ಎಚ್‌ಎಸ್‌ಆರ್‌ಪಿ ನಂಬರ್ ಪ್ಲೇಟ್: ಕೊಡಗಿನಲ್ಲಿ ಕೇವಲ ಶೇ.೨೦ ಪ್ರಗತಿ

ವಿಘ್ನೇಶ್ ಎಂ. ಭೂತಕಾಡು

ಹಳೆಯ ವಾಹನಗಳಿಗೆ ಎಚ್.ಎಸ್.ಆರ್.ಪಿ ನಂಬರ್ ಪ್ಲೇಟ್ ಮಾಡಿಸಲು ಕೊಡಗಿನ ವಾಹನ ಮಾಲೀಕರು ಸಮಸ್ಯೆಗೆ ಸಿಲುಕಿದ್ದಾರೆ. ಇದರಿಂದ ಜಿಲ್ಲೆಯಲ್ಲಿ ನೋಂದಣಿ ಕಾರ್ಯ ನಿರೀಕ್ಷೆಯಷ್ಟು ಪ್ರಗತಿ ಕಂಡಿಲ್ಲ. ಜಿಲ್ಲೆಯಲ್ಲಿ ಕೇಂದ್ರಗಳು ಕೂಡ ಇಲ್ಲದಿರುವುದರಿಂದ ವಾಹನ ಮಾಲೀಕರು ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಹೈ ರೆಸಲ್ಯೂಷನ್ ನಂಬರ್ ಪ್ಲೇಟ್ ಬಗ್ಗೆ ಜನರಲ್ಲಿ ಸಾಕಷ್ಟು ಗೊಂದಲವಿದೆ. ಕೊಡಗಿನಲ್ಲಿ ಈ ಬಗ್ಗೆ ಹಲವರಿಗೆ ಮಾಹಿತಿಯ ಕೊರತೆಯೂ ಕಂಡುಬಂದಿದೆ. ಗ್ರಾಮೀಣ ಭಾಗದ ಜನರಿಗೂ ಕೂಡ ನೋಂದಣಿ ಮಾಡಿಸಲು ಅನಾನುಕೂಲ ಉಂಟಾಗಿದೆ. 2019ರ ಏ.1ಕ್ಕಿಂದ ಮೊದಲು ಖರೀದಿಸಿದ ವಾಹನಗಳಿಗೆ ಎಚ್‌ಎಸ್‌ಆರ್‌ಪಿ ನಂಬರ್‌ ಪ್ಲೇಟ್‌ ಅಳವಡಿಕೆ ನೋಂದಣಿಗೆ ಸರ್ಕಾರದ ಸೂಚನೆಯಂತೆ ಫೆ.17 ಗಡುವು. ಆದರೆ ಕೊಡಗಿನಲ್ಲಿ ಶೇ.80ರಷ್ಟು ಹಳೆ ವಾಹನಗಳ ನಂಬರ್ ಪ್ಲೇಟ್ ಇನ್ನೂ ಬದಲಾಗಿಲ್ಲ. ಹೊಸ ನಂಬರ್ ಪ್ಲೇಟ್ ಮಾಡಿಸಲು ವಾಹನ ಮಾಲೀಕರು ಮನಸ್ಸು ಮಾಡುತ್ತಿಲ್ಲ.

ಕಾಡುವ ಸರ್ವರ್‌ ಸಮಸ್ಯೆ: ಆನ್ ಲೈನ್ ಮೂಲಕ ಹಳೆ ವಾಹನಗಳಿಗೆ ಎಚ್.ಎಸ್.ಆರ್.ಪಿ ನಂಬರ್ ಪ್ಲೇಟ್ ನೋಂದಣಿ ಕಾರ್ಯ ಆಗುತ್ತಿರುವುದರಿಂದ ಆಗಾಗ್ಗೆ ಸರ್ವರ್ ಸಮಸ್ಯೆಯೂ ಎದುರಾಗುತ್ತಿದೆ. ಅಲ್ಲದೆ ಫೆ.17ರಂದು ನೋಂದಣಿ ಮಾಡಿಸಿಕೊಳ್ಳಲು ಕೊನೆಯ ದಿನವಾಗಿರುವುದರಿಂದ ವಾಹನ ಮಾಲೀಕರು ಮುಗಿ ಬೀಳುತ್ತಿದ್ದಾರೆ. ಇದರಿಂದ ಒತ್ತಡ ಹೆಚ್ಚಾಗಿದೆ ಎನ್ನಲಾಗುತ್ತಿದೆ. ಕೇಂದ್ರ ಹೆದ್ದಾರಿ ಮತ್ತು ರಸ್ತೆ ಸಾರಿಗೆ ಸಚಿವಾಲಯ ಈ ಆದೇಶವನ್ನು ಹೊರಡಿಸಿದ್ದು, ಅತಿ ಸುರಕ್ಷಿತ ನೋಂದಣಿ ಫಲಕ ಕಡ್ಡಯಗೊಳಿಸಿದೆ. 2019ರ ಎಪ್ರಿಲ್ 1ರಿಂದ ಅನುಷ್ಠಾನಕ್ಕೆ ಬಂದಿದೆ. ಆದರೆ ಅದಕ್ಕಿಂತ ಮೊದಲು ನೋಂದಣಿಯಾಗಿದ್ದ ವಾಹನಗಳಗೂ ಎಚ್.ಎಸ್.ಆರ್.ಪಿ. ಅವಳಡಿಸಲಾಗುತ್ತಿದೆ.

ಹಳೆ ವಾಹನಗಳಿಗೆ ಎಚ್.ಎಸ್.ಆರ್.ಪಿ. ನಂಬರ್ ಪ್ಲೇಟ್ ಬದಲಿಸಲು ಸರ್ಕಾರ ನೀಡಿರುವ ಸಮಯ ಹತ್ತಿರ ಬರುತ್ತಿದೆ. ಆದರೂ ಕೂಡ ಕೊಡಗಿನಲ್ಲಿ ವಾಹನ ಮಾಲೀಕರು ಈ ಬಗ್ಗೆ ಅಷ್ಟಾಗಿ ಆಸಕ್ತಿ ತೋರಿಲ್ಲ. ಪ್ರಾದೇಶಿಕ ಸಾರಿಗೆ ಇಲಾಖೆ ಅಧಿಕಾರಿಗಳು ಕೂಡ ಈ ಬಗ್ಗೆ ಯಾವುದೇ ಮಾಹಿತಿ ಹಾಗೂ ಜಾಗೃತಿ ಮೂಡಿಸದಿರುವುದು ಜನರಲ್ಲಿ ಗೊಂದಲ ಮೂಡಿಸಿದೆ.----------ಎಚ್.ಎಸ್.ಆರ್.ಪಿ ನಂಬರ್ ಪ್ಲೇಟ್ ಕಡ್ಡಾಯವಾಗಿ ವಾಹನಗಳಿಗೆ ಅಳವಡಿಸಬೇಕೆಂದು ಕೇಂದ್ರದ ಸೂಚನೆಯಿದೆ. ಅದರಂತೆ ಆನ್ಲೈನ್ ಮೂಲಕ ನಾವೂ ಕೂಡ ಬುಕ್ಕಿಂಗ್‌ ಮಾಡಿ ನಮ್ಮ ವಾಹನಗಳನ್ನು ಅಳವಡಿಸುತ್ತಿದ್ದೇವೆ. ಫೆ.17ರಂದು ಕಡೆಯ ದಿನವಾಗಿದ್ದು, ದಿನಾಂಕ ವಿಸ್ತರಿಸುವ ಬಗ್ಗೆ ಚಿಂತನೆ ಸರ್ಕಾರದ ಹಂತದಲ್ಲಿದೆ.