ಗುರುಗುಂಟಾ ಅಮರೇಶ್ವರ ಜಾತ್ರೆ: ಜಾನುವಾರು ವಹಿವಾಟು ದುಬಾರಿ

ಕನ್ನಡಪ್ರಭ ವಾರ್ತೆ ಲಿಂಗಸುಗೂರು

ಎತ್ತುಗಳಲ್ಲಿ ನಾನಾ ತಳಿಗಳಿವೆ ಪ್ರಮುಖವಾಗಿ ಜವಾರಿ, ಸೀಮೆ, ಕಿಲಾರಿ, ಮೈಸೂರು ಕಿಲಾರಿ, ಮಾಳಪಡಿ, ಜಮಖಂಡಿ ಸೇರಿದಂತೆ ಇವೆ. ಕಲ್ಲು ಅಡವಿ, ಕೆಂಪು ಮಣ್ಣಿನ ರೈತರು ಜವಾರಿ ತಳಿಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಕೊಳ್ಳುತ್ತಾರೆ. ಇನ್ನೂ ಎರೆನಾಡಿನ ರೈತರು ದೊಡ್ಡ ಗಾತ್ರದ ಎತ್ತುಗಳ ಅಗತ್ಯ ಇರುತ್ತದೆ.

ಜಾನುವಾರುಗಳ ಜಾತ್ರೆಯಲ್ಲಿ ಕರ್ನಾಟಕ, ಆಂಧ್ರ, ಮಹಾರಾಷ್ಟ್ರದ ಜೊತೆಗೆ ವಿಜಯಪುರ, ಬಾಗಲಕೋಟೆ, ಜಮಖಂಡಿ, ದಾವಣಗೆರೆ ಸೇರಿದಂತೆ ಪ್ರಮುಖ ಪ್ರದೇಶಗಳಿಂದ ಎತ್ತುಗಳ ಖರೀದಿದಾರರು, ದಲ್ಲಾಳಿಗಳು ಆಗಮಿಸಿದ್ದರಿಂದ ಜಾತ್ರೆಯಲ್ಲಿ ಎತ್ತುಗಳ ಮಾರಾಟ ಜೋರಾಗಿ ನಡೆದಿದೆ.

ಜಾತ್ರೆಯಲ್ಲಿ ಎತ್ತುಗಳ ಮಾರಾಟ, ಖರೀದಿ ಜೋರಾಗಿ ನಡೆಯುತ್ತಿದೆ. ಆದರೆ ಭಾರಿ ಬಿಸಿಲು ಜಾತ್ರೆಗೆ ಬಂದ ದನ-ಕರುಗಳು ಹೈರಾಣಾಗಿದ್ದರೆ, ರೈತರು ತೀವ್ರ ಬಸವಳಿದಿದ್ದಾರೆ. ಕೆಲವರು ಶಾಮಿಯಾನ, ಪ್ಲಾಸ್ಟಿಕ್ ಚೀಲದ ಮೂಲಕ ನೆರಳು ಮಾಡಿಕೊಂಡು ಕುಳಿತಿದ್ದು, ಭಾರಿ ಬಿಸಿಲು ಜಾತ್ರೆಗೆ ಬಂದ ಜನರ ಜೀವ ಹಿಂಡುತ್ತಿದೆ.

ಇನ್ನೂ ಕೃಷಿಪರಿಕರಗಳ ಮಾರಾಟ ಜೋರಾಗಿ ನಡೆದಿದೆ. ಒಕ್ಕಲುತನ ಸಾಮಾನುಗಳ ಮಳಿಗೆಗಳು ಅಪಾರ ಸಂಖ್ಯೆಯಲ್ಲಿ ಹಾಕಲಾಗಿದೆ. ಜಾನುವಾರುಗಳಿಗೆ ಅಲಂಕಾರಿಕ ವಸ್ತುಗಳು ಸೇರಿದಂತೆ ಚಕ್ಕಡಿ, ಗಳೆದ ಸಾಮಾನು, ಬಿತ್ತುವ, ರಾಶಿ ಮಾಡುವ ಸಲಕರಣೆಗಳು, ಕುಂಟೆ-ರಂಟೆ, ನೇಗಿಲು, ಕುಡಗೋಲು, ಗುದ್ದಲಿ, ಪಕಾಶಿ, ಆರೆ, ಸುತ್ತಿಗೆ, ಸಲಾಕೆ, ಬಿದುರಿನಬುಟ್ಟಿ, ಕುಡ, ಬಳೆ, ಬಾಣ್ಣಿ, ಹಗ್ಗ, ಚಿಕ್ಕ, ಹಣೆಗೆಜ್ಜೆ, ಕೊರಳುಗೆಜ್ಜೆ, ಗಂಟೆ, ಗಲಿಫ್ ಒಕ್ಕಲುತನಕ್ಕೆ ಸಂಬಂಧಿಸಿದ ಎಲ್ಲಾ ಸಾಮಾನುಗಳ ಜಾತ್ರೆಯಲ್ಲಿ ದೊರೆಯುತ್ತವೆ. ಬರಗಾಲ ಇದ್ದರೂ ಉತ್ತಮ ಮಾರಾಟ ಇದೆ ಎಂದು ಎತ್ತುಗಳ ಅಲಂಕಾರಿಕ ವಸ್ತುಗಳ ತಯಾರಿಸಿ ಮಾರಾಟ ಮಾಡುವ ವಿಲಾಸ ಗುರುಗುಂಟಿ ತಿಳಿಸಿದರು.