆ ಚುನಾವಣೆ ನಡೆಯದಿರುವುದು ನಿರಾಸೆ ಉಂಟು ಮಾಡಿದೆ.

ಪಟ್ಟಣ ಪಂಚಾಯಿತಿಗೆ ಆಡಳಿತ ಮಂಡಳಿ ನಿರ್ಮಾಣವಾಗದ ಕಾರಣ ಪಟ್ಟಣದ ಅಭಿವೃದ್ಧಿ ಕಾರ್ಯಗಳು ಮಂದಗತಿಯಲ್ಲಿ ಸಾಗಿವೆ. ಅಧಿಕಾರಿಳಿಗೆ ಸ್ಥಳೀಯ ಸದಸ್ಯರ ಸೂಕ್ತ ಮಾರ್ಗದರ್ಶನ ಸಿಕ್ಕರೆ ಅಭಿವೃದ್ಧಿಗೆ ಹೆಚ್ಚಿನ ವೇಗ ದೊರೆಯುತ್ತದೆ. ಆದರಿಂದ್ದ ಪಟ್ಟಣ ಪಂಚಾಯಿತಿಗೆ ಶೀಘ್ರ ಚುನಾವಣೆ ನಡೆದರೆ ಒಳ್ಳೆಯದು ಎನ್ನುತ್ತಾರೆ ಪಟ್ಟಣದ ಸಾರ್ವಜನಿಕರು.

ಸದಸ್ಯರೇ ಆಯ್ಕೆಯಾಗದ ಪಟ್ಟಣ ಪಂಚಾಯತಗೆ ಮೀಸಲು ಪ್ರಕಟಣೆ ಒಂದೆಡೆ ಆದರೆ ಪಕ್ಕದ ಲೋಕಾಪುರ ಪಂಚಾಯತನ್ನು ಮೇಲ್ದರ್ಜೆಗೇರಿಸಲು ಪಕ್ಕದ ಲಕ್ಷಾನಟ್ಟಿ ಗ್ರಾಮ ಪಂಚಾಯತ ವ್ಯಾಪ್ತಿಯ ಎರಡು ಗ್ರಾಮಗಳನ್ನು ಸೇರ್ಪಡೆ ಆಗಿದ್ದರಿಂದ ಆ ಗ್ರಾಮ ಪಂಚಾಯತನ ಚುನಾವಣೆಗೆ ವಿಳಂಬವಾಗಿದೆ. ಅಲ್ಲಿಯ ಅಭಿವೃದ್ಧಿ ಕಾರ್ಯಗಳಿಗೂ ಹಿನ್ನಡೆ ಉಂಟಾಗಿದೆ.

----

ನಮ್ಮಲ್ಲಿ ಇನ್ನೂವರೆಗೂ ಚುನಾವಣೆ ನಡದೆ ಇಲ್ಲ. ಈ ಮೀಸಲು ನಮಗೆ ಅನ್ವಯಿಸುವುದಿಲ್ಲ. ಜಿಲ್ಲಾ ಉಸ್ತುವಾರಿ ಸಚಿವರ ಜೊತೆ ಮಾತನಾಡಿ ಪಪಂ ಚುನಾವಣೆಗೆ ಮನವಿ ಮಾಡಲಾಗುವುದು.

---

-ಯಮನಪ್ಪ ಹೊರಟ್ಟ, ಬಿಜೆಪಿ ಹಿರಿಯ ಮುಖಂಡ