ಉತ್ತಮ ಮಳೆ, ರೈತರ ಮೊಗದಲ್ಲಿ ಮಂದಹಾಸ

ಸಂತೋಷ ದೈವಜ್ಞ

ಪ್ರಸಕ್ತ ಸಾಲಿನಲ್ಲಿ ಈವರೆಗೂ ಕೃಷಿಗೆ ಪೂರಕ ಉತ್ತಮ ಮಳೆಯಾಗುತ್ತಿದೆ. ಈ ಬಾರಿ ಅಡ್ಡಿ ಮಳೆ ಕೃಷಿ ಚಟುವಟಿಕೆಗೆ ಇಂಬು ನೀಡಿದೆ. ಮುಂಗಾರು ಮಳೆ ಹಿಡಿದ ಬಳಿಕ ಕೃಷಿ ಕಾರ್ಯ ಕಷ್ಟ ಎಂಬ ಕಾರಣಕ್ಕೆ ರೈತರು ತರಾತುರಿಯಲ್ಲಿ ಭೂಮಿ ಹದಗೊಳಿಸಿ ಬಿತ್ತನೆ ಕಾರ್ಯ ಮುಗಿಸಿದ್ದಾರೆ. ಈ ನಡುವೆ ಕೃಷಿ ಇಲಾಖೆಯಿಂದ ಸಹಾಧನದಲ್ಲಿ ಬಿತ್ತನೆ ಬೀಜ ವಿತರಿಸಲಾಗಿದೆ. ಇನ್ನು ಕೆಲವೇ ಕೆಲವು ಪ್ರದೇಶದಲ್ಲಿ ಬಿತ್ತನೆ ಕಾರ್ಯ ಬಾಕಿ ಇದ್ದು, ವಾತಾವರಣ ನೋಡಿಕೊಂಡು ರೈತರು ಬಿತ್ತನೆ ಮಾಡುತ್ತಿದ್ದಾರೆ.

ಶೇ.೬೦ ಬಿತ್ತನೆ:

ಕೃಷಿ ಇಲಾಖೆಯ ಪ್ರಕಾರ ೪೫೦೦ ಹೆಕ್ಟೇರ್ ಗೋವಿನ ಜೋಳ, ೫೫೦೦ ಹೆಕ್ಟೇರ್ ಭತ್ತ, ೧೪೦೦ ಹೆಕ್ಟೇರ್ ಕಬ್ಬು ಹಾಗೂ ಇತರ ಬೆಳೆ ಸೇರಿದಂತೆ ೧೧,೭೦೦ ಹೆಕ್ಟೇರ್ ಬಿತ್ತನೆ ಗುರಿ ಹೊಂದಿದೆ. ಅದರಲ್ಲಿ ಈವರೆಗೆ ಶೇ.೭೦ ಗೋವಿನಜೋಳ ಬಿತ್ತನೆ ಕಾರ್ಯ ಪೂರ್ಣಗೊಂಡಿದೆ. ಶೇ.೫೦ ಭತ್ತ ಬಿತ್ತನೆಯಾಗಿದೆ.

ಪ್ರಸಕ್ತ ಸಾಲಿನಲ್ಲಿ ಜ.೧ರಿಂದ ಜೂ.೧೪ರ ವರೆಗೆ ೩೩೫.೩ ಮಿ.ಮೀ. ಮಳೆಯಾಗಿದ್ದು, ವಾಡಿಕೆಯಂತೆ ೨೭೦.೯ ಮಿ.ಮೀ. ಮಳೆಯಾಗಬೇಕಿತ್ತು. ಆದರೆ ವಾಡಿಕೆಗಿಂತ ಶೇ.೨೪ರಷ್ಟು ಮಳೆ ಹೆಚ್ಚಾದಂತಾಗಿದೆ. ಕಳೆದ ವರ್ಷ ಈ ವೇಳೆಗೆ ೨೮೨ ಮಿ.ಮೀ. ಮಳೆಯಾಗಿತ್ತು.

ಒಣ ಬಿತ್ತನೆ ಮಾಡಿಕೊಂಡ ಕೆಲವು ರೈತರನ್ನು ಹೊರತುಪಡಿಸಿ ಮಳೆ ಪೂರ್ವ ಬಿತ್ತನೆ ಮಾಡಿಕೊಂಡ ರೈತರ ಬೆಳೆಗೆ ಪೂರಕ ವಾತಾವರಣವಿದೆ. ಈ ಬಾರಿ ಹೆಚ್ಚು ಮಳೆಯಾಗುತ್ತಿರುವುದರಿಂದ ಮೊದಲಿನಂತೆಯೇ ಹೆಚ್ಚು ಭತ್ತ ಬಿತ್ತನೆ ಮಾಡಲಾಗುತ್ತಿದೆ ಎನ್ನುತ್ತಾರೆ ಪ್ರಗತಿಪರ ರೈತ ಸಂಗಮೇಶ ಬಿದರಿ.