3 ಎಕರೆ ಪ್ರದೇಶದಲ್ಲಿ ಸಸ್ಯ ಸಂಪತ್ತು ಬೆಳೆಸಿದ ಶಿಕ್ಷಕ

ಶರಣು ಸೊಲಗಿ

ಮುಂಡರಗಿಯ ಅನುದಾನರಹಿತ ಸ್ವಾಮಿ ವಿವೇಕಾನಂದ ಪ್ರೌಢಶಾಲೆಯ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಿರುವ ಗುಡದಪ್ಪ 15 ವರ್ಷಗಳ ಹಿಂದೆ ತಮ್ಮ ಹೊಲದಲ್ಲಿ 300ಕ್ಕೂ ಹೆಚ್ಚು ಗಿಡಗಳನ್ನು ನೆಟ್ಟಿದ್ದರು. ಪ್ರಾರಂಭದಲ್ಲಿ 1 ಕಿಮೀ ದೂರದಿಂದ ನೀರು ಹೊತ್ತು ತಂದು ಅವುಗಳಿಗೆ ಹಾಕಿ ಕಾಳಜಿಯಿಂದ ಬೆಳೆಸಿದ್ದಾರೆ. ಅದರ ಪರಿಣಾಮ ಈಗ ಕಾಣಬಹುದು. ಎಲ್ಲ ಮರ-ಗಿಡಗಳು ಹಸಿರಿನಿಂದ ಕಂಗೊ‍ಸುತ್ತಿವೆ. 110 ಬೇವಿನ ಗಿಡ, 63 ಹುಣಸೆ ಗಿಡ, 27 ನೀಲಗಿರಿ, 27 ಮಾವಿನ ಗಿಡ, 24 ಚಿಕ್ಕು, 22 ಸೀತಾಫಲ, 3 ನೇರಲೆ, 1 ಬಳೂಲ, 9 ಅಕೇಶಿಯಾ ಗಿಡಗಳನ್ನು ಬೆಳೆಸಿದ್ದಾರೆ.

ಆನಂತರದಲ್ಲಿ ತಮ್ಮ ಮನೆಯವರ ಅನುಮತಿ ಪಡೆದು ತಮ್ಮದೇ ಜಮೀನಿನಲ್ಲಿ ಸಸಿಗಳನ್ನು ತಂದು ನೆಟ್ಟರು. ಮಳೆ ಇಲ್ಲದ ವೇಳೆಯಲ್ಲಿ ಬೇರೆಡೆಯಿಂದ ಕೊಡದಲ್ಲಿ ಹೊತ್ತುತಂದು ನೀರು ಹಾಕಿ ಅವುಗಳನ್ನು ಬದುಕಿಸಿದರು. ಇನ್ನು ಕೆಲವೆಡೆ ಬೀಜಗಳನ್ನೇ ನೇರವಾಗಿ ಬಿತ್ತಿ ಗಿಡ-ಮರ ತಯಾರು ಮಾಡಿದ್ದಾರೆ.

ಹೊಲದಲ್ಲಿ ನೀರು ನಿಲ್ಲಲು ಅನೇಕ ಚಿಕ್ಕ ಚಿಕ್ಕ ಕಾಲುವೆಗಳನ್ನು ನಿರ್ಮಿಸಿದ್ದಾರೆ. ಜತೆಗೆ ಕಲ್ಲಿನ ಅಡತಡೆಗಳನ್ನು ಮಾಡಿ ನೀರು ನಿಲ್ಲುವಂತೆ ಮಾಡಿದ್ದಾರೆ. ಇವೆಲ್ಲದರ ಕಾಳಜಿಯಿಂದ ಹೊಲದಲ್ಲಿ ಬಿದ್ದ ನೀರು ಅಲ್ಲಿಯೇ ಇಂಗಿ ಗಿಡ-ಮರಗಳಿಗೆ ಅನುಕೂಲವಾಗುತ್ತಿದೆ. ರೈತರು ತಮಗಿರುವ ಜಮೀನುಗಳಲ್ಲಿ ಕೆಲವು ಗಿಡಮರಗಳನ್ನು ಬೆಳೆಸಿದರೆ ಅವು ಆಮ್ಲಜನಕದ ಕೇಂದ್ರಗಳಾಗಿ, ಪರಿಸರವನ್ನು ಸ್ವಚ್ಛಗೊಳಿಸಿ ತಾಪಮಾನ ಹತೋಟಿಗೆ ತರುವಲ್ಲಿ ಸಹಾಯಕವಾಗುತ್ತವೆ.ಬೈಫ್ ಸಂಸ್ಥೆಯವರು ನನ್ನಲ್ಲಿ ಗಿಡ-ಮರಗಳನ್ನು ಬೆಳೆಸುವ ಹುಚ್ಚು ಹಿಡಿಸಿದರು. ಪರಿಸರ ಸಂರಕ್ಷಣೆಗೆ ಗಿಡ-ಮರಗಳ ಪಾತ್ರ ಬಹುಮುಖ್ಯವಾಗಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಅರಣ್ಯ ಬೆಳೆಸಲು ಎಲ್ಲರೂ ಮುಂದಾಗಬೇಕು. ಶುದ್ಧ ಗಾಳಿ, ಉತ್ತಮ ಪರಿಸರಕ್ಕಾಗಿ ರೈತರಾದ ನಾವು ನಮ್ಮ ಜಮೀನಿನಲ್ಲಿ ಒಂದಿಷ್ಟು ಗಿಡ-ಮರಗಳನ್ನು ಬೆಳೆಸಿದರೆ ನಮ್ಮ ಮುಂದಿನ ಪೀಳಿಗೆಗೆ ಅನುಕೂಲವಾಗುತ್ತದೆ ಎಂದು ಶಿಕ್ಷಕ ಗುಡದಪ್ಪ ಲಿಂಗಶೆಟ್ಟರ ಹೇಳುತ್ತಾರೆ.