ಸುರಕ್ಷತಾ ನಿಯಮ ಕಡ್ಡಾಯವಾಗಿ ಅನುಸರಿಸಿ

ಅಪಘಾತ ತಡೆ ಕ್ರಮಗಳ ಕುರಿತ ಅಧಿಕಾರಿಗಳು, ಗಣಿ ಕಂಪನಿ, ಲಾರಿ ಮಾಲೀಕರ ಸಂಘದ ಪದಾಧಿಕಾರಿಗಳ ಸಭೆ

ಸಂಡೂರು ಪೊಲೀಸ್ ಠಾಣಾ ವ್ಯಾಪ್ತಿಯೊಂದರಲ್ಲಿಯೇ ಮೇ ೨೦೨೩ರಿಂದ ಮೇ ೨೦೨೫ರ ಅವಧಿಯಲ್ಲಿ ೪೮೬ ಅಪಘಾತಗಳಾಗಿವೆ. ಈ ಅಪಘಾತಗಳಲ್ಲಿ ೪೦ ಜನರು ಮೃತಪಟ್ಟಿದ್ದಾರೆ. ಈ ಅಪಘಾತಗಳಲ್ಲಿ ಶೇ. ೮೦ರಷ್ಟು ಗಣಿ ಚಟುವಟಿಕೆಗಳಿಗೆ ಸಂಬಂಧಿಸಿದ್ದಾಗಿವೆ. ಅಪಘಾತಗಳ ತಡೆಗೆ ಸೂಕ್ತ ಪರಿಹಾರ ಕಂಡುಕೊಳ್ಳಲೇಬೇಕಿದೆ ಎಂದು ಸರ್ಕಲ್ ಇನ್‌ಸ್ಪೆಕ್ಟರ್ ಮಹೇಶ್‌ಗೌಡ ಹೇಳಿದರು.

ಅಪಘಾತಗಳಿಗೆ ಕಾರಣವಾಗುವ ಅಂಶಗಳನ್ನು ಅವರು ಸಭೆಯಲ್ಲಿ ಎಳೆಎಳೆಯಾಗಿ ಬಿಚ್ಚಿಟ್ಟರು.

ಆರ್‌ಟಿಒ ಶ್ರೀನಿವಾಸ್ ಗಿರಿ ಮಾತನಾಡಿ, ಸ್ಪೀಡ್ ಗವರ್ನರ್ ಇದ್ದರೇನೆ ಫಿಟ್‌ನೆಸ್ ಸರ್ಟಿಫಿಕೇಟ್ ಕೊಡುವುದು. ಎಲ್ಲಾ ವಾಹನಗಳಿಗೂ ಸ್ಪೀಡ್ ಗವರ್ನರ್ ಇವೆ. ಆದರೆ, ಸರ್ಟಿಫಿಕೇಟ್ ನೀಡಿದ ನಂತರ ಅವುಗಳನ್ನು ಟ್ಯಾಂಪರ್ ಮಾಡುತ್ತಾರೆ ಎಂದು ದೂರಿದರು.

ಜನಸಂಗ್ರಾಮ ಪರಿಷತ್ ಮುಖಂಡರಾದ ಶ್ರೀಶೈಲ ಆಲ್ದಳ್ಳಿ, ಟಿ.ಎಂ. ಶಿವಕುಮಾರ ಹಾಗೂ ಮಂಜುನಾಥ್, ಗಣಿ ಲಾರಿ ಸಂಚರಿಸುವ ರಸ್ತೆಗಳಲ್ಲಿ ಎಐ ತಂತ್ರಜ್ಞಾನದ ಸಿಸಿ ಕ್ಯಾಮೆರಾ ಅಳವಡಿಸಬೇಕು. ಅಪಘಾತಗಳಲ್ಲಿ ಜನತೆ ಮೃತಪಟ್ಟರೆ, ಗಣಿ ಕಂಪನಿಗಳವರಿಂದ ಪರಿಹಾರ ಕೊಡಿಸಬೇಕು ಎಂದು ಒತ್ತಾಯಿಸಿದರು.

ದಾಖಲೆ ಪರಿಶೀಲಿಸದೆ, ಅದಿರು ಸಾಗಾಣಿಕೆಗೆ ಅವಕಾಶ ನೀಡಿ ಅಪಘಾತ ಸಂಭವಿಸಿದಲ್ಲಿ ಸಂಬಂಧಿಸಿದ ಗಣಿ ಕಂಪನಿಯ ಅಧಿಕಾರಿಗಳ ಮೇಲೆಯೂ ಕೇಸನ್ನು ದಾಖಲಿಸುವುದು. ಚಾಲಕರಿಗೆ ಜಾಗೃತಿ ಸಭೆಗಳನ್ನು ಏರ್ಪಡಿಸಿ ತಿಳುವಳಿಕೆ ಮೂಡಿಸುವುದು ಮುಂತಾದ ನಿರ್ಧಾರ ಕೈಗೊಳ್ಳಲಾಯಿತು. ಗಣಿ ಕಂಪನಿಗಳು ಆ್ಯಬುಲೆನ್ಸ್ ವ್ಯವಸ್ಥೆ ಕಲ್ಪಿಸಬೇಕು ಎಂದು ತೀರ್ಮಾನಿಸಲಾಯಿತು. ಈ ನಿರ್ಧಾರಗಳಿಗೆ ಸಭೆಯಲ್ಲಿ ಉಪಸ್ಥಿತರಿದ್ದವರು ಒಪ್ಪಿಗೆ ಸೂಚಿಸಿದರು.