ಅನೇಕ ಯೋಜನೆಗಳು ಬಂದರೂ ಬಗಿಹರಿಯದ ರೈತರ ಸಮಸ್ಯೆ: ಸಂಸದ ಪಿ.ಸಿ. ಗದ್ದಿಗೌಡರ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ತೋಟಗಾರಿಕೆ ವಿವಿಯ ಆಡಳಿತ ಮಂಡಳಿಯ ಸಭಾಂಗಣದಲ್ಲಿ ಭಾರತ ಸರ್ಕಾರ ಹೈದರಾಬಾದ್‌ನ ಎಂ.ಎ.ಎನ್.ಎ.ಜಿ.ಇ, ಎಸ್.ಎ.ಎಂ.ಇ.ಟಿಐ (ಉತ್ತರ), ಧಾರವಾಡ ಕೃಷಿ ವಿಶ್ವವಿದ್ಯಾಲಯ, ಬಾಗಲಕೋಟೆ ತೋವಿವಿ ಹಾಗೂ ಜಿಲ್ಲಾ ಕೃಷಿ ತರಬೇತಿ ಕೇಂದ್ರದ ಸಹಯೋಗದಲ್ಲಿ ಕೃಷಿ ಪರಿಕರ ಮಾರಾಟಗಾರರಿಗೆ ಕೃಷಿ ಡಪ್ಲೋಮಾ ಪದವಿ ಪ್ರಮಾಣ ಪತ್ರಗಳ ಪ್ರದಾನ ಸಮಾರಂಭದಲ್ಲಿ ಮಾತನಾಡಿ ಅವರು, ಸಂಕಷ್ಟದಲ್ಲಿರುವ ರೈತರಿಗೆ ಸಹಾಯ ಮಾಡುವ ಉದ್ದೇಶದಿಂದ ತಮಗೆಲ್ಲ ತರಬೇತಿ ನೀಡಿ, ಪ್ರಮಾಣ ಪತ್ರ ನೀಡಲಾಗಿದ್ದು, ಪ್ರಾಮಾಣಿಕವಾಗಿ ಕಾರ್ಯನಿರ್ವಹಿಸಿ, ರೈತರ ಅಭಿವೃದ್ಧಿಗೆ ಶ್ರಮಿಸುವಂತೆ ಸಲಹೆ ನೀಡಿದರು.

ರಾಜ್ಯಸಭಾ ಸದಸ್ಯ ನಾರಾಯಣಸಾ ಭಾಂಡಗೆ ಮಾತನಾಡಿ, ಭಾರತ ಹಳ್ಳಿಗಳಿಂದ ಕೂಡಿದ ದೇಶ. ಕೃಷಿ ಪ್ರಧಾನವಾದ ದೇಶ. ರೈತ ದೇಶದ ಬೆನ್ನೆಲುಬು ಮತ್ತು ರೈತ ಅನ್ನದಾತ ಎಂದು ಹೊಗಳುವುದೇ ಇಂದು ಹೆಚ್ಚಾಗಿದ್ದು, ರೈತರಿಗೆ ಸ್ಪಂದಿಸುವ ಕಾರ್ಯ ಇದುವರೆಗೆ ಆಗುತ್ತಿಲ್ಲ. ಕೃಷಿ, ತೋಟಗಾರಿಕೆ ವಿಶ್ವವಿದ್ಯಾಲಯಗಳು ವಿವಿಧ ಮಾದರಿಯ ಬೆಳೆಗಳನ್ನು ಸಂಶೋಧಿಸಬೇಕಿದೆ. ತೋಟಗಾರಿಕೆ ಬೆಳೆಗಳಾದ ಹಣ್ಣು, ಹೂ, ಔಷಧಿಯ ಸಸ್ಯಗಳನ್ನು ಬೆಳೆಯಲು ನಮ್ಮ ಜಿಲ್ಲೆಯ ನೆಲ ಉಪಯುಕ್ತವಾಗಿದೆ. ಈಗಾಗಲೇ ಜಿಲ್ಲೆಯ ಮುಧೋಳ ತಾಲೂಕಿನಲ್ಲಿ ರೈತರೊಬ್ಬರು ಸೇಬು ಹಣ್ಣು ಬೆಳೆದು ತೋರಿಸಿದ್ದಾರೆ. ಹಿಂದೆ ಕಾಶ್ಮೀರ ಹಾಗೂ ಹಿಮಾಲಯ ಪ್ರದೇಶಗಳಲ್ಲಿ ಬೆಳೆಯಬಹುದಾಗಿದ್ದ ಸೇಬು ಇಂದು ನಮ್ಮ ಭಾಗದಲ್ಲಿ ಬೆಳೆಯುತ್ತಿದೆ ಎಂದರೆ ಇನ್ನುಳಿದ ಬೆಳೆಗಳು ಕೂಡ ಇಲ್ಲಿ ಬೆಳೆಯಬಹುದಾಗಿದೆ. ಈ ನಿಟ್ಟಿನಲ್ಲಿ ರೈತರಿಗೆ ಮಾರ್ಗದರ್ಶನ ನೀಡಬೇಕು ಎಂದು ಸಲಹೆ ನೀಡಿದರು.

ತರಬೇತಿ ಪಡೆದವರಲ್ಲಿ ಬಂಗಾರದ ಪದಕ ಪಡೆದ ಚಂದ್ರಶೇಖರ, ಬೆಳ್ಳಿ ಪದಕ ಪಡೆದ ಸವಿತಾ ಕರಬೂರ ಹಾಗೂ ಕಂಚು ಪದಕ ಪಡೆದ ವೆಂಕಟರೆಡ್ಡಿ ಅವರಿಗೆ ಪದಕ ವಿತರಿಸಲಾಯಿತು. ಕಾರ್ಯಕ್ರಮದಲ್ಲಿ ಕೃಷಿ ವಿಸ್ತರಣಾ ನಿರ್ದೇಶಕ ವೆಂಕಟೇಶಲು, ಕೃಷಿ ವಿಶೇಷ ಅಧಿಕಾರಿ ಜಾಧವ, ಕೃಷಿ ಉಪನಿರ್ದೇಶಕ ರೂಢಗಿ ಸೇರಿದಂತೆ ಇತರರು ಉಪಸ್ಥಿತರಿದ್ದರು.