ಆಲಮಟ್ಟಿ-ಚಿತ್ರದುರ್ಗ ರೈಲು ಮಾರ್ಗಕ್ಕೆ ಅನುದಾನ ಘೋಷಿಸಿ

ಕುಷ್ಟಗಿ: ಆಲಮಟ್ಟಿ-ಚಿತ್ರದುರ್ಗ ಹೊಸ ರೈಲು ಮಾರ್ಗಕ್ಕೆ ಬಜೆಟ್ ನಲ್ಲಿ ಅನುದಾನ ಘೋಷಿಸುವುದು ಹಾಗೂ ಬೇಡಿಕೆ ಈಡೇರಿಸುವಂತೆ ಒತ್ತಾಯಿಸಿ ಕರ್ನಾಟಕ ರಕ್ಷಣಾ ವೇದಿಕೆಯ ಪದಾಧಿಕಾರಿಗಳು ತಹಸೀಲ್ದಾರ ಮೂಲಕ ಸರ್ಕಾರಕ್ಕೆ ಮನವಿ ಸಲ್ಲಿಸಿದರು.

ವಿಜಯಪುರ, ಬಾಗಲಕೋಟೆ, ಕೊಪ್ಪಳದಿಂದ ರಾಜಧಾನಿ ಬೆಂಗಳೂರಿಗೆ ನೇರ ಮಾರ್ಗದ ಸಂಪರ್ಕ ಇಲ್ಲಿಯವರೆಗೂ ಆಗದೇ ಇರುವುದು ಈ ಭಾಗದ ದುರದೃಷ್ಟಕರವೆನಿಸಿದೆ. ಪ್ರಸ್ತುತ ಹುಬ್ಬಳ್ಳಿ ಮಾರ್ಗವಾಗಿ ಇಲ್ಲವೇ ಗುಂತಕಲ್ ಮಾರ್ಗವಾಗಿ ದೂರ ಕ್ರಮಿಸುವ ಸಂಪರ್ಕಿಸುವ ಪರಿಸ್ಥಿತಿ ಈಗಲೂ ಮುಂದುವರೆದಿದೆ. ಆಲಮಟ್ಟಿ-ಚಿತ್ರದುರ್ಗ ಹೊಸ ರೈಲ್ವೆ ಮಾರ್ಗದಿಂದ ವಿಜಯಪುರ, ಬಾಗಲಕೋಟೆ, ಕೊಪ್ಪಳದಿಂದ ಬೆಂಗಳೂರಿಗೆ ಸಂಪರ್ಕಿಸಲು ಸಾಧ್ಯವಾಗಲಿದೆ ಎಂದರು.

ಬೇಡಿಕೆಗಳು: ಗದಗ-ವಾಡಿ ರೈಲು ಯೋಜನೆ ತ್ವರಿತಗತಿಯಲ್ಲಿ ಪೂರ್ಣಗೊಳಿಸುವುದು. ಗದಗ- ವಾಡಿ ಯೋಜನೆ ಮುಂದುವರಿದ ಕಾಮಗಾರಿ ಕುಷ್ಟಗಿಯಿಂದ ಜುಮ್ಲಾಪೂರ ಕಾಮಗಾರಿ ವಿಳಂಬವಾಗಿದ್ದು ಕಾಮಗಾರಿ ವೇಗಗೊಳಿಸಬೇಕು. ಕುಷ್ಟಗಿಯಿಂದ ಬೆಂಗಳೂರು ರೈಲು ಸಂಚಾರ ಮುಂದಿನ ಜನವರಿ ಹೊಸ ವರ್ಷದಿಂದ ಆರಂಭಿಸಬೇಕು. ದರೋಜಿ-ಬಾಗಲಕೋಟೆ, ಕುಷ್ಟಗಿ-ನರಗುಂದ-ಘಟಪ್ರಭಾ ಹಾಗೂ ಗದಗ-ಕೃಷ್ಣಾಪುರ ಈ ಮಾರ್ಗ ರೈಲು ಯೋಜನೆ ಕೈಗೆತ್ತಿಕೊಳ್ಳಬೇಕು, ಕುಷ್ಟಗಿಯಿಂದ ಹುಬ್ಬಳ್ಳಿಗೆ ಇನ್ನೊಂದು ರೈಲು ಸಂಚಾರ ಸೇವೆ ಕಲ್ಪಿಸಬೇಕು ಎಂದು ತಿಳಿಸಿದರು.