ಗಣೇಶ ಹಬ್ಬಕ್ಕೆ ತಯಾರಾದ ಗಣೇಶ ಮೂರ್ತಿಗಳು

ದಾಂಡೇಲಿ: ಗಣೇಶ ಚತುರ್ಥಿಯಂದು ಮನೆ ಮನೆಗಳಲ್ಲಿ ಪೂಜೆಗೊಳ್ಳಲು ಮೂಷಿಕ ವಾಹನ ಹೊಂದಿರುವ ಗಣೇಶನ ಮೂರ್ತಿಗಳು ಅತ್ಯಂತ ಸುಂದರ, ಆಕರ್ಷಕ ಬಣ್ಣಗಳೊಂದಿಗೆ, ವಿವಿಧ ಭಂಗಿಗಳಲ್ಲಿ ತಯಾರಾಗುತ್ತಿದ್ದಾನೆ.

ನಗರದಲ್ಲಿ ಸುಮಾರು ೫೦ಕ್ಕೂ ಹೆಚ್ಚು ಸ್ಥಳಗಳಲ್ಲಿ ಸಾರ್ವಜನಿಕ ಗಣೇಶ ಮಂಡಳಿಗಳಿವೆ. ನಗರದ ಸಾವಿರಾರು ಮನೆಗಳಲ್ಲಿ ಗಣಪತಿ ಮೂರ್ತಿ ಪ್ರತಿಷ್ಠಾಪಿಸಲ್ಪಡುತ್ತಾನೆ. ಭಕ್ತರು ನಮ್ಮ ಅನುಕೂಲಕ್ಕೆ ತಕ್ಕಂತೆ ಮೆನಗಳಲ್ಲಿ ೧ ರಿಂದ ೧೧ ದಿನಗಳವರೆಗೆ ಮನೆಗಳಲ್ಲಿ ಗಣಪತಿಯನ್ನು ಪೂಜಿಸಿ ಆರಾಧಿಸುತ್ತಾರೆ. ಇನ್ನು ಸಾರ್ವಜನಿಕ ಗಣೇಶ ಮಂಡಳದವರು ದೊಡ್ಡ ದೊಡ್ಡ ಗಣೇಶ ಮೂರ್ತಿಗಳನ್ನು ಪರ ಊರುಗಳಿಂದ, ಬೆಳಗಾವಿ, ಹುಬ್ಬಳ್ಳಿ, ಮಹಾರಾಷ್ಟ್ರದ ಕೊಲ್ಲಾಪುರ, ಇಚ್ಚಲಕರಂಜಿ ಮುಂತಾದ ಕಡೆಗಳಿಂದ ತರುತ್ತಾರೆ. ಮನೆಗಳಲ್ಲಿ ಪೂಜಿಸುವ ಭಕ್ತರು ನಗರದಲ್ಲಿಯೇ ಹೆಚ್ಚಾಗಿ ಖರಿದಿಸುತ್ತಾರೆ. ನಗರದಲ್ಲಿ ಅತೀ ಸುಂದರ ವಿವಿಧ ಬಣ್ಣಗಳಿಂದ ಅಲಂಕಾರಗೊಂಡ ಚಂದದ ಗಣಪನಿಗೆ ಹೆಚ್ಚು ಬೇಡಿಕೆಯಿದೆ.

ಶಿವಗಣಪತಿ, ನಟರಾಜ, ಪಂಚಮುಖೀ, ಗಣಾಂಜನೇಯ, ಅರ್ಧನಾರೇಶ್ವರ, ಹನುಮಂತನ ಮೇಲೆ ಕುಳಿತ ಗಣಪ, ಶೇಷಶಯನ, ವೇಂಕಟೇಶ್ವರ, ಕಾಳಿಂಗ ಮರ್ಧನ, ರಾಜ ದರ್ಬಾರ ಗಣಪ, ಕಮಲದ ಹೂವಿನ ಮೇಲೆ ಕುಳಿತ ಗಣಪ, ಮೂಷಿಕ ಮೇಲೆ ಕುಳಿತ ಗಣಪ ಹೀಗೆ ವಿವಿಧ ತರದ ಮೂರ್ತಿಗಳು ಸಿಗುತ್ತವೆ. ಹೆಚ್ಚಿನ ಗಣಪತಿ ಮೂರ್ತಿಗಳನ್ನು ಮನಿನಲ್ಲಿ ಮಾಡಿದ್ದು, ಎತ್ತರ ಮತ್ತು ದೊಡ್ಡ ಗಣಪತಿ ಮೂರ್ತಿಗಳನ್ನು ತಯಾರಿಸಲು ಕಷ್ಟವಾಗುತ್ತದೆ ಎಂದು ಮೂರ್ತಿ ತಯಾರಕರ ಮಾತಾಗಿದೆ.