ಮಳೆ ಇಲ್ಲದಿದ್ದರೂ ಬಂತು ಕೆರೆಗೆ ನೀರು

- ತಾಲೂಕಿನಲ್ಲಿಯೇ ದೊಡ್ಡದಾದ ಕೆರೆ

- ಭರಪೂರ ಮಳೆಯಾದರೂ ಬಂದಿರಲಿಲ್ಲ ಕೆರೆಗೆ ನೀರು

ತಾಲೂಕಿನ ಹೊಸಳ್ಳಿ ಕೆರೆಗೆ ಬಿರು ಬೇಸಿಗೆಯಲ್ಲಿಯೂ ನೀರು ಬರುತ್ತಿದ್ದು, ಹೊಸಳ್ಳಿ ಗ್ರಾಮಸ್ಥರ ಸಂತಸಕ್ಕೆ ಪಾರವೇ ಇಲ್ಲದಂತೆ ಆಗಿದೆ.

ಪೂಜೆ ಮಾಡಿದ ಗ್ರಾಮಸ್ಥರು:

ನವಕಲ್ ಏತನೀರಾವರಿ ಯೋಜನೆಯ ಮೂಲಕ ಪಂಪ್‌ನಲ್ಲಿ ಲಿಫ್ಟ್‌ ಮಾಡಿದ ನೀರನ್ನು ಕೆರೆ ತುಂಬಿಸಲು ಹರಿಸಲಾಗುತ್ತಿದ್ದು, ಭಾನುವಾರ ರಾತ್ರಿಪೂರ್ತಿ ನೀರು ಹರಿಯುತ್ತಿರುವುದನ್ನು ಕಂಡು ಗ್ರಾಮಸ್ಥರು ತಾವೇ ಸ್ವಯಂ ಪ್ರೇರಿತವಾಗಿ ಗಂಗಾಮಾತೆಯ ಪೂಜೆ ಮಾಡಿದ್ದಾರೆ.

ಕೆರೆಯಲ್ಲಿ ನೀರು ತುಂಬಿದರೆ ಸುತ್ತಮುತ್ತಲು ಬೋರವೆಲ್ ರಿಚಾರ್ಜ್ ಆಗುತ್ತವೆ. ಇದರಿಂದ ನಮಗೆ ಬಹಳ ಅನುಕೂಲವಾಗುತ್ತದೆ ಎಂದು ಖುಷಿಪಡುತ್ತಿದ್ದಾರೆ.

ಹೊಸಳ್ಳಿ ಕೆರೆ ಬರೋಬ್ಬರಿ 80 ಎಕರೆ ವಿಶಾಲವಾಗಿದ್ದು, ಇದರಿಂದ ಈ ಮೊದಲು ನೂರಾರು ಎಕರೆ ಪ್ರದೇಶ ನೀರಾವರಿಯಾಗುತ್ತಿತ್ತು. ಆದರೆ, ಕಾಲಕ್ರಮೇಣ ಅದರ ಜಲಾನಯನ ಪ್ರದೇಶ ಇಲ್ಲದಂತೆ ಆಗಿರುವುದರಿಂದ ನೀರು ಬರುತ್ತಿಲ್ಲ. ಹೀಗಾಗಿ, ಈ ಕೆರೆ ಬಣಗುಡುತ್ತಿತ್ತು. ಈಗ ತುಂಗಭದ್ರಾ ನದಿಯಿಂದ ಏತನೀರಾವರಿ ಯೋಜನೆಯ ಮೂಲಕ ಭರ್ತಿ ಮಾಡುತ್ತಿರುವುದರಿಂದ ಹೊಸಳ್ಳಿ ಸೇರಿದಂತೆ ಸುತ್ತಮುತ್ತಲ ಗ್ರಾಮಸ್ಥರು ಖುಷಿಯಾಗಿದ್ದಾರೆ.

ಈ ಕೆರೆಯನ್ನು ಈ ಹಿಂದೆ ಹಿರೇಹಳ್ಳ ಜಲಾಶಯದ ಕಾಲುವೆ ಮೂಲಕ ಭರ್ತಿ ಮಾಡಲಾಗಿದ್ದು, ಆಗ ಶಾಸಕರಾಗಿದ್ದ ಕೆ. ಬಸವರಾಜ ಹಿಟ್ನಾಳ ಮುತುವರ್ಜಿ ವಹಿಸಿ, ಕೆರೆ ಭರ್ತಿ ಮಾಡಿಸಿದ್ದರು. ಆದರೆ, ನಂತರ ಹಿರೇಹಳ್ಳ ಜಲಾಶಯದಿಂದ ಕಾಲುವೆಗಳಿಗೆ ನೀರೇ ಬರಲಿಲ್ಲವಾದ್ದರಿಂದ ಕೆರೆಯೂ ಪಾಳು ಬಿದ್ದಂತೆ ಆಯಿತು.

ಹೊಸಳ್ಳಿ ಕೆರೆಯ ಹೂಳು ತೆಗೆಯಲು ಕೋಟ್ಯಂತರ ರುಪಾಯಿ ವ್ಯಯ ಮಾಡಲಾಗಿದೆ. ಬಹದ್ದೂರುಬಂಡಿ, ಹಿಟ್ನಾಳ ಹಾಗೂ ಹಿರೇಬಗನಾಳ ಗ್ರಾಮ ಪಂಚಾಯಿತಿಯಿಂದ ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಪ್ರತಿ ವರ್ಷವೂ ಕೆರೆಯ ಹೂಳು ತೆಗೆಯುವ ಕಾರ್ಯಕ್ರಮಗಳನ್ನು ಹಾಕಿಕೊಳ್ಳಲಾಗುತ್ತದೆ.