ಎಂಪಿಎಂ ನೆಡುತೋಪಿನಲ್ಲಿ ಅಕ್ರಮ ಸಾಗುವಳಿ: ಕ್ರಮಕ್ಕೆ ಒತ್ತಾಯ

ಕನ್ನಡಪ್ರಭ ವಾರ್ತೆ ಸಾಗರ

ಈ ವೇಳೆ ತಾಲೂಕು ಪ್ರಗತಿಪರ ಯುವ ಒಕ್ಕೂಟದ ಅಧ್ಯಕ್ಷ ರಮೇಶ್ ಈ.ಕೆಳದಿ ಮಾತನಾಡಿ, ಹಳ್ಳಿಬೈಲು ಗ್ರಾಮದಲ್ಲಿ ಕಂದಾಯ ಇಲಾಖೆ ೧.೨೦ಎಕರೆ ಜಾಗವನ್ನು ಅಕ್ರಮವಾಗಿ ಮಹ್ಮದ್ ಹುಸೇನ್ ಅವರಿಗೆ ಮಂಜೂರು ಮಾಡಿ ಕೊಟ್ಟಿತ್ತು. ಕೆಳದಿ ಮತ್ತು ಹಳ್ಳಿಬೈಲು ಗ್ರಾಮಸ್ಥರು ನಿರಂತರ ಹೋರಾಟ ಮಾಡಿ ಉಪವಿಭಾಗಾಧಿಕಾರಿ ಮೂಲಕ ಖಾತೆ ರದ್ದುಪಡಿಸಲಾಗಿದೆ. ರದ್ದುಮಾಡುವ ತನಕ ಸದರಿ ಜಾಗದಲ್ಲಿ ಯಾವುದೇ ಸಾಗುವಳಿ ಇರಲಿಲ್ಲ. ಖಾತೆ ರದ್ದು ಮಾಡಿದ ನಂತರ ಈ ಜಾಗದಲ್ಲಿರುವ ಅಕೇಶಿಯಾ, ಕಾಡುಜಾತಿ ಜೀವಂತ ಮರಗಳನ್ನು ಬೆಂಕಿ ಹಾಕಿ ಸುಡಲಾಗುತ್ತಿದೆ ಎಂದು ದೂರಿದರು. ಪರಿಸರ ನಾಶ ಮಾಡುತ್ತಿರುವ ಬಗ್ಗೆ ಗ್ರಾಮಸ್ಥರು ಅರಣ್ಯ ಮತ್ತು ಕಂದಾಯ ಇಲಾಖೆಗೆ ದೂರು ನೀಡಿದ್ದಾಗ್ಯೂ ಯಾವುದೇ ಕ್ರಮ ಕೈಗೊಂಡಿರುವುದಿಲ್ಲ. ಈ ಭಾಗದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಎಂಪಿಎಂ ಕಾವಲುಗಾರನಿಗೆ ಜೀವ ಬೆದರಿಕೆ ಹಾಕಲಾಗಿದೆ. ಚುನಾವಣೆ ಬಹಿಷ್ಕಾರ ಮಾಡುತ್ತೇವೆ ಎಂದು ಹೇಳಿದಾಗ ಉಪವಿಭಾಗಾಧಿಕಾರಿಗಳು ಸ್ಥಳಕ್ಕೆ ಆಗಮಿಸಿ ಬೇಡಿಕೆ ಈಡೇರಿಸುವ ಭರವಸೆ ನೀಡಿದ್ದರು. ತಕ್ಷಣ ಅಧಿಕಾರಿಗಳು ಜಂಟಿ ಸರ್ವೇ ನಡೆಸಿ ಅಕ್ರಮವಾಗಿ ಸಾಗುವಳಿ ಮಾಡಿರುವ ಹಾಗೂ ಅರಣ್ಯ ನಾಶ ಮಾಡಿರುವವರ ಮೇಲೆ ಸೂಕ್ತ ಕಾನೂನುಕ್ರಮ ಜರುಗಿಸಬೇಕು ಎಂದು ಒತ್ತಾಯಿಸಿದರು.

ಮನವಿ ಸ್ವೀಕರಿಸಿದ ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳು ಅಕೇಶಿಯಾ ಮತ್ತು ಕಾಡುಜಾತಿ ಮರಗಳನ್ನು ನಾಶ ಮಾಡಿರುವ ಮಹ್ಮದ್ ಹುಸೇನ್ ಬಿನ್ ದೊಡ್ಮನೆ ಖಾನ್ ಸಾಬ್ ವಿರುದ್ಧ ಎಫ್ಐಆರ್ ದಾಖಲು ಮಾಡುವ ಭರವಸೆ ನೀಡಿದ ನಂತರ ಗ್ರಾಮಸ್ಥರು ಪ್ರತಿಭಟನೆ ಹಿಂದಕ್ಕೆ ಪಡೆದರು.