ಬೆಣ್ಣಿಹಳ್ಳ ನೀರಾವರಿ ಯೋಜನೆ ನಿರೀಕ್ಷೆಯಲ್ಲಿ ಅನ್ನದಾತರು

ಬಸವರಾಜ ಹಿರೇಮಠ

ಧಾರವಾಡ ಜಿಲ್ಲೆಯ ಕುಂದಗೋಳ ಹಾಗೂ ನವಲಗುಂದ, ಗದಗ ಜಿಲ್ಲೆಯ ರೋಣ, ನರಗುಂದ ತಾಲೂಕಿನಲ್ಲಿ ಪ್ರವಾಹ ಸೃಷ್ಟಿಸುವ ಬೆಣ್ಣಿಹಳ್ಳದ ನೀರು ವ್ಯರ್ಥವಾಗಿ ಹರಿದು ಹೋಗದಂತೆ ತಡೆಯಲು ನೀರಾವರಿ ಯೋಜನೆ ಅನುಷ್ಠಾನಕ್ಕಾಗಿ ಈ ಪ್ರದೇಶದ ಅನ್ನದಾತರು ಭಾರೀ ನಿರೀಕ್ಷೆ ಹೊಂದಿದ್ದಾರೆ.

ಹೊಸೂರ ಗ್ರಾಮದ ರುದ್ರಗೌಡ್ರ ಪಾಟೀಲರ ಹೊಲದಲ್ಲಿ ಉದಯಿಸುವ ಬೆಣ್ಣಿಹಳ್ಳ ಮಳೆಗಾಲದಲ್ಲಿ ಹರಿಯುತ್ತಲೇ ತನ್ನ ವಿಸ್ತಾರವನ್ನು (ಹರಿವು) ಹೆಚ್ಚಿಸಿಕೊಂಡಿದೆ. ಮೂಲ ಸ್ಥಾನದಲ್ಲಿ ಅಷ್ಟೇನು ದೊಡ್ಡ ಪ್ರಮಾಣದಲ್ಲಿ ಈ ಹಳ್ಳ ಇಲ್ಲವಾದರೂ ಇಲ್ಲಿಂದ ಹರಿಯುವ ನೀರು ಸಮರ್ಪಕವಾಗಿ ಬಳಸಲು ಯಾವುದೇ ಯೋಜನೆ ಇಲ್ಲ.

ನವಲಗುಂದ, ಕುಂದಗೋಳ, ನರಗುಂದ ಜನರಿಗೆ ಬಹು ಉಪಯುಕ್ತ ಹಳ್ಳ ಎಂದೇ ಹೇಳಲಾಗುತ್ತದೆ. ಅಲ್ಲಿಯೂ ಈ ಹಳ್ಳದ ನೀರು ವ್ಯರ್ಥವಾಗಿಯೇ ಹರಿದು ಹೋಗುತ್ತಿದೆಯೇ ಹೊರತು ಸದ್ಬಳಕೆಯಾಗುತ್ತಿಲ್ಲ.

ಈ ಮೂಲಕ ಮಳೆ ನೀರು ಹರಿದು ಗ್ರಾಮದ ನಾಕನಕಟ್ಟಿ ಕೆರೆಗೆ ಸೇರುತ್ತದೆ, ಇಲ್ಲಿಂದಲೆ ಯತ್ನಳ್ಳಿ ಗ್ರಾಮದ ಭೂಮಿಯ ಮೇಲೆ ದುಂಡಶಿ, ಮಡ್ಲಿ, ಶ್ಯಾಡಂಬಿ, ತಡಸ ಹೊಲಗಳಲ್ಲಿ ಹಾಯ್ದು ಕುಂದಗೋಳ ತಾಲೂಕಿನ ಜೀಗಳೂರ ಕುಬಿಹಾಳ, ನಾಗರಹಳ್ಳಿ, ಮೂಲಕ ನವಲಗುಂದ, ಕುಂದಗೋಳ ನರಗುಂದ ತಾಲೂಕುಗಳಲ್ಲಿ ಬೃಹತ್ ಬೆಣ್ಣಿಹಳ್ಳವಾಗಿ ಹರಿಯುತ್ತದೆ.

ಸತತವಾಗಿ ಸುರಿಯುತ್ತಿರುವ ಮಳೆಯ ಹಿನ್ನೆಲೆ ತಾಲೂಕಿನ ಕುನ್ನೂರ -ಶ್ಯಾಡಂಬಿ ಮಧ್ಯದಲ್ಲಿರುವ ಬೆಣ್ಣಿ ಹಳ್ಳವನ್ನು ನೋಡುತ್ತಿದ್ದಂತೆಯೇ ಕಾರು-ಬೈಕು ಸವಾರರ ನಿಂತು ನೋಡುತ್ತಾರೆ. ಇದೂ ಒಂದು ಜಲಪಾತವಾಗಿ ಹೊರಹೊಮ್ಮಿದೆ. ನೋಡುಗರು ನೀರಲ್ಲಿ ಇಳಿದು ಪೋಟೋ ಕ್ಲಿಕ್ಕಿಸಿಕೊಳ್ಳುವುದು ಸಾಮಾನ್ಯವಾಗಿದೆ.