ಗುರು- ಶಿಷ್ಯರ ಸಮ್ಮಿಲನಕ್ಕೆ ಸಾಕ್ಷಿಯಾದ ಗುರು ವಂದನೆ

ಕುಂದಗೋಳ: ಗುರುವಿಗೆ ಶಿಷ್ಯಂದಿರರಿಂದ ವಿಶಿಷ್ಟ್ಯ ಗುರುವಂದನೆಗೆ ಪಟ್ಟಣದ ಗಾಂಧಿ ಹಿಂದಿ ವಿದ್ಯಾಪೀಠದ ಆವರಣ ಭಾನುವಾರ ಸಾಕ್ಷಿಯಾಗಿತ್ತು.

ಪಟ್ಟಣದ ಗಾಂಧಿ ಹಿಂದಿ ವಿದ್ಯಾಪೀಠವು ಹಿರಿಯ ಪ್ರಾಥಮಿಕ ಶಾಲೆಯನ್ನು ಹೊಂದಿದೆ. 1ರಿಂದ 8ನೆಯ ತರಗತಿವರೆಗೆ ಇಲ್ಲುಂಟು. 1986ರಿಂದ 2004ರವರೆಗೆ ಈ ಶಾಲೆಯಲ್ಲಿ ಕಲಿತಿರುವ ವಿವಿಧ ಬ್ಯಾಚ್‌ಗಳ ವಿದ್ಯಾರ್ಥಿಗಳು ಸೇರಿಕೊಂಡು ಹಳೇ ವಿದ್ಯಾರ್ಥಿಗಳ ಸಂಘ ಮಾಡಿಕೊಂಡಿದ್ದಾರೆ. ಈ ಸಂಘದಿಂದ ಭಾನುವಾರ ಗುರುವಂದನೆ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿದ್ದ ಅಭಿನವ ಬಸವಣ್ಣಜ್ಜ ಮಹಾಸ್ವಾಮಿಗಳು, ಶಿವಾನಂದ ಮಹಾಸ್ವಾಮಿಗಳು ಮಾತನಾಡಿ, ಗುರು- ಶಿಷ್ಯರೆಂದರೆ ಎಂದರೆ ಗೋವಿಂದಭಟ್‌- ಶಿಶುನಾಳ ಶರೀಫ್‌, ಸಿದ್ಧಾರೂಢರು- ಗುರುನಾಥರೂಢರಂತೆ ಇರಬೇಕು. ಅದರಂತೆ ಇಂದಿನ ಮಕ್ಕಳು ತಮ್ಮ ಗುರು ಬಾಂಧವ್ಯವನ್ನು ಹೊಂದಿರಬೇಕು. ಆಗ ಕಲಿಸಿದ ಗುರುಗಳನ್ನು ನೆನಪಿಸಿಕೊಂಡು ಬಂದು ಸನ್ಮಾನಿಸಿ ಗೌರವಿಸುತ್ತಿರುವುದು ಸಂತಸಕರ ಎಂದು ಕಾರ್ಯಕ್ರಮವನ್ನು ಶ್ಲಾಘಿಸಿದರು.

ಮುಖಂಡ ಡಾ. ಅರವಿಂದ ಕಟಗಿ ಮಾತನಾಡಿ, ಗುರುಶಿಷ್ಯ ಪರಂಪರೆ ಮೊದಲಿನಿಂದಲೂ ನಡೆದುಕೊಂಡು ಬಂದಿದೆ. ಹಳೆ ವಿದ್ಯಾರ್ಥಿಗಳು ದೊಡ್ಡ ದೊಡ್ಡ ಹುದ್ದೆಯಲ್ಲಿದ್ದರೂ ಎಳ್ಳಷ್ಟೂ ಅಹಂಕಾರವಿಲ್ಲದೆ, ವಿನಮ್ರ ರೀತಿಯಲ್ಲಿ ಕುಳಿತು ಗುರುಗಳಿಗೆ ಮತ್ತು ಗುರು ಮಾತೆಯರಿಗೆ ಸನ್ಮಾನಿಸುತ್ತಿರುವುದು ಶ್ಲಾಘನೀಯ ಎಂದು ಹೇಳಿದರು.

ಸನ್ಮಾನ: ಹಳೆಯ ವಿದ್ಯಾರ್ಥಿ ಮೃತ್ಯುಂಜಯ ಜಡಿಮಠ ಸಂಸ್ಥೆಗೆ 25 ಸಾವಿರ ರೂಪಾಯಿ ದೇಣಿಗೆ ನೀಡಿದರು. ಸಮಾರಂಭದಲ್ಲಿ ಮುಖ್ಯ ಶಿಕ್ಷಕ ಗುರುಸ್ವಾಮಿ ಬಾಳಿಹಳ್ಳಿಮಠ, ಅಕ್ಕಮ್ಮ ಸುಣಗಾರ, ಬಿ.ಪಿ. ಅಂಗಡಿ, ಗೀತಾ ಬ್ಯಾಲಾಳ, ಜ್ಯೋತಿ ಪರಕಾಳೆ, ಶಹಶಾಜಾನ್‌ ಗೂಡವಾಲೆ, ಇಕ್ಬಾಲ್ ಉಡುಪಿ, ವಿ.ಎಂ. ಪಾಟೀಲ, ಎಚ್‌.ಐ. ತೇರದಾಳ, ಎನ್.ಕೆ. ಗುಣಕಿ, ಎ.ಬಿ. ಕುಂಬಾರ, ಸುವರ್ಣ ಅಳಗೋಡಿ, ಚನ್ನಯ್ಯಾ ಪಾಟೀಲ, ಶಾರದಾ ನಂದಿಮಠ, ಅಂಬಿಕಾ ಕುಲಕರ್ಣೀ, ಎಂ.ಜೆ. ಜಡಿಮಠ, ಶಿವಕಾಂತಾ ಬಂಡಗಾರ, ಬಿ.ಪಿ. ಅಂಗಡಿ, ಮಹಾದೇವ ಬೆಳಗಲಿ, ಎಸ್.ಎಸ್. ನಾಗಶೆಟ್ಟಿ, ಎಚ್‌.ಐ. ತೇರದಾಳ, ಜಿ.ಎಂ. ನಂದಿಮಠ ಮತ್ತಿತರರನ್ನು ಸನ್ಮಾನಿಸಲಾಯಿತು.