ತಾಕತ್ತಿದ್ದರೆ ಮನೆಗಳ ಮೇಲಿನ ಧ್ವಜ ‘ಕೈ’ ಇಳಿಸಲಿ: ಡಾ.ಎಸ್.ಎನ್.ಇಂದ್ರೇಶ್ ಸವಾಲು

ಕನ್ನಡಪ್ರಭ ವಾರ್ತೆ ಮಂಡ್ಯಕಾಂಗ್ರೆಸ್ ಸರ್ಕಾರದಿಂದ ಒಂದೇ ಒಂದು ಧ್ವಜ ಇಳಿಸಲು ಮಾತ್ರ ಸಾಧ್ಯವಾಗಿದೆ. ಹಿಂದೂ ಕಾರ್ಯಕರ್ತರು ಲಕ್ಷಾಂತರ ಮನೆಗಳ ಮೇಲೆ ಧ್ವಜ ಕಟ್ಟುತ್ತಾರೆ ಎನ್ನುವುದಕ್ಕೆ ಇವತ್ತಿನ ಅಭಿಯಾನ ಸಾಕ್ಷಿಯಾಗಿದೆ. ಕಾಂಗ್ರೆಸ್‌ನವರಿಗೆ ತಾಕತ್ತಿದ್ದರೆ ಇಳಿಸಲಿ ನೋಡೋಣ ಎಂದು ಬಿಜೆಪಿ ಜಿಲ್ಲಾಧ್ಯಕ್ಷ ಡಾ.ಎನ್.ಎಸ್.ಇಂದ್ರೇಶ್ ಸವಾಲು ಹಾಕಿದರು.

ಹನುಮನ ಶಕ್ತಿ ರಾಜ್ಯಾದ್ಯಂತ ಹೇಗೆ ವಿಸ್ತರಣೆಯಾಗಲಿದೆ ಎಂಬುದನ್ನು ಕಾಂಗ್ರೆಸ್ ಸರ್ಕಾರ ಕಾದುನೋಡಲಿ. ಸಿದ್ದರಾಮಯ್ಯನವರು ಕುಂಕುಮ ಇಟ್ಟುಕೊಳ್ಳದಿರಬಹುದು, ಕೇಸರಿ ಶಾಲು ಹಾಕಿಕೊಳ್ಳದಿರಬಹುದು. ಆದರೆ, ಜನರಿಗೆ ದೇವರ ಮೇಲಿರುವ ಭಕ್ತಿ, ನಂಬಿಕೆ, ಭಾವನೆಯನ್ನು ಯಾರಿಂದಲೂ ದೂರಮಾಡಲಾಗುವುದಿಲ್ಲ. ಕೆರಗೋಡಿನ ತಾಯಂದಿರು ಅವರೇ ಮುಂದೆ ಬಂದು ಧ್ವಜ ಪಡೆದು ಭಕ್ತಿಯಿಂದ ಪೂಜೆ ಸಲ್ಲಿಸಿ ಅವರೇ ಕಟ್ಟುತ್ತಿದ್ದಾರೆ. ಜನರ ಮನಸ್ಸಿನಲ್ಲಿರುವ ಭಕ್ತಿ, ಭಾವನೆಗೆ ಇದೇ ಸಾಕ್ಷಿ. ಹಿಂದೂ ಧರ್ಮದಲ್ಲಿ ಹಿರಿಯರು ಉತ್ತಮವಾದ ಸಂಸ್ಕಾರ ಕಲಿಸಿದ್ದಾರೆ. ಅದರಿಂದಲೇ ಜನರಿಂದ ಧ್ವಜ ಅಭಿಯಾನಕ್ಕೆ ಅಭೂತಪೂರ್ವ ಪ್ರತಿಕ್ರಿಯೆ ಸಿಕ್ಕಿದೆ ಎಂದು ಡಾ.ಇಂದ್ರೇಶ್ ತಿಳಿಸಿದರು.