ಕೈಲ್‌ಮುಹೂರ್ತ ಕ್ರೀಡಾಕೂಟ: ಕಿರುಂದಾಡು ಸಮಗ್ರ ಚಾಂಪಿಯನ್ಸ್‌

ಕನ್ನಡಪ್ರಭ ವಾರ್ತೆ ನಾಪೋಕ್ಲು

ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದ ಡಿಸಿಸಿ ಬ್ಯಾಂಕ್ ಉಪಾಧ್ಯಕ್ಷ ಕೇಟೋಳಿರ ಹರೀಶ್ ಪೂವಯ್ಯ, ಗ್ರಾಮೀಣ ಕ್ರೀಡಾಕೂಟಗಳಿಂದ ವಿವಿಧ ಜನಾಂಗಗಳ ನಡುವಿನ ಸಾಮರಸ್ಯ ವೃದ್ಧಿಯಾಗಲಿದೆ ಎಂದರು.

ಅಂತಾರಾಷ್ಟ್ರೀಯ ಕ್ರೀಡಾಪಟು ಬೋಳ್ಳಂಡ ಉನ್ನತಿ ಅಯ್ಯಪ್ಪ ಮಾತನಾಡಿ ಆಸಕ್ತಿ, ಶ್ರದ್ಧೆ, ಸಾಧಿಸುವ ಛಲ ಇದ್ದರೆ ಯಶಸ್ಸು ಸಾಧ್ಯ. ಯುವಜನರನ್ನು ಕ್ರೀಡಾ ಚಟುವಟಿಕೆಯಲ್ಲಿ ಪಾಲ್ಗೊಳ್ಳುವಂತೆ ಮಾಡುವುದು ಹಿರಿಯರ ಜವಾಬ್ದಾರಿ ಎಂದರು.

ನಿವೃತ್ತ ಶಿಕ್ಷಕ ಚೈಯ್ಯಂಡ ರಘು ತಿಮ್ಮಯ್ಯ, ಅಂತಾರಾಷ್ಟ್ರೀಯ ಕ್ರೀಡಾಪಟು ಬೊಳ್ಳಂಡ ಉನ್ನತಿ ಅಯ್ಯಪ್ಪ ಅವರನ್ನು ಸನ್ಮಾನಿಸಲಾಯಿತು.

ಪುರುಷರ ಹಾಕಿ ಟೂರ್ನಿಯಲ್ಲಿ ಬಾವಲಿ ಗ್ರಾಮದ ತಂಡ ಪ್ರಥಮ ಸ್ಥಾನ, ಕಿರುಂದಾಡು ಗ್ರಾಮದ ತಂಡ ದ್ವಿತೀಯ ಸ್ಥಾನ ಗಳಿಸಿತು. ವಾಲಿಬಾಲ್ ಪಂದ್ಯದಲ್ಲಿ ಕಿರುಂದಾಡು ತಂಡ ಪ್ರಥಮ ಸ್ಥಾನ ಗಳಿಸಿದರೆ ಬಾವಲಿ ತಂಡ ದ್ವಿತೀಯ ಸ್ಥಾನ ಗಳಿಸಿತು.

ಪಥಸಂಚಲನದಲ್ಲಿ ಕೊಣಂಜಗೇರಿ ತಂಡ ಪ್ರಶಸ್ತಿ ಗಳಿಸಿತು. ಹಗ್ಗಜಗ್ಗಾಟ ಸ್ಪರ್ಧೆಯಲ್ಲಿ ಬಲಮುರಿ ತಂಡ ಪ್ರಥಮ ಸ್ಥಾನ, ಹಾಗೂ ಕೈಕಾಡು ತಂಡ ದ್ವಿತೀಯ ಸ್ಥಾನ ಗಳಿಸಿತು.

ವಿವಿಧ ಕ್ರೀಡಾ ಸ್ಪರ್ಧೆಗಳಲ್ಲಿ ವಿಜೇತರಿಗೆ ಟ್ರೋಫಿ ಹಾಗೂ ನಗದು ಬಹುಮಾನಗಳನ್ನು ಗಣ್ಯರು ವಿತರಿಸಿದರು.

ಕ್ರೀಡಾಕೂಟದ ವಿಜೇತರಿಗೆ ದಾನಿಗಳಾದ ಕಿರುಂದಾಡು ಗ್ರಾಮದ ನಾಳಿಯಂಡ ನಿವೃತ್ತ ಪೊಲೀಸ್ ಇನ್ಸ್ ಪೆಕ್ಟರ್ ದಿ.ಡಿ.ತಿಮ್ಮಯ್ಯ ಮತ್ತು ದಿ.ನಾಳಿಯಂಡ ಡಿ.ಕಾಮವ್ವ ಇವರ ಮಕ್ಕಳಾದ ನಾಳಿಯಂಡ ಟಿ.ಸುಬ್ಬಯ್ಯ ಮತ್ತು ನಾಳಿಯಂಡ ಟಿ.ದೇವಯ್ಯ ಹಾಗೂ ಪಾರಾಣೆ ಕೃಷಿ ಪತ್ತಿನ ಸಹಕಾರ ಸಂಘದ ಸ್ಥಾಪಕ ಕಾರ್ಯದರ್ಶಿ ದಿ.ಅಪ್ಪನೆರವಂಡ ಜೋಯಪ್ಪ ಇವರ ಜ್ಞಾಪಕಾರ್ಥ ಪತ್ನಿ ದೇವಕ್ಕಿಜೋಯಪ್ಪ ಮತ್ತು ಮಗ ಅಪ್ಪನೆರವಂಡ ವಿಜಯ್ ಪ್ರಾಯೋಜಿಸಿದ ಟ್ರೋಫಿಗಳನ್ನು ವಿತರಿಸಲಾಯಿತು.

ಬೊಳ್ಳಂಡ ಗೀತಾ ಶರೀನ್ ಪ್ರಾರ್ಥಿಸಿದರು. ಕ್ರೀಡಾಮಂಡಳಿ ಕಾರ್ಯದರ್ಶಿ ಅಪ್ಪನೆರವಂಡ ರಾಜೇಶ್ ಸ್ವಾಗತಿಸಿದರು. ಶಿಕ್ಷಕಿ ಕಸ್ತೂರಿ ಮತ್ತು ಮಂಜು ನಿರೂಪಿಸಿದರು.

ಕ್ರೀಡಾ ಹಬ್ಬದಲ್ಲಿ ಬಾವಲಿ, ಕಿರುಂದಾಡು, ಪಾರಾಣೆ , ಕೈಕಾಡು ಹಾಗೂ ಬಲಮುರಿ ಗ್ರಾಮಗಳ ಕ್ರೀಡಾಪಟುಗಳು ಹಾಗೂ ಗ್ರಾಮಸ್ಥರು ಪಾಲ್ಗೊಂಡಿದ್ದರು.