ಕುಷ್ಟಗಿ ತಹಸೀಲ್ದಾರ ಕಚೇರಿಯ ಹಳೆ ಕಟ್ಟಡ ಉಳಿಸಲು ಒತ್ತಾಯ

ಕುಷ್ಟಗಿ: ಪಟ್ಟಣದ ಐತಿಹಾಸಿಕ ಹಳೆ ತಹಸೀಲ್ದಾರ್‌ ಕಚೇರಿ ಕಟ್ಟಡವು ಪಾಳು ಬಿದ್ದಿದ್ದು, ಕಟ್ಟಡಕ್ಕೆ ಮರುಜೀವ ನೀಡುವ ಮೂಲಕ ಇತಿಹಾಸ ಉಳಿಸಬೇಕು ಎಂದು ಸ್ಥಳೀಯ ನಿವಾಸಿಗಳು ಒತ್ತಾಯಿಸಿದ್ದಾರೆ.ಪಟ್ಟಣದ ಹನಮಸಾಗರ ರಸ್ತೆಯಲ್ಲಿರುವ ಮಿನಿ ವಿಧಾನಸೌಧದ ಹಿಂಭಾಗದ ನಿಜಾಮರ ಆಡಳಿತಾವಧಿಯಲ್ಲಿ ನಿರ್ಮಾಣವಾದ ಈ ತಹಸೀಲ್ದಾರ ಕಚೇರಿ ಕಟ್ಟಡವು ಸದೃಢವಾಗಿದ್ದರೂ ನಿರ್ಲಕ್ಷಕ್ಕೆ ಒಳಗಾಗಿದೆ. ಯಾವುದೇ ಕಾರ್ಯಗಳು ನಡೆಯದೇ ಇಂದಿಗೂ ಪಾಳು ಬಿದ್ದ ಕಟ್ಟಡವಾಗಿದೆ.ಏಕೈಕ ಪಾರಂಪರಿಕ ಕಟ್ಟಡ: ಆಡಳಿತ ಸೌಧವು ಸ್ವಾತಂತ್ರ್ಯ ಪೂರ್ವದಲ್ಲಿ ನಿರ್ಮಾಣಗೊಂಡಿದೆ. ಇದು ಐತಿಹಾಸಿಕ ಮಹತ್ವ ಸಾರುತ್ತಿರುವ ಕಟ್ಟಡವಾಗಿದ್ದು, ಇಲ್ಲಿ ಹೈದರಾಬಾದ್ ನಿಜಾಮರು ಆಡಳಿತ ಮಾಡಿದ್ದಾರೆ ಎನ್ನುವುದಕ್ಕೆ ಸಾಕ್ಷಿ ಒದಗಿಸುವ ತಾಲೂಕಿನ ಏಕೈಕ ಪಾರಂಪರಿಕ ಕಟ್ಟಡವಾಗಿದೆ. ತಹಸೀಲ್ದಾರ್‌, ಜಿಲ್ಲಾಧಿಕಾರಿ ಸೂಕ್ತ ಕ್ರಮ ಕೈಗೊಳ್ಳಬೇಕಾಗಿದೆ.

ಈ ಐತಿಹಾಸಿಕ ಕಟ್ಟಡದ ಗೋಡಗಳ ಮೇಲೆ ವಿವಿಧ ಜಾತಿಯ ಗಿಡ, ಮುಳ್ಳು ಕಂಠಿಗಳು ಬೆಳೆದು ನಿಂತಿವೆ. ಬೇರುಗಳು ಮೇಲಿಂದ ಕೆಳಗಿಳಿದು ಗೋಡೆ ಶಿಥಿಲಗೊಳಿಸುತ್ತಿದ್ದರೂ ಅದನ್ನು ತೆಗೆಯಲು ಯಾರೂ ಮುಂದಾಗುತ್ತಿಲ್ಲ.