ರೈತರ ಆದಾಯ ಹೆಚ್ಚಳ ಮಾಡಲು ಸಾವಯವ ಕೃಷಿ ಅವಶ್ಯ: ಕೃಷಿ ವಿವಿ ಕುಲಪತಿ ಡಾ.ಸುರೇಶ್‌

ಪ್ರಮಾಣಪತ್ರ ವಿತರಣೆ । ನಬಾರ್ಡ್ ಪ್ರಾಯೋಜಿತ ಸಾವಯವ ಅರಿಶಿಣ ಬೇಸಾಯ ಪ್ರಾತ್ಯಕ್ಷಿಕೆ ಯೋಜನೆ

ರೈತರ ಆದಾಯ ಹೆಚ್ಚಿಸುವಲ್ಲಿ ಸಾವಯವ ಕೃಷಿಯ ಅವಶ್ಯಕತೆ ಇದೆ ಎಂದು ಕೃಷಿ ವಿಶ್ವವಿದ್ಯಾಲಯ ಕುಲಪತಿ ಡಾ.ಎಸ್.ವಿ. ಸುರೇಶ್‌ ತಿಳಿಸಿದರು.

ಹಸಿರು ಕ್ರಾಂತಿಯ ನಂತರ ಕೃಷಿ ಕ್ಷೇತ್ರದಲ್ಲಿ ಉಂಟಾದ ಬೆಳವಣಿಗೆಗಳು, ಗುಣಮಟ್ಟದ ಉತ್ಪಾದನೆ ಹಾಗೂ ರೈತರ ಆದಾಯ ಹೆಚ್ಚಿಸುವಲ್ಲಿ ಸಾವಯವ ಕೃಷಿಯ ಅವಶ್ಯಕತೆ ಮತ್ತು ಸಾವಯವ ಪ್ರಮಾಣೀಕರಣದ ಮಹತ್ವದ ಬಗ್ಗೆ ತಿಳಿಸಿಕೊಟ್ಟರು. ಸಾವಯವ ಕೃಷಿ ಪದ್ಧತಿಯನ್ನು ಅಳವಡಿಸಿಕೊಳ್ಳುವಾಗ ಪರಿವರ್ತನೆ ಸಮಯದಲ್ಲಿ ಇಳುವರಿ ಮತ್ತು ಆದಾಯವನ್ನು ಸರಿದೂಗಿಸಿಕೊಳ್ಳಲು ಈ ರೀತಿಯ ಪ್ರೋತ್ಸಾಹದಾಯಕ ಯೋಜನೆಗಳು ಸಹಕಾರಿಯಾಗುತ್ತವೆ ಎಂದು ತಿಳಿಸಿ ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರದ ಸುಧಾರಣೆಯಾಗಲು ಪೂರಕವಾದ ಆಹಾರ ಪದ್ಧತಿಯನ್ನು ಅಳವಡಿಸಿಕೊಳ್ಳಲು ಕರೆ ನೀಡಿದರು. ಇದಕ್ಕೆ ಸೂಕ್ತವಾಗಿ ಸಾವಯವ ಕೃಷಿಯು ಸ್ಪಂದಿಸುವುದು ಎಂದು ತಿಳಿಸಿ ರೈತರನ್ನು ಸಾವಯವ ಕೃಷಿ ಅಳವಡಿಕೆಗೆ ಉತ್ತೇಜಿಸಿದರು.

ಕೃಷಿ ವಿಜ್ಞಾನ ಕೇಂದ್ರದ ತಾಂತ್ರಿಕ ಸಲಹೆಗಳ ಆಧಾರದ ಮೇಲೆ ಸಾವಯವ ಅರಿಶಿಣ ಬೆಳೆಯುತ್ತಿರುವ ಆಯ್ದ ಬೆಳೆಗಾರರಿಗೆ ಸಾವಯವ ಪ್ರಮಾಣಪತ್ರಗಳನ್ನು ವಿತರಿಸಲಾಯಿತು.

ರೈತ ಮುಖಂಡರಾದ ಹೊನ್ನೂರು ಪ್ರಕಾಶ್, ಉಡಿಗಾಲ ರೈತ ಉತ್ಪಾದಕರ ಸಂಸ್ಥೆಯ ಶಿವರುದ್ರಪ್ಪ, ಪ್ರಗತಿಪರ ಸಾವಯವ ಕೃಷಿಕರಾದ ನಟರಾಜು ಬಂದಿಗೌಡನಹಳ್ಳಿ, ಶಶಿಕುಮಾರ್ ದೊಡ್ಡತುತ್ತೂರು, ವಿ.ಸಿ.ಹೊಸೂರಿನ ಯೋಗೇಶ್ ಮತ್ತು ಇತರ ರೈತರು ಭಾಗವಹಿಸಿದ್ದರು.ಸಾವಯವ ಕೃಷಿ ತಂತ್ರಜ್ಞಾನ ಪರಿಕರಗಳಾದ ಬೇವಿನ ಉತ್ಪನ್ನಗಳು, ಜೈವಿಕ ಪೀಡೆನಾಶಕಗಳು, ಅಂಟುಬಲೆಗಳು, ತ್ಯಾಜ್ಯ ವಿಘಟಕ ಸೂಕ್ಷ್ಮಜೀವಿ ಸಮೂಹಗಳ ಒಂದು ವಸ್ತು ಪ್ರದರ್ಶನ ಏರ್ಪಡಿಸಲಾಗಿತ್ತು.