ಕಾಲುವೆ ಸ್ವಚ್ಛಗೊಳಿಸಿ ನೀರು ಹರಿಸುವಂತೆ ರೈತರ ಆಗ್ರಹ

ಕನ್ನಡಪ್ರಭ ವಾರ್ತೆ ಗೌರಿಬಿದನೂರು

ಹಸಿರುಪಡೆ ರೈತ ಮುಖಂಡ ಸೋಮಶೇಖರಗೌಡ ಮಾತನಾಡಿ, ಬಯಲುಸೀಮೆ ಭಾಗದಲ್ಲಿ ಎರಡು ವರ್ಷಗಳ ನಂತರ ನದಿ ತುಂಬಿ ಹರಿಯುತ್ತಿದೆ, ಇಲ್ಲಿ ಹರಿಯುವ ನೀರು ಈ ಭಾಗದ ಮರಳೂರು, ಇಡಗೂರು, ಚಂದನದೂರು, ಯಾಕಾರ್ಲಾಹಳ್ಳಿ, ಕಡಗತ್ತೂರು, ತಿಂಗಳೂರು ಮುಂತಾದ ಕೆರೆಗಳ ಜೀವನಾಡಿಯಾಗಿದೆ. ಆದರೆ ಅಧಿಕಾರಿಗಳ ನಿರ್ಲಕ್ಷ್ಯದಿಂದ, ಕಿಂಡಿ ಅಣೆಕಟ್ಟಿಗೆ ಅಳವಡಿಸಿರುವ ಹಲಗೆಗಳ ಕಣ್ಣುಗಳು ಸಂಪೂರ್ಣವಾಗಿ ಹಾಳಾಗಿದ್ದು, ಹರಿದು ಬರುತ್ತಿರುವ ನೀರೆಲ್ಲ ಪಕ್ಕದ ರಾಜ್ಯದ ಪಾಲಾಗುತ್ತಿದೆ ಮತ್ತು ಕೆರೆಗೆ ಸಂಪರ್ಕ ಕಲ್ಪಿಸುವ ಕಾಲುವೆಯನ್ನು ದುರಸ್ತಿಗೊಳಿಸದೇ ಇರುವುದರಿಂದ ಕಾಲುವೆಯಲ್ಲಿ ಗಿಡ, ಗಂಟೆಗಳು, ಪ್ಲಾಸ್ಟಿಕ್ ಬಾಟಲಿ ಮತ್ತು ತ್ಯಾಜದಿಂದ ತುಂಬಿಕೊಂಡು ನೀರು ಸರಾಗವಾಗಿ ಹರಿಯಲು ಸಾದ್ಯವಾಗುತ್ತಿಲ್ಲ. ಇದರಿಂದ ಇಲ್ಲಿನ ರೈತರಿಗೆ ಅನ್ಯಾಯವಾಗುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳು ಕಾಲುವೆಯಲ್ಲಿನ ಗಿಡ- ಗಂಟೆಗಳು, ತ್ಯಾಜ್ಯವನ್ನು ಆಗಿಂದಾಗ್ಗೆ ಸ್ವಚ್ಛಗೊಳಿಸಬೇಕಿತ್ತು. ರಾಜ್ಯಾದ್ಯಂತ ಸತತವಾಗಿ ಮಳೆ ಸುರಿಯುತ್ತಿದ್ದರೂ ನೀರು ಕಾಲುವೆಯಲ್ಲಿ ಸರಾಗವಾಗಿ ಹರಿಯಲಾಗುತ್ತಿಲ್ಲ ಎಂಬುದು ರೈತರ ಆಕ್ರೋಶದ ಮಾತಾಗಿದೆ.

ಪ್ರತಿಭಟನೆಯಲ್ಲಿ ಜಿಲ್ಲಾ ಪಂಚಾಯಿತಿ ಮಾಜಿ ಅಧ್ಯಕ್ಷ ನರಸಿಂಹಮೂರ್ತಿ, ಹಸಿರು ಪಡೆ ರೈತರಾದ ನಾಗಣ್ಣ, ಉಮಾಶಂಕರ್, ಮಂಜುನಾಥ್, ಸೋಮಶೇಖರ್ ಗೌಡ, ಪ್ರಸನ್ನ ಕುಮಾರ್, ಸುರೇಶ, ಚಂದ್ರ, ರಾಮೇಗೌಡ, ಲಕ್ಷ್ಮೀಪತಿ, ರಾಘವೇಂದ್ರ ಸೇರಿದಂತೆ 150ಕ್ಕೂ ಹೆಚ್ಚಿನ ರೈತರು ಪಾಲ್ಗೊಂಡಿದ್ದರು.