ಅವಸರದಿಂದ ಅನುವಾದಿಸಿದರೆ ಮೂಲ ಸಾಹಿತ್ಯಕ್ಕೆ ಧಕ್ಕೆ: ಜಾಜಿ ದೇವೇಂದ್ರಪ್ಪ

ಹೊಸಪೇಟೆ: ಭಾಷೆಯ ಮಹತ್ವ, ಸಾಹಿತ್ಯ ತಿಳಿದು ಅನುವಾದಿಸಬೇಕು. ಅವಸರದಿಂದ ಅನುವಾದಿಸಿದರೆ ಮೂಲ ಸಾಹಿತ್ಯಕ್ಕೆ ಧಕ್ಕೆಯಾಗಲಿದೆ ಎಂದು ಗಂಗಾವತಿಯ ಎಸ್ ಕೆಎನ್ ಜಿ ಕಾಲೇಜಿನ ಸಹ ಪ್ರಾಧ್ಯಾಪಕ ಡಾ.ಜಾಜಿ ದೇವೇಂದ್ರಪ್ಪ ಹೇಳಿದರು.

ಭಾಷೆ, ಜ್ಞಾನ ಇದ್ದ ಕೂಡಲೇ ಅನುವಾದಕರಾಗಲು ಸಾಧ್ಯವಿಲ್ಲ. ಬಹುತ್ವ ಭಾರತದಲ್ಲಿ ಅನುವಾದ ಎನ್ನುವುದು ಭಿನ್ನ ಮಾದರಿಯಾಗಿದ್ದು, ಪ್ರಾದೇಶಿಕ ಭಾಷೆಗಳು ತುಂಬ ಕಠಿಣವಾಗಿವೆ. ಇತ್ತೀಚಿನ ದಿನಗಳಲ್ಲಿ ಹಲವಾರು ಜನ ಯಥಾವತ್ತಾಗಿ ಸಿದ್ಧಾಂತಗಳನ್ನು ಓದಿ ಅನುವಾದ ಮಾಡುತ್ತಾರೆ. ಸಿದ್ಧಾಂತಗಳೇ ಬೇರೆ ಪ್ರಾಯೋಗಿಕವೇ ಬೇರೆಯಾಗಿದೆ. ಇನ್ನು ಭಾಷಾಂತರ ಮೂಲಕವೇ ಹೊಸ ಲೋಕ ಸೃಷ್ಟಿ ಮಾಡಬೇಕು. ಈ ನಿಟ್ಟಿನಲ್ಲಿ ಭಾಷಾಂತರ ವಿಭಾಗದಿಂದ ಹಲವಾರು ಭಾಷಾ ಕೃತಿಗಳು ಬಂದಿದ್ದು, ಇವು ಸಂಶೋಧನೆ ಸಂಬಂಧಿಸಿದಂತೆ ಮಾತ್ರ ಬರುತ್ತಿವೆ. ಅದರ ಆಚೆಗೂ ಬರಬೇಕು ಎಂದರು.

ಭಾಷಾಂತರ ಅಧ್ಯಯನ ವಿಭಾಗದ ಮುಖ್ಯಸ್ಥರು ಹಾಗೂ ಐಕ್ಯೂಎಸಿ ಘಟಕದ ನಿರ್ದೇಶಕ ಡಾ.ಎ. ಮೋಹನ್ ಕುಂಟಾರ್ ಪ್ರಾಸ್ತಾವಿಕ ಮಾತನಾಡಿದರು. ಐಕ್ಯೂಎಸಿ ಘಟಕದ ಉಪನಿರ್ದೇಶಕಿ ಪ್ರಭಾ ಡಿ. ಇದ್ದರು.