ಬಡ ಪ್ರತಿಭಾವಂತ ವಿದ್ಯಾರ್ಥಿಗೆ ವಂಚನೆ: ಸೈಬರ್ ಪೊಲೀಸರ ತನಿಖೆ ಚುರುಕು

₹60 ಸಾವಿರ ವಂಚನೆ ಪ್ರಕರಣ: ಖಾತೆದಾರಳಿಗೆ ನೋಟಿಸ್

-ಖಾತೆದಾರಳಾದ ಸೈದಾ ತಸ್ಲಿಮಾಗೆ ನೋಟಿಸ್ ಜಾರಿ

ಕನ್ನಡಪ್ರಭ ವಾರ್ತೆ ಕೊಪ್ಪಳ

ಬೆಂಗಳೂರಿನ ವಿಳಾಸ ಹೊಂದಿರುವ ಸೈದಾ ತಸ್ಲಿಮಾ ಎಂಬ ಮಹಿಳೆಯ ಬ್ಯಾಂಕ್ ಖಾತೆಗೆ ವಂಚನೆಯ ₹60 ಸಾವಿರ ಜಮೆಯಾಗಿರುವುದು ತನಿಖೆಯಲ್ಲಿ ಪತ್ತೆಯಾಗಿದೆ. ಆಕೆಗೆ ಕರೆ ಮಾಡಿ ವಿಚಾರಣೆ ನಡೆಸಿರುವ ಪೊಲೀಸರು, ಠಾಣೆಗೆ ಹಾಜರಾಗುವಂತೆ ನೋಟಿಸ್ ನೀಡಿದ್ದಾರೆ. ಒಂದೆರಡು ದಿನಗಳಲ್ಲಿ ಹಾಜರಾಗುವುದಾಗಿ ಆಕೆ ತಿಳಿಸಿದ್ದಾಳೆ.

ಮಂತ್ರಾಲಯದ ರಾಘವೇಂದ್ರ ಸ್ವಾಮಿಗಳ ಮಠದ ಹೆಸರಿನಲ್ಲಿ ಕರೆ ಮಾಡಿರುವ ವಂಚಕರು, ಅದೇ ಹೆಸರಿನಲ್ಲಿ ವಾಟ್ಸ್‌ಆ್ಯಪ್‌ನಲ್ಲಿ ಚಾಟ್ ಮಾಡಿ ವಿದ್ಯಾರ್ಥಿಯನ್ನು ನಂಬಿಸಿದ್ದಾರೆ. ನೆರವು ನೀಡುವ ಮೊದಲು ಜಿಎಸ್‌ಟಿ ಪಾವತಿಸಬೇಕೆಂದು ಹೇಳಿ, ಫೋನ್‌ಪೇ ಮೂಲಕ ಸೈದಾ ತಸ್ಲಿಮಾ ಅವರ ಖಾತೆಗೆ ₹60 ಸಾವಿರ ವರ್ಗಾಯಿಸಿಸಿಕೊಂಡಿದ್ದಾರೆ.

ವಂಚನೆಗೆ ಬಳಸಿರುವ ಹಲವು ಬ್ಯಾಂಕ್ ಖಾತೆಗಳನ್ನು ಪೊಲೀಸರು ಫ್ರೀಜ್ ಮಾಡಿದ್ದಾರೆ. ಈ ಖಾತೆಗಳಲ್ಲಿ ಒಟ್ಟು ಸುಮಾರು ₹11 ಸಾವಿರ ಮಾತ್ರ ಉಳಿದಿದ್ದು, ಹಣದ ಮುಂದಿನ ವರ್ಗಾವಣೆಗೆ ಪೊಲೀಸರು ತಡೆ ಹಾಕಿದ್ದಾರೆ.

ವಂಚನೆ ಮಾಡುವ ಗ್ಯಾಂಗ್‌ಗಳು ಸ್ಥಳೀಯರನ್ನು ಹಣದ ಆಮಿಷವೊಡ್ಡಿ ಬ್ಯಾಂಕ್ ಖಾತೆ ತೆರೆಯಲು ಬಳಸಿಕೊಳ್ಳುತ್ತವೆ. ಖಾತೆ ತೆರೆಯುವಾಗ ತಾವೇ ನೀಡುವ ಮೊಬೈಲ್ ಸಿಮ್ ಹಾಗೂ ದಾಖಲೆಗಳನ್ನು ಬಳಸುವಂತೆ ಮಾಡುತ್ತವೆ. ಬಳಿಕ ಖಾತೆಯ ವಹಿವಾಟನ್ನು ತಾವೇ ನಿರ್ವಹಿಸುತ್ತವೆ. ಹೀಗಾಗಿ ನೈಜ ಆರೋಪಿಗಳನ್ನು ಪತ್ತೆಹಚ್ಚುವುದು ಸೈಬರ್ ಪೊಲೀಸರಿಗೆ ಸವಾಲಾಗಿದೆ.

ಮಂತ್ರಾಲಯದ ಶ್ರೀ ರಾಘವೇಂದ್ರ ಸ್ವಾಮಿ ಮಠದ ಹೆಸರಿನಲ್ಲಿ ವಂಚನೆ ನಡೆಸಿರುವ ಗ್ಯಾಂಗ್, ಧಾರ್ಮಿಕ ಸಂಸ್ಥೆಗಳ ಹೆಸರಿಗೂ ಮಸಿ ಬಳಿಯುವ ಪ್ರಯತ್ನ ಮಾಡಿರುವ ಅನುಮಾನ ವ್ಯಕ್ತವಾಗಿದೆ. ಭಕ್ತರ ನಂಬಿಕೆಯನ್ನು ದುರ್ಬಳಕೆ ಮಾಡಿಕೊಂಡು ಹಣ ವಂಚಿಸಿರುವುದರ ಹಿಂದೆ ಬೇರೆ ಉದ್ದೇಶಗಳಿವೆಯೇ ಎಂಬುದನ್ನು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಆಂಜನೇಯ, ಪಿಐ, ಸೈಬರ್ ಠಾಣೆ, ಕೊಪ್ಪಳ