ಮಲೆಯೂರಿನಲ್ಲಿ ವಿಜೃಂಭಣೆಯ ಸೋಮೇಶ್ವರ ‌ರಥೋತ್ಸವ

ಚಾಮರಾಜನಗರ: ಹರವೆಹೋಬಳಿ ಮಲೆಯೂರು ಗ್ರಾಮದಲ್ಲಿ ಮಂಗಳವಾರ ಸೋಮೇಶ್ವರ ರಥೋತ್ಸವ ವಿಜೃಂಭಣೆಯಿಂದ ನೆರವೇರಿತು.

ಉದ್ಘೋಷಗಳೊಂದಿಗೆ ರಥ ಎಳೆಯುವ ಕಾರ್ಯ ಆರಂಭವಾಯಿತು, ಗ್ರಾಮದ ಪ್ರತಿ ಮನೆಯವರು ರಥಕ್ಕೆ ಪೂಜೆ ಸಲ್ಲಿಸಿದರು. ರಥೋತ್ಸವದಲ್ಲಿ ನಂದಿಕಂಬ, ಸತ್ತಿಗೆ ಸೂರಪಾಣಿ, ಕಂಸಾಳೆ ಕಲಾವಿದರು ಭಾಗವಹಿಸಿದ್ದರು. ಗ್ರಾಮದೇವತೆ ಮಾರಮ್ಮ ತಾಯಿಗೆ ಚಿನ್ನದ ಆಭರಣ ತೊಡಿಸಲಾಗಿತ್ತು. ಮದುವೆಯಾದ ನವದಂಪತಿಗಳು ರಥಕ್ಕೆ ಹಣ್ಣು ಜವನ ಎಸೆದು, ಇಷ್ಟಾರ್ಥ ಸಿದ್ಧಿಗಾಗಿ ಪ್ರಾರ್ಥಿಸಿದರು. ಬಿಸಿಲಿನ ಝಳದ ಹಿನ್ನೆಲೆ ಎಳೆನೀರು, ಕಲ್ಲಂಗಡಿಹಣ್ಣು, ತಂಪುಪಾನೀಯಗಳಿಗೆ ಬೇಡಿಕೆ ಹೆಚ್ಚಾಗಿತ್ತು. ಜಿಲ್ಲೆಯ ವಿವಿಧ ತಾಲೂಕಿನ ಭಕ್ತಾದಿಗಳು ಮಾರಮ್ಮನ ಜಾತ್ರಾ ಅಂಗವಾಗಿ ನಡೆದ ಸೋಮೇಶ್ವರ ರಥೋತ್ಸವದಲ್ಲಿ ಭಾಗಿಯಾಗಿದ್ದರು.