ಅಪಘಾತಗಳ ಹಾಟ್‌ಸ್ಪಾಟ್ ಅರಬೈಲ್ ಘಟ್ಟ!

ಶಂಕರಭಟ್‌ ತಾರೀಮಕ್ಕಿ ಯಲ್ಲಾಪುರ

ಬಳ್ಳಾರಿ-ಕಾರವಾರ ರಾಷ್ಟ್ರೀಯ ಹೆದ್ದಾರಿ ಗುಣಮಟ್ಟದ ಹೆದ್ದಾರಿಯಾಗಿ ಗುರುತಿಸಿಕೊಳ್ಳುವಲ್ಲಿ ವಿಫಲವಾಗುತ್ತಲೇ ಇರುವುದಕ್ಕೆ ಬೇರೆ ಬೇರೆ ಕಾರಣಗಳಿವೆ. ಹೆದ್ದಾರಿಯು ಕಡಿದಾದ ಅರಣ್ಯ, ಬೆಟ್ಟ, ಗುಡ್ಡಗಳ ನಡುವೆ ಸಾಗಿಹೋಗಿದ್ದು, ವರ್ಷದಿಂದ ವರ್ಷಕ್ಕೆ ವಾಹನಗಳ ಸಂಖ್ಯೆ ಹೆಚ್ಚುತ್ತಿದ್ದರೂ ಹೆದ್ದಾರಿ ಅಗಲೀಕರಣ ಸಾಧ್ಯ ಆಗದಿರುವುದು, ಪರಿಸರ ನಾಶದ ಭಯವೂ ಕಾರಣವಾಗಿದ್ದು, ಚತುಷ್ಪಥ ಆಗಬೇಕಿದ್ದ ಹೆದ್ದಾರಿ ಇನ್ನೂ ಕಿರಿದಾದ ರಸ್ತೆಯಲ್ಲಿಯೆ ಮುಂದುವರಿದಿದೆ.

೪೧ ಜನರ ಬಲಿ: ಕಳೆದ ೫ ವರ್ಷಗಳಲ್ಲಿ ೪೧ ಜನರ ಬಲಿ ಪಡೆದ ಹೆದ್ದಾರಿ ಹಲವು ಕುಟುಂಬಗಳು ಬೀದಿಪಾಲಾಗಲು ಕಾರಣವಾಗಿದೆ. ೨೦೨೦ರಲ್ಲಿ ೨೯ ಅಪಘಾತ ೭ ಸಾವು, ೨೦೨೧ರಲ್ಲಿ ೪೭ ಅಪಘಾತ ೮ ಸಾವು, ೨೦೨೨ರಲ್ಲಿ ೪೯ ಅಪಘಾತ ೬ ಸಾವು, ೨೦೨೩ರಲ್ಲಿ ೪೦ ಅಪಘಾತ ೩ ಸಾವು, ೨೦೨೪ರಲ್ಲಿ ೩೪ ಅಪಘಾತ ೬ ಸಾವು, ೨೦೨೫ರಲ್ಲಿ ೧೩ ಅಪಘಾತ ೧೧ ಸಾವು ಕಂಡಿದೆ.

೧೧ ಜನರ ಸಾವು: ೨೦೨೫ರ ಪ್ರಾರಂಭದಲ್ಲಿ ಸಂತೆಗೆ ವ್ಯಾಪಾರಕ್ಕೆಂದು ತೆರಳುತ್ತಿದ್ದ ತರಕಾರಿ ವ್ಯಾಪಾರಸ್ಥರ ಲಾರಿ ಅಪಘಾತ ಅತಿ ಭೀಕರವಾದದ್ದು. ಈ ಅಪಘಾತದಲ್ಲಿ ೧೧ ಜನ ಅಸು ನೀಗಿದ್ದರು. ಒಂದೇ ಅಪಘಾತದಲ್ಲಿ ಇಷ್ಟೊಂದು ಸಾವು ಸಂಭವಿಸಿದ್ದು ತಾಲೂಕಿನ ಇತಿಹಾಸದಲ್ಲಿಯೇ ಪ್ರಥಮವೆನಿಸಿದೆ.

ತಾಲೂಕಿನ ಕಿರವತ್ತಿಯಲ್ಲಿಯೂ ಹಾದು ಹೋದ ರಾಷ್ಟ್ರೀಯ ಹೆದ್ದಾರಿಯ ಅಂಚಿನಲ್ಲಿ ಸುರಕ್ಷತಾ ಕಾರಣಗಳಿಗಾಗಿ ಗೂಡಂಗಡಿ ತೆರವು ಮಾಡುವ ಪ್ರಕ್ರಿಯೆ ನಡೆದಿತ್ತು. ಅಲ್ಲಿ ವಾಹನ ನಿಲುಗಡೆ ಮಾಡುವುದರಿಂದ ಸಂಚಾರಕ್ಕೆ ಅಡಚಣೆಯಾಗುತ್ತಿದೆ. ಅಂತಹ ಪ್ರದೇಶದಲ್ಲಿ ಅವಧಿ ಮೀರಿ ವಾಹನ ನಿಲುಗಡೆಗೆ ಅವಕಾಶ ನೀಡಬಾರದು ಎಂಬ ಅಭಿಪ್ರಾಯ ಕೇಳಿಬರುತ್ತಿದೆ. ರಸ್ತೆಯ ಅನೇಕ ಕಡೆ ಅಳವಡಿಸಲಾದ ಹಂಪ್‌ಗಳಿಗೆ ಬಣ್ಣ ಬಳಿಯದಿರುವುದು ಕೂಡಾ ಕೆಲವೊಮ್ಮೆ ಅಪಘಾತಗಳಿಗೆ ಕಾರಣವಾಗುತ್ತಿದೆ.

ಹೆದ್ದಾರಿಯು ಅಧಿಕ ಕಡಿದಾದ ತಿರುವು ಹೊಂದಿದ್ದು, ಚಾಲಕರು ಜಾಗ್ರತೆಯಿಂದ ಚಾಲನೆ ಮಾಡಬೇಕು. ಅಪಘಾತಗಳಿಗೆ ವಿವಿಧ ಕಾರಣಗಳಿದ್ದರೂ ಜಾಗ್ರತೆ, ನಿಯಮಪಾಲನೆ, ಸುರಕ್ಷಿತ ಚಾಲನೆಗಳಿಂದ ಅಪಘಾತ ತಪ್ಪಿಸಬಹುದಾಗಿದೆ. ನಿದ್ದೆ ಮಂಪರಿನಲ್ಲಿ ಅಥವಾ ಕುಡಿದ ಮತ್ತಿನಲ್ಲಿ ಚಾಲನೆಯಿಂದ ಅರಬೈಲ್ ಘಟ್ಟದಲ್ಲಿ ಅಪಾಯ ಕಟ್ಟಿಟ್ಟ ಬುತ್ತಿಯಾಗಿದ್ದು, ಮನೆಯಲ್ಲಿ ನಿಮಗಾಗಿ ಕುಟುಂಬ ಕಾಯುತ್ತಿರುತ್ತದೆ ಎಂಬ ಭಯವಿರಲಿ ಎಂದು ಯಲ್ಲಾಪುರ ಸಂಚಾರಿ ವಿಭಾಗದ ಪಿಎಸ್‌ಐ ಸಿದ್ದು ಗುಡಿ ಹೇಳಿದರು.