ಬರಗಾಲದಲ್ಲೂ ₹3 ಲಕ್ಷದ ಈರುಳ್ಳಿ ಬೆಳೆದ ರೈತ

ಉತ್ತಮ ಆದಾಯ ಗಳಿಕೆ । ರೈತನ ಮೊಗದಲ್ಲಿ ನಗು

ಪ್ರಸಕ್ತ ವರ್ಷ ಬರಗಾಲದದಿಂದ ರೈತ ಸಮುದಾಯ ಸಂಕಷ್ಟಕ್ಕೆ ಸಿಲುಕಿದೆ. ಇದರ ನಡುವೆಯೂ ಅಲ್ಪಸ್ವಲ್ಪ ಮಳೆಗೆ ಯುವ ರೈತರೊಬ್ಬರು 1 ಎಕರೆ 20 ಗುಂಟೆ ಜಮೀನಿನಲ್ಲಿ ₹3 ಲಕ್ಷದ ಈರಳ್ಳಿ ಬೆಳೆದು ಗಮನ ಸೆಳೆದಿದ್ದಾರೆ.

ಪ್ರಸಕ್ತ ವರ್ಷ ಮುಂಗಾರು ಹಂಗಾಮಿನಲ್ಲಿ ಅಲ್ಪಸ್ವಲ್ಪವಾದ ರೋಹಿಣಿ ಮಳೆಗೆ 6 ಕೆಜಿ ಈರುಳ್ಳಿ ಬೀಜ ಬಿತ್ತನೆ ಮಾಡಿ 50 ಕೆಜಿಯ 2 ಪ್ಯಾಕೇಟ್‌ ಗೊಬ್ಬರ ಹಾಕಿದ್ದಾರೆ. ನಾಲ್ಕು ಬಾರಿ ಕಳೆ ತೆಗಿಸಿ, 3 ಬಾರಿ ಔಷಧ ಸಿಂಪಡಣೆ ಮಾಡಿ ಒಂದು ಬಾರಿ ಮಾತ್ರ ಮಲಪ್ರಭೆ ಕಾಲುವೆ ನೀರನ್ನು ಈ ಬೆಳೆಗೆ ನೀಡಿದ್ದಾರೆ. ಒಟ್ಟು 180 ಚೀಲ ಈರುಳ್ಳಿ ಬೆಳೆದಿದ್ದಾರೆ.

ಪ್ರತಿ ಚೀಲದಲ್ಲಿ 50ರಿಂದ 55 ಕೆಜಿ ಈರುಳ್ಳಿ ಇರುವುದರಿಂದ ಒಟ್ಟು ಸುಮಾರು 120 ಕ್ವಿಂಟಲ್ ಈರುಳ್ಳಿಯನ್ನು ಮಾರಾಟ ಮಾಡಿ ಬರಗಾಲದ ಮಧ್ಯೆಯೂ ₹3 ಲಕ್ಷ ಆದಾಯ ಗಳಿಸಿದ್ದಾರೆ.

ಬಂಪರ್‌ ಬೆಲೆ:

ಬರಗಾಲದ ಪರಿಸ್ಥಿತಿಯಲ್ಲಿ ಮಳೆ ಕೊರತೆ, ನೀರಿನ ಅಭಾವ, ಗೊಬ್ಬರ, ಔಷಧ ಹಾಗೂ ಕೂಲಿ ವೆಚ್ಚಗಳು ರೈತರಿಗೆ ಇಂದಿನ ದಿನಗಳಲ್ಲಿ ಸವಾಲಾಗಿವೆ. ಇಂತಹ ಪ್ರತಿಕೂಲ ಪರಿಸ್ಥಿತಿಯಲ್ಲೂ ಉತ್ತಮ ಇಳುವರಿ ಪಡೆಯುವ ಮೂಲಕ ಈ ರೈತ ಎಲ್ಲರ ಗಮನ ಸೆಳೆದಿದ್ದಾನೆ.ಪ್ರತಿ ವರ್ಷ ನಾನು ಮುಂಗಾರು ಹಂಗಾಮಿನಲ್ಲಿ ಈರಳ್ಳಿ ಬಿತ್ತನೆ ಮಾಡುತ್ತೇನೆ. ಆದರೆ ಕೆಲವು ವರ್ಷಗಳಲ್ಲಿ ಈ ಬೆಳೆಗೆ ಯೋಗ್ಯ ಬೆಲೆ ಸಿಗದೆ ಜಮೀನಿನಲ್ಲಿ ರೋಟರ್‌ ಹೊಡೆದು ಗೊಬ್ಬರ ಮಾಡಿ ಸಾಕಷ್ಟು ನಷ್ಟವಾಗಿತ್ತು. ಆದರೆ ಈ ವರ್ಷ ಬರಗಾಲದ ಮಧ್ಯೆ ಉತ್ತಮ ಇಳುವರಿ ಬಂದಿದ್ದು, ಸಂತೋಷ ತಂದಿದೆ.