ಸಮೃದ್ಧವಾಗಿ ಬೆಳೆದ ತೊಗರಿ, ಕೀಟ ನಿರ್ವಹಣೆಗೆ ಖರ್ಚು

ಪಾಲಾಕ್ಷ ಬಿ. ತಿಪ್ಪಳ್ಳಿ

ಯಲಬುರ್ಗಾ ಹಾಗೂ ಕುಕನೂರು ತಾಲೂಕಿನಲ್ಲಿ ಅಂದಾಜು ೭೨೨೦ ಹೆಕ್ಟೇರ್ ಪ್ರದೇಶದಲ್ಲಿ ತೊಗರಿ ಬಿತ್ತನೆಯಾಗಿದೆ. ಈ ಮುಂಚೆ ರೈತರು ತೊಗರಿಯನ್ನು ಕೇವಲ ಅಕ್ಕಡಿ ಸಾಲಿನಲ್ಲಿ ಬೆಳೆಯುತ್ತಿದ್ದರು. ಇತ್ತೀಚಿನ ವರ್ಷಗಳಲ್ಲಿ ತೊಗರಿಗೆ ಉತ್ತಮ ಬೆಲೆ ಸಿಗುತ್ತಿದ್ದು, ಇಡಿಯಾಗಿ ಬಿತ್ತನೆ ಮಾಡುವವರ ಸಂಖ್ಯೆ ಹೆಚ್ಚಾಗಿದೆ. ಹೀಗಾಗಿ ತೊಗರಿ ಬಿತ್ತನೆ ಕ್ಷೇತ್ರ ವಿಸ್ತರಣೆಗೊಳ್ಳುತ್ತಿದೆ. ತೊಗರಿ ಕೆಲ ಕಡೆ ಹೂವು, ಚಟ್ಟಿ ಇದ್ದರೆ ಇನ್ನೂ ಕೆಲವೆಡೆ ಬೇಗ ಬಿತ್ತನೆಗೊಂಡ ತೊಗರಿ ಕಾಯಿ ಕಟ್ಟುವ ಹಂತದಲ್ಲಿದ್ದು, ಬೆಳೆಯಲ್ಲಿ ಕಂಡು ಬರುವ ಕೀಟವು (ಕಾಯಿಕೊರಕ) ಕಾಯಿ ಮತ್ತು ಹೂವನ್ನು ಹಾನಿ ಮಾಡುತ್ತದೆ. ಇದರ ನಿರ್ವಹಣೆಗೆ ರೈತರು ಮುಂಜಾಗ್ರತೆಯಿಂದ ಔಷಧ ಸಿಂಪಡಣೆ ಮಾಡುವ ಮೂಲಕ ಬೆಳೆಯನ್ನು ಸಮೃದ್ಧವಾಗಿ ಬೆಳೆಸಲು ಮುಂದಾಗಿದ್ದಾರೆ.

ತೊಗರಿಗೆ ಕಾಯಿಕೊರಕ ಲಕ್ಷಣ: ಕಾಯಿಕೊರಕ ಕೀಟವು ತೊಗರಿಕಾಯಿ ಮತ್ತು ಹೂವು ಹಾನಿ ಮಾಡುತ್ತದೆ. ಹೆಣ್ಣು ಪತಂಗವು ತೊಗರಿ ಮೊಗ್ಗು, ಕುಡಿ, ಹೂವು, ಅಥವಾ ಎಳೆಕಾಯಿಗಳ ಮೇಲೆ ಸಾವಿರಾರು ಮೊಟ್ಟೆಗಳನ್ನು ಬಿಡಿಬಿಡಿಯಾಗಿ ಇಡುತ್ತದೆ. ಅದರಿಂದ ಹೊರಬರುವ ಮರಿಹುಳುಗಳು ಮೊದಲಿಗೆ ಹಸಿರು ಭಾಗ ಕೆರೆದು ತಿನ್ನುತ್ತವೆ. ಆನಂತರ ಹೂವು, ಮೊಗ್ಗು ಮತ್ತು ಕಾಯಿ ಕೊರೆಯಲು ಪ್ರಾರಂಭಿಸುತ್ತವೆ. ಇದರಿಂದ ಇಳುವರಿ ಕಡಿಮೆಯಾಗುತ್ತದೆ.

ತಾಲೂಕಿನಲ್ಲಿ ಮುಂಗಾರಿನಲ್ಲಿ ಬಿತ್ತನೆಗೊಂಡ ತೊಗರಿ ಬೆಳೆ ಹೂವು, ಕಾಯಿ ಕಟ್ಟುವ ಹಂತದಲ್ಲಿದೆ. ರೈತರು ಮುಂಜಾಗ್ರತಾ ಕ್ರಮವಾಗಿ ಬೆಳೆಯಲ್ಲಿನ ಕೀಟ ನಿರ್ವಹಣೆಗೆ ಮೋಹಕ ಬಲೆ ಅಳವಡಿಸಬೇಕು. ಅಲ್ಲದೆ ರೈತ ಸಂಪರ್ಕ ಕೇಂದ್ರಗಳಲ್ಲಿ ದೊರೆಯುವ ಕೀಟನಾಶಕ ಸಿಂಪಡಿಸುವುದರಿಂದ ಸಮಗ್ರ ಪೀಡೆ ನಿರ್ವಹಣೆ ಮಾಡಬಹುದು ಎಂದು ಯಲಬರ್ಗಾ ಸಹಾಯಕ ಕೃಷಿ ನಿರ್ದೇಶಕ ಪ್ರಮೋದ ತುಂಬಳ ಹೇಳಿದರು.