ಕೊಪ್ಪಳ ಜಿಲ್ಲಾದ್ಯಂತ ಉತ್ತಮ ಮಳೆ, ಕೃಷಿ ಚಟುವಟಿಕೆ ಜೋರು

ಸೋಮರಡ್ಡಿ ಅಳವಂಡಿ

ರೈತರು ಭೂಮಿಯನ್ನು ಉಳುಮೆ ಮಾಡಿ, ಬಿತ್ತನೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಇತ್ತ ಕೃಷಿ ಇಲಾಖೆಯೂ ಅಗತ್ಯತೆಯನ್ನು ಪೂರೈಕೆ ಮಾಡಲು ಸಕಲ ಸಿದ್ಧತೆ ಮಾಡಿಕೊಳ್ಳುತ್ತಿದೆ.

ಜಿಲ್ಲಾದ್ಯಂತ ಗುರುವಾರ ತಡರಾತ್ರಿ ಮತ್ತು ಶುಕ್ರವಾರ ಬೆಳಗಿನ ಜಾವ ಸೇರಿ 24 ಗಂಟೆಗಳಲ್ಲಿ ಸರಾಸರಿ 21 ಮಿಲಿಮೀಟರ್ ಮಳೆಯಾಗಬೇಕಾಗಿದ್ದರೂ ಆಗಿರುವುದು 16 ಮಿಲಿಮೀಟರ್ ಮಳೆ ಮಾತ್ರ. ಹೀಗಾಗಿ, ಕಳೆದ 24 ಗಂಟೆಯಲ್ಲಿ ಶೇ. 23ರಷ್ಟು ಮಳೆ ಕೊರತೆಯಾಗಿದೆ. ಅಳವಂಡಿ ಭಾಗದಲ್ಲಿ 40 ಮಿಮೀ, ಹನುಮಸಾಗರ, ಯಲಬುರ್ಗಾದಲ್ಲಿ ತಲಾ 25 ಮಿಮೀ, ಕುಕನೂರು ವ್ಯಾಪ್ತಿಯಲ್ಲಿ 31 ಮಿಮೀ ಮಳೆ ಕಳೆದ 24 ಗಂಟೆಗಳಲ್ಲಿ ಆಗಿದೆ. ಕನಕಗಿರಿ ಹಾಗೂ ಕೆಲವೊಂದು ಭಾಗದಲ್ಲಿ ಕೇವಲ 6 ಮಿಮೀ ಮಳೆಯಾಗಿದೆ.

ಪ್ರಸಕ್ತ ಮುಂಗಾರು ಹಂಗಾಮಿನಲ್ಲಿ ಜಿಲ್ಲಾದ್ಯಂತ 3,08,000 ಹೆಕ್ಟೇರ್ ಬಿತ್ತನೆ ಗುರಿ ಹಾಕಿಕೊಳ್ಳಲಾಗಿದೆ. ಇದುವರೆಗೂ ಎಲ್ಲಿಯೂ ಬಿತ್ತನೆಯಾಗಿಲ್ಲ. ಮೇ ಅಂತ್ಯಕ್ಕೆ ಅಥವಾ ಜೂನ್ ಮೊದಲ ವಾರದಲ್ಲಿ ಬಿತ್ತನೆ ಪ್ರಾರಂಭವಾಗಲಿದೆ. ರೈತರು ಈಗ ಮಳೆಯಿಂದಾಗಿರುವ ಹಸಿಯನ್ನು ಭೂಮಿಯನ್ನು ಹದ ಮಾಡಲು ಉಳುಮೆ ಮಾಡಿಕೊಳ್ಳುತ್ತಿದ್ದಾರೆ.

2,010 ಹೆಕ್ಟೇರ್ ಜೋಳ, 99,957 ಹೆಕ್ಟೇರ್ ಮೆಕ್ಕೆಜೋಳ, 64,347 ಹೆಕ್ಟೇರ್ ಸಜ್ಜೆ, 23,000 ಹೆಕ್ಟೇರ್ ದ್ವಿದಳ ಧಾನ್ಯ, 18 ಸಾವಿರ ಹೆಕ್ಟೇರ್ ತೊಗರಿ, 15 ಸಾವಿರ ಹೆಕ್ಟೇರ್ ಹೆಸರು, 24 ಸಾವಿರ ಹೆಕ್ಟೇರ್ ಎಣ್ಣೆಕಾಳು ಬಿತ್ತನೆ ಸೇರಿದಂತೆ ವಿವಿಧ ಬೆಳೆಗಳನ್ನು ಒಳಗೊಂಡು 3,08,000 ಹೆಕ್ಟೇರ್ ಬಿತ್ತನೆ ಗುರಿ ಹಾಕಿಕೊಳ್ಳಲಾಗಿದೆ.

ಬಿತ್ತನೆ ಬೀಜ ಬೇಡಿಕೆ: ಜಿಲ್ಲಾದ್ಯಂತ ಪ್ರಸಕ್ತ ವರ್ಷ ಮುಂಗಾರು ಹಂಗಾಮಿಗೆ ಬೇಕಾಗಬಹುದಾದ ಬೀಜದ ಲೆಕ್ಕಾಚಾರವನ್ನು ಹಾಕಿಕೊಂಡು, ಸಂಗ್ರಹಿಸಿಕೊಟ್ಟುಕೊಳ್ಳುವ ಗುರಿಯನ್ನು ಸಹ ಹಾಕಿಕೊಳ್ಳಲಾಗಿದೆ. ಜಿಲ್ಲಾದ್ಯಂತ 41,671 ಕ್ವಿಂಟಲ್ ಬೇಡಿಕೆ ನಿರೀಕ್ಷೆ ಮಾಡಲಾಗಿದೆ. ಈಗ ಸದ್ಯ ರಾಜ್ಯ ಬೀಜ ನಿಗಮ ಮತ್ತು ರಾಷ್ಟ್ರೀಯ ಬೀಜ ನಿಗಮದಲ್ಲಿ ಸುಮಾರು 8,625 ಕ್ವಿಂಟಲ್ ಬೀಜ ಸಂಗ್ರಹವಿದೆ.ಮುಂಗಾರು ಹಂಗಾಮಿನ ಸಿದ್ಧತೆ ಜೋರಾಗಿ ನಡೆದಿದೆ. ಮಳೆಯೂ ಸಕಾಲಕ್ಕೆ ಬರುತ್ತಿದೆ. ಹೀಗಾಗಿ, ಅಗತ್ಯ ಬೀಜ ಮತ್ತು ರಸಗೊಬ್ಬರ ದಾಸ್ತಾನು ಸಹ ಮಾಡಿಕೊಳ್ಳಲಾಗುತ್ತದೆ ಎಂದು ಕೊಪ್ಪಳ ಕೃಷಿ ಇಲಾಖೆ ಜೆಡಿ ರುದ್ರೇಶಪ್ಪ ಹೇಳುತ್ತಾರೆ. ಸುರಿದ ಮಳೆ, ತುಂಬಿಹರಿದ ಹಳ್ಳಕೊಳ್ಳಗಳು