ಕಾಮನ್ ಪುಟಕ್ಕೆ, ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ ಹಾಗೂ ಜೀಪ್ ಮಧ್ಯೆ ಮುಖಾಮುಖಿ ಡಿಕ್ಕಿ: ನಾಲ್ವರು ಕೂಲಿ ಕಾರ್ಮಿಕರ ದುರ್ಮರಣ

ಕನ್ನಡಪ್ರಭ ವಾರ್ತೆ ಹುಣಸೂರು

ಮಂಗಳವಾರ ಬೆಳಗ್ಗೆ 9ರ ಸಮಯದಲ್ಲಿ ಪಟ್ಟಣದದ ಬೈಪಾಸ್ ರಸ್ತೆ (ರಾಷ್ಟ್ರೀಯ ಹೆದ್ದಾರಿ 275)ಯ ಅಯ್ಯಪ್ಪಸ್ವಾಮಿ ಬೆಟ್ಟದ ತಪ್ಪಲಿನಲ್ಲಿ ದುರ್ಘಟನೆ ಸಂಭವಿಸಿದೆ. ಜೀಪಿನಲ್ಲಿ 9 ಮಂದಿ ಪ್ರಯಾಣಿಸುತ್ತಿದ್ದರು. ಮೃತರು ಎಚ್.ಡಿ. ಕೋಟೆ ತಾಲೂಕಿನ ಅಂತರಸಂತೆ ಹೋಬಳಿ ವ್ಯಾಪ್ತಿಯ ದಮ್ಮನಕಟ್ಟೆ ಮತ್ತು ಜೀಯಾರ ನಿವಾಸಿಗಳಾಗಿದ್ದಾರೆ. ದಮ್ಮನಕಟ್ಟೆಯ ಲೋಕೇಶ್ (40), ರಾಜು (38), ಸೋಮೇಶ್ (45) ಮತ್ತು ಜೀಪ್ ಚಾಲಕ ಮನು (28) ಮೃತಪಟ್ಟವರಾಗಿದ್ದಾರೆ.

ಘಟನೆ ವಿವರ: ಎಚ್.ಡಿ. ಕೋಟೆಯ ಕೃಷಿ ಕಾರ್ಮಿಕರು ಪಿರಿಯಾಪಟ್ಟಣ ಮತ್ತು ಕುಶಾಲನಗರದ ವಿವಿಧ ಗ್ರಾಮಗಳಲ್ಲಿ ಶುಂಠಿ ಕೃಷಿ ಜಮೀನಿನಲ್ಲಿ ಕೆಲಸಕ್ಕೆ ತಮ್ಮೂರಿದ್ದೇ ಜೀಪಿನಲ್ಲಿ ತೆರಳಿದ್ದರು. ಪಟ್ಟಣದ ಅಯ್ಯಪ್ಪಸ್ವಾಮಿ ಬೆಟ್ಟದ ತಪ್ಪಲಿನ ತಿರುವಿನಲ್ಲಿ ವಿರಾಜಪೇಟೆಯಿಂದ ಬೆಂಗಳೂರಿಗೆ ತೆರಳುತ್ತಿದ್ದ ಕೆ.ಎಸ್.ಆರ್.ಟಿ.ಸಿ.ಯ ಎಲೆಕ್ಟ್ರಿಕ್ (ಇವಿ) ಪವರ್ ಪ್ಲಸ್ ಬಸ್ ನೇರವಾಗಿ ಜೀಪಿಗೆ ಡಿಕ್ಕಿ ಹೊಡೆದಿದೆ. ಡಿಕ್ಕಿ ಹೊಡೆದ ರಭಸಕ್ಕೆ ಜೀಪ್ ಉಲ್ಟಾ ತಿರುಗಿ 50 ಮೀಟರ್ ದೂರ ಬಿದ್ದಿದೆ. ಜೀಪಿನ ಟಾಪ್ ಕಿತ್ತು ಹೋಗಿ ಇಡೀ ಜೀಪ್ ನುಜ್ಜುಗುಜ್ಜಾಗಿದೆ. ಜೀಪಿನಿಂದ 2-3 ದೇಹಗಳು ರಸ್ತೆಯ ಮೇಲೆ ಮಾಂಸದ ಮುದ್ದೆಯಾಗಿ ಬಿದ್ದಿದೆ. ಈ ಪೈಕಿ ಮೃತರೊಬ್ಬರ ತಲೆಯ ಮೆದುಳು ರಸ್ತೆ ಬದಿಗೆ ಚೆಲ್ಲಾಪಿಲ್ಲಿಯಾಗಿ ಬಿದ್ದಿರುವುದನ್ನು ಕಂಡು ಜನತೆ ಹೌಹಾರಿದರು. ಜೀಪಿನ ಎರಡು ಚಕ್ರಗಳು ಕಳಚಿ ಉರುಳಿವೆ. ಇಡೀ ರಸ್ತೆಯ ತುಂಬೆಲ್ಲಾ ರಕ್ತದ ಓಕುಳಿ ಹರಿದಾಡಿದೆ. ಬಸ್ ನ ಚಾಲಕ ಕೂರುವ ಸ್ಥಳವು ಕಿತ್ತು ಹೋಗಿದೆ. ಹುಣಸೂರು ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಬಸ್ ಮತ್ತು ಜೀಪನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.