ಸಹಬಾಳ್ವೆಯ ಸಂದೇಶ ಸಾರಿದವರು ಜಗದ್ಗುರು ರೇಣುಕಾಚಾರ್ಯರು

ರಾಮನಗರ: ಶಾಂತಿಯುತ ಸಹಬಾಳ್ವೆಯ ಸಮಾಜ ನಿರ್ಮಾಣಕ್ಕೆ ಸಂದೇಶ ಸಾರಿದವರು ಜಗದ್ಗುರು ರೇಣುಕಾಚಾರ್ಯರು ಎಂದು ವಿದ್ವಾನ್ ಚಂದ್ರಶೇಖರಯ್ಯ ಹೇಳಿದರು.

ಸಮಸ್ತ ಲೋಕ ಕಲ್ಯಾಣಕ್ಕಾಗಿ ಕೊಲ್ಲಿಪಾಕಿಯ ಸೋಮೇಶ್ವರ ಲಿಂಗಮುಖದಿಂದ ಅವಿರ್ಭವಿಸಿದ ಜಗದ್ಗುರು ರೇಣುಕಾಚಾರ್ಯರು ಲೋಕೋದ್ಧಾರಕ್ಕಾಗಿ ಹಗಲಿರುಳೆನ್ನದೆ ಸಂಚರಿಸಿದರು. ನಾಲ್ಕು ಯುಗಗಳಲ್ಲಿ ಮೊದಲ ಕೃತಾಯುಗದಲ್ಲಿ ಏಕಾಕ್ಷರರಾಗಿ, ತ್ರೇತಾಯುಗದಲ್ಲಿ ಏಕವಕ್ತ್ರರಾಗಿ, ದ್ವಾಪರಾಯುಗದಲ್ಲಿ ರೇಣುಕಾಚಾರ್ಯರಾಗಿ, ಕಲಿಯುಗದಲ್ಲಿ ರೇವಣಸಿದ್ದರಾಗಿ ಧರೆಯಲ್ಲಿ ಅವತರಿಸಿದ ಮಹಾಪುರುಷರು ಎಂದು ತಿಳಿಸಿದರು.

ವೀರಶೈವ ಲಿಂಗಾಯಿತ ಮಹಾಸಭಾ ಜಿಲ್ಲಾಧ್ಯಕ್ಷ ಪೋಲೀಸ್ ರುದ್ರೇಶ್ ಮಾತನಾಡಿ, ಜಗದ್ಗುರು ರೇಣುಕಾಚಾರ್ಯರು ತಪೋನುಷ್ಠಾನ ಮಾಡಿದ ಪುಣ್ಯ ಸ್ಥಳದಲ್ಲಿರುವ ನಾವೇ ಧನ್ಯರು ಅಂತಹ ಮಹಮಹಿಮರು ನಮಗೆ ಶಾಂತಿ ಸಹಬಾಳ್ವೆಯ ಸಂದೇಶ ನೀಡಿ ಮಾನವನ ದಾನದ ಗುಣಗಳನ್ನು ಹೇಳಿಕೊಟ್ಟು ಸನ್ಮಾರ್ಗದ ದಾರಿ ನಮಗೆ ತೋರಿ ಹೋಗಿದ್ದಾರೆ. ಅಂತಹ ಮಹಾಮಹಿಮರ ಆದರ್ಶ ನಾವು ಪಾಲಿಸಬೇಕು. ಅವರ ಜಯಂತಿಯನ್ನು ಸರ್ಕಾರ ಪ್ರತೀ ವರ್ಷ ಆಚರಿಸುತ್ತಿರುವುದು ಸಂತಷ ತಂದಿದೆ. ಭಕ್ತ ಗಣಕೋಟಿಗೆ ರೇಣುಕಾಚಾರ್ಯರ ಮಹಿಮೆಯನ್ನು ಸಾರಲು ಇಂತಹ ಕಾರ್ಯಕ್ರಮ ಅವಶ್ಯಕವಾಗಿವೆ ಎಂದರು.

ಕಾರ್ಯಕ್ರಮದಲ್ಲಿ ಕನ್ನಡ ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ರಮೇಶ್‌ಬಾಬು, ವೀರಶೈವ ಸಂಘ ತಾಲ್ಲೂಕು ಅಧ್ಯಕ್ಷ ಎಂ.ಆರ್. ಶಿವಕುಮಾರಸ್ವಾಮಿ, ತಾಲೂಕು ಮಹಾಸಭಾ ಅಧ್ಯಕ್ಷ ಪೋಲೀಸ್ ಶಂಕರಪ್ಪ ವೀರಶೈವ ಮುಖಂಡರಾದ ಐಜೂರು ಜಗದೀಶ್, ಶಿವಾನಂದ್, ವಿಭೂತಿಕೆರೆ ಶಿವಲಿಂಗಯ್ಯ, ಡೇರಿ ಮಹೇಶ್, ಶಿವಲಿಂಗಪ್ರಸಾದ್, ರಾಜಶೇಖರ್, ಶಿವಸ್ವಾಮಿ, ಯೋಗಾನಂದ್, ಶಂಕರ್, ಸಿದ್ದಲಿಂಗಮೂರ್ತಿ, ರೇವಣ್ಣ, ಲೋಕೇಶ್, ಚಂದ್ರಶೇಖರ್, ಕೀರ್ತಿ, ರುದ್ರೇಶ್, ನಾಗರಾಜು ಮತ್ತಿತರರು ಹಾಜರಿದ್ದರು.

ರಾಮನಗರದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಕಚೇರಿಯಲ್ಲಿ ಜಗದ್ಗುರು ರೇಣುಕಾಚಾರ್ಯ ಜಯಂತಿ ಆಚರಿಸಲಾಯಿತು.