ಬಳಿಗಟ್ಟೆ ಸುತ್ತ ರಾತ್ರಿ ಬಂದೂಕುಧಾರಿಗಳಿಂದ ಓಡಾಟ: ಆತಂಕ

ಸಿರಿಗೆರೆ: ಸಮೀಪದ ಲಕ್ಷ್ಮೀಸಾಗರ (ರಾಷ್ಟ್ರೀಯ ಹೆದ್ದಾರಿ 48) ಸಮೀಪದ ಬಳ್ಳಿಗಟ್ಟೆ ಗ್ರಾಮದ ತೋಟದ ಆಸುಪಾಸುಗಳಲ್ಲಿ ರಾತ್ರಿ ವೇಳೆ ಬಂದೂಕುಧಾರಿಗಳು ಓಡಾಡುತ್ತಿರುವುದು ಅಲ್ಲಿನ ಜನರಲ್ಲಿ ಆತಂಕ ಸೃಷ್ಟಿಸಿದೆ.

ತೋಟದ ಸುತ್ತ ಬಳ್ಳಾರಿ ಜಾಲಿ ಮುಳ್ಳು ಬೆಳೆದಿದ್ದು, ಅಲ್ಲಿ ಸರಾಗವಾಗಿ ಓಡಾಡುವುದೇ ಕಷ್ಟ. ಹೀಗಿರುವಾಗ ಸೋಮವಾರ ರಾತ್ರಿ 5 ಜನ ಆಗಂತುಕರು ಈ ದಾರಿಯಲ್ಲಿ ಓಡಾಡಿರುವುದು ಅಲ್ಲಿನ ಸಿಸಿ ಟೀವಿಯಲ್ಲಿ ದಾಖಲಾಗಿದೆ. ಆಗಂತುಕರು ತಲೆಗೆ ಟಾರ್ಚ್‌ ಕಟ್ಟಿಕೊಂಡಿರುವುದು, ಮತ್ತೊರ್ವ ಹೆಗಲ ಮೇಲೆ ಬಂದೂಕು ಹೊತ್ತಿರುವುದು ನಿಚ್ಚಳವಾಗಿ ವಿಡಿಯೋದಲ್ಲಿ ದಾಖಲಾಗಿದೆ. ಉಳಿದವರು ಉದ್ದನೆಯ ಲಾಠಿ ಹಿಡಿದು ಓಡಾಡುತ್ತಿರುವ ದೃಶ್ಯವನ್ನು ನೋಡಬಹುದಾಗಿದೆ.

ವಿಷಯ ತಿಳಿದ ನಂತರ ಪೊಲಿಸ್‌ ಸಿಬ್ಬಂದಿ ಸ್ಥಳ ಪರಿಶೀಲನೆ ನಡೆಸಿದೆ. ಸೋಮವಾರ ರಾತ್ರಿ ಬಂದೂಕು ಮುಂತಾದ ಪರಿಕರ ಇಟ್ಟುಕೊಂಡು ಓಡಾಡಿರುವ ಜನರ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಸುತ್ತಲಿನ ಗ್ರಾಮದ ಜನರಿರುವಂತಿಲ್ಲ. ರಾತ್ರಿ ವೇಳೆಯಲ್ಲಿ ಪ್ರಾಣಿ ಪಕ್ಷಿಗಳ ಬೇಟೆಗಾಗಿ ಬಂದಿರಬಹುದೆಂದು ಅಂಜಾಜು ಮಾಡಿದ್ದೇವೆ. ಜೊತೆಗೆ ಇತ್ತೀಚೆಗೆ ಈ ಗ್ರಾಮಗಳ ಸುತ್ತಮುತ್ತ ಕಳ್ಳತನದ ಪ್ರಕರಣಗಳೂ ವರದಿಯಾಗಿಲ್ಲ ಎಂದು ಪ್ರಜಾವಾಣಿಗೆ ಭರಮಸಾಗರ ಠಾಣೆಯ ಇನ್ಸ್‌ಪೆಕ್ಟರ್‌ ರವಿನಾಯಕ್‌ ತಿಳಿಸಿದರು.