ಬಲ್ದೋಟಾ ಕಾರ್ಖಾನೆ ವಿರುದ್ಧ ರೈತರ ರಣಾಕ್ರೋಶ

ಕೊಪ್ಪಳ: ನಗರದಲ್ಲಿ ಮಂಗಳವಾರ ನಡೆದ ೪೬ನೇ ರೈತ ಹುತಾತ್ಮ ದಿನಾಚರಣೆ ಸಂದರ್ಭದಲ್ಲಿ ಬಲ್ಡೋಟಾದ ವಶದಲ್ಲಿರುವ ಬಸಾಪುರ ಕೆರೆ ಸಾರ್ವಜನಿಕರಿಗೆ ಮುಕ್ತಗೊಳಿಸಬೇಕೆಂದು ಒತ್ತಾಯಿಸಿ ನಡೆದ ಪ್ರತಿಭಟನೆ ತೀವ್ರ ಸ್ವರೂಪ ಪಡೆದು, ಹಿಂಸಾಚಾರಕ್ಕೆ ತಿರುಗಿದ್ದು, ರೈತರು ಬಲ್ದೋಟಾ ಕಾರ್ಖಾನೆಯ ತಡೆಗೋಡೆ ಒಡೆದು ಕಬ್ಬಿಣದ ಬೃಹತ್ ಗೇಟ್ ಸಹ ಮುರಿದು ಕಾರ್ಖಾನೆ ಒಳ ಪ್ರವೇಶಿದರು. ರೈತನೊಬ್ಬ ನಮಗೆ ಕೆರೆ ಬೇಕೆ ಬೇಕು ಎಂದು ಕೆರೆಗೆ ಹಾರಿದ ಪ್ರಸಂಗ ಜರುಗಿತು.

ಬಲ್ಡೋಟಾ ಕಾರ್ಖಾನೆಯ ವಶದಲ್ಲಿದ್ದ ೪೪ ಎಕರೆ ಪ್ರದೇಶದ ಬಸಾಪುರ ಬಳಿಯನ್ನು ಸಾರ್ವಜನಿಕರಿಗೆ ಮುಕ್ತಿಗೊಳಿಸುವಂತೆ ಒತ್ತಾಯಿಸಿ ಸಾವಿರಾರು ರೈತ ರು ಕಾರ್ಖಾನೆಯ ಸಿಮೆಂಟ್‌ ಕಂಪೌಂಡ್ ದ್ವಂಸ ಮಾಡಿ, ಕಾರ್ಖಾನೆ ಗೇಟ್ ಮುರಿದು ಕೆರೆಗೆ ನುಗ್ಗಿ ಆಕ್ರೋಶ ವ್ಯಕ್ತಪಡಿಸಿದರು. ಇವರನ್ನು ನಿಯಂತ್ರಿಸಲು ಹಾಗೂ ತಡೆಯಲು ಪೊಲೀಸರು ಹರಸಾಹಸ ಪಡಬೇಕಾಯಿತು.

ಬಸಾಪುರ ಕೆರೆ ಮುಕ್ತಗೊಳಿಸಿ: ಬಸಾಪುರ ಕೆರೆ ನಮ್ಮ ಹಕ್ಕು, ಅದು ಸಾರ್ವಜನಿಕ ಕೆರೆ, ಬಲ್ಡೋಟಾ ಕಾರ್ಖಾನೆ ವಶದಲ್ಲಿಟ್ಟುಕೊಂಡಿದೆ. ಕೆರೆ ನೀರು ಬಳಕೆಗೆ ರೈತರಿಗೆ ಅವಕಾಶ ಮಾಡಿಕೊಡುತ್ತಿಲ್ಲ. ಕೆರೆ ಸಾರ್ವಜನಿಕ ಮುಕ್ತಿಗೊಳಿಸಿ ಎಂದು ಪೊಲೀಸ್ ಭದ್ರತೆಯ ನಡುವೆಯೂ ಏಕಕಾಲಕ್ಕೆ ಸಾವಿರಾರು ರೈತರು, ರೈ ಮಹಿಳೆಯರು ಕಾಂಪೌಂಡ್‌ ಹಾಗೂ ಗೇಟ್‌ ಮುರಿದು ನುಗ್ಗಿದರು. ಕಾರ್ಖಾನೆ ಒಳಗೆ ಇದ್ದ ಕೆರೆಯತ್ತ ಧಾವಿಸಿದ ಸಾವಿರಾರು ರೈತರು ಜೈಕಾರದ ಘೋಷಣೆ ಕೂಗಿ ಸಂಭ್ರಮಿಸಿ ಅಲ್ಲಿಯೇ ಕುಣಿದು ಕುಪ್ಪಳಿಸಿದರು.

ಕೆರೆಗೆ ಹಾರಿದ ರೈತ: ಬಲ್ಡೋಟಾ ವಶಪಡಿಸಿಕೊಂಡಿರುವ ಕೆರೆ ರೈತರ ಕೆರೆ. ಅದನ್ನು ರೈತರ ಬಳಕೆಗೆ ನೀಡಬೇಕು ಎಂದು ಕೆರೆಗೆ ರೈತ ಯಮನೂರಪ್ಪ ಎಂಬಾತ ಹಾರಿದರು. ಸ್ಥಳೀಯ ರೈತರು ಆತನನ್ನು ರಕ್ಷಿಸಿದರು. ನಂತರ ಮಾತನಾಡಿದ ಯಮನೂಪ್ಪ, ಗಿಣಿಗೇರೆಯ ಕೆರೆ ನೀರು ಕುಡಿಯಬೇಕು ಎಂಬ ಆಸೆ. ಆ ಕೆರೆ ನೀರು ಕುಡಿದು ಬೆಳೆದಿದ್ದೇವೆ. ಜಾನುವಾರುಗಳಿಗೆ ಸಹ ಕೆರೆ ನೀರನ್ನು ಕುಡಿಸುತ್ತಾ ಬಂದಿದ್ದೇವೆ. ಕೆರೆ ನೀರು ನಮಗೆ ಅಮೃತ. ಆದರೆ ಕಾರ್ಖಾನೆ ಅವರಿಂದ ಕೆರೆಗೆ ಹೋಗಲು ಅವಕಾಶ ಇಲ್ಲ. ಹಾಗಾಗಿ ಕೆರೆಗೆ ಹಾರಿದ್ದೇನೆ. ಸತ್ತರೆ ಸಾಯ್ತಿದ್ದೆ. ಆದರೆ ನಮ್ಮ ರೈತರಿಗೆ, ರೈತರ ಜಾನುವಾರುಗಳಿಗೆ ಕೆರೆ ಬೇಕೆ ಬೇಕು ಎಂದರು.

ಒಳ ನುಗ್ಗಿ ಕುಣಿದ ರೈತರು: ಕಾರ್ಖಾನೆಯ ಗೋಡೆ ಒಡೆದು ಒಳಗೆ ನುಗ್ಗಿದ ಖುಷಿಯಲ್ಲಿ ರೈತರು ಕುಣಿದು ಕುಪ್ಪಳಿಸಿದರು. ಬಲ್ದೋಟಾ ತೊಲಗಿಸಲೇ ಬೇಕು. ಈ ಕಾರ್ಖಾನೆ ನಮಗೆ ಬೇಡ. ನಮ್ಮ ಕೆರೆ ನಮಗೆ ನೀಡಿ ಎಂದು ಗೋಡೆ ಒಡೆದು ಗೇಟ್ ಮುರಿದು ಒಳ ನುಗ್ಗಿದ ರೈತರು ಹರ್ಷದಿಂದ ಕುಣಿದರು.