ಕಪ್ಪತ್ತಮಲ್ಲೇಶ್ವರ ನಂದಿವೇರಿಯಲ್ಲಿ ಅದ್ಧೂರಿ ಜಾತ್ರಾಮಹೋತ್ಸವ

ಡಂಬಳ: ಕಪ್ಪತ್ತಗುಡ್ಡದಲ್ಲಿ ನೆಲೆಸಿರುವ ನಂದಿವೇರಿ,ಕಪ್ಪತ್ತಮಲ್ಲೇಶ್ವರ ಜಾತ್ರಾ ಗುರುವಾರ ಅದ್ಧೂರಿಯಾಗಿ ನಡೆಯಿತು. ವಿವಿಧ ರಾಜ್ಯ, ಗ್ರಾಮಗಳಿಂದ ಬಂದ ಭಕ್ತರು ಕಪ್ಪತ್ತಮಲ್ಲೇಶ್ವರ, ಗಾಳಿಗುಂಡಿ ಬಸವಣ್ಣ, ನಂದಿವೇರಿಯ ಬಸವಣ್ಣ ದೇವರಿಗೆ ವಿಶೇಷ ಪೂಜೆ ಸಲ್ಲಿಸಿದರು.

ಕಪ್ಪತ್ತ ಗುಡ್ಡದಲ್ಲಿ ಬೃಹಂಗೇಶ್ವರ: ಕಪ್ಪತ್ತಮಲ್ಲೇಶ್ವರ ದೇವರ ಸನ್ನಿಧಾನದಲ್ಲಿ ಬೃಹಂಗೇಶ್ವರ ಇರುವುದು ವಿಶೇಷ. ಕಾಶಿಯಲ್ಲಿ ಬೃಹಂಗೇಶ್ವರ ಇರುವ ಕುರುವು ಬಿಟ್ಟರೆ, ಕಪ್ಪತ್ತಗುಡ್ಡದಲ್ಲಿ ಮಾತ್ರ ಕಾಣಿಸಿಗುತ್ತಾನೆ. ಬೃಹಂಗೇಶ್ವರ ಎಂದರೆ ಶಿವನ ಆರಾಧಕ. ಶಿವನ ನೆಚ್ಚಿನ ಭಕ್ತ. ಶಿವನಿಂದ ಆಶೀರ್ವಾದಕ್ಕೆ ಭಾಜನನಾಗಿ, ಶಿವನ ಅಧೀನದಲ್ಲಿ ಇದ್ದು, ಮಾಟ-ಮಂತ್ರಕ್ಕೆ ಒಳಾಗದವರನ್ನು ಸಂರಕ್ಷಿಸಿ, ಪಾಪದ ನಾಶ ಮಾಡಿ, ಸದ್ಗತಿ ಸಿಗುವಂತೆ ಮಾಡುವ ಶಕ್ತಿ ಬೃಹಂಗೇಶ್ವರನಲ್ಲಿ ಇದೆ ಎಂಬುದು ಭಕ್ತರ ನಂಬಿಕೆ.

ನಂದಿವೇರಿ ಮಠದ ಜಾತ್ರೆ: ನಂದಿವೇರಿಮಠದ ಶಿವಕುಮಾರ ಮಹಾಸ್ವಾಮಿಗಳ ಸಾನ್ನಿಧ್ಯದಲ್ಲಿ ವರ್ಷವಿಡಿ ಪ್ರತಿವಾರದಲ್ಲಿ ಒಂದು ದಿನ ಕಪ್ಪತ್ತಗುಡ್ಡದ ಪರಿಸರದ ಕುರಿತು ಅರಿವು ಮೂಡಿಸುವ ವಿಚಾರ ಮತ್ತು ಕಾರ್ಯಾಗಾರ ಜರುಗುತ್ತಾ ಬಂದಿವೆ. ನಂದಿವೇರಿ ಜಾತ್ರೆ ಜತೆಗೆ ಪರಿಸರ ಕಾರ್ಯಕ್ರಮಗಳೂ ಜರುಗುತ್ತವೆ. ಹೀಗಾಗಿ ಇದು ಪರಿಸರ ಜಾತ್ರೆಯೂ ಹೌದು.

ಪ್ರತಿಯೊಬ್ಬರೂ ಶುದ್ಧ ಆಮ್ಲಜನಕ, ಉತ್ತಮ ಮಳೆ, ಮುಂದಿನ ಪೀಳಿಗೆಯ ಹಿತಕ್ಕಾಗಿ ಗಿಡಗಳನ್ನು ನೆಟ್ಟು ಬೆಳೆಸಬೇಕು. ಪ್ಲಾಸ್ಟಿಕ್ ಮುಕ್ತ ಜಾತ್ರೆಯನ್ನಾಗಿಸಬೇಕು ಎನ್ನುವ ಅರಣ್ಯ ಇಲಾಖೆ ಸಂಕಲ್ಪಕ್ಕೆ ಜನರು ಸಹಕಾರ ನೀಡಿದ್ದಾರೆ ಎಂದು ಕಪ್ಪತ್ತಗುಡ್ಡ ವಲಯದ ಆರ್‌ಎಫ್‌ಒ ಮಂಜುನಾಥ ಮೇಗಲಮನಿ ತಿಳಿಸಿದ್ದಾರೆ.