ಬಾಹ್ಯ ಸೌಂದರ್ಯಕ್ಕಿಂತ ಜ್ಞಾನ ಸೌಂದರ್ಯ ಶ್ರೇಷ್ಠ: ಡಾ.ಅಮೃತಾನಂದ ಶ್ರೀ

ಕನ್ನಡಪ್ರಭ ವಾರ್ತೆ ತೇರದಾಳ(ರ-ಬ)

ಗುರುವಾರ ತೇರದಾಳದ ಜೆ.ವಿ. ಮಂಡಲದ ಸ್ವತಂತ್ರ ಪಿ.ಯು. ಕಾಲೇಜಿನ ಪಪೂ ಶಾಂತಮೂರ್ತಿ ಶ್ರೀ ೧೦೮ ಮಹಾಬಲ ಮುನಿಮಹಾರಾಜರ ಸಭಾಂಗಣದಲ್ಲಿ ಪ್ರಸಕ್ತ ಸಾಲಿನ ಸಾಂಸ್ಕೃತಿಕ, ಕ್ರೀಡಾ ಚಟುವಟಿಕೆಗೆ ಚಾಲನೆ ನೀಡಿ ಮಾತನಾಡಿದ ಶ್ರೀಗಳು, ಯಶಸ್ಸಿನ ಜೀವನಕ್ಕೆ ಯೋಜನೆಯೇ ಬುನಾದಿಯಾಗಿದ್ದು, ಕಲಿಕಾ ಹಂತದಲ್ಲೇ ಗುರಿಯತ್ತ ಅಚಲ ನಿಷ್ಠೆಯ ಯೋಜನೆ ನಿಮ್ಮದಾಗಬೇಕು. ಅಂಕ ಗಳಿಕೆಯೊಂದೇ ಶಿಕ್ಷಣದ ಗುರಿಯಲ್ಲ ಸದ್ಗುಣವೇ ನಿಜವಾದ ಜ್ಞಾನವಾಗಿದ್ದು, ಸುಳ್ಳು, ಕಳ್ಳತನಗಳಿಂದ ದೂರವಿದ್ದು, ಪರಿಶ್ರಮಿಗಳಾಗಿ ಸದ್ಗುಣವಂತರಾಗಿ, ಅಂಥ ಶಿಕ್ಷಣ ನಿಮ್ಮನ್ನು ಒಳಗೂ ಹೊರಗೂ ಸಶಕ್ತಗೊಳಿಸುತ್ತದೆ. ನೀತಿಯುತ ಆಚರಣೆ, ಸಂಕಲ್ಪ ಇವು ಸನಾತನ ಶಿಕ್ಷಣದ ಮೂಲವಾಗಿದ್ದು, ಆದರ್ಶಗಳನ್ನು ಯಾರೇ ವಿರೋಧಿಸಿದರೂ ನೀವು ಬಿಡದಂತೆ ಅಚಲರಾಗಿ ಆದರ್ಶಗಳ ಪಾಲಿಸಬೇಕೆಂದು ಮಕ್ಕಳಿಗೆ ಕಿವಿಮಾತು ಹೇಳಿದರು.

ವೇದಿಕೆಯಲ್ಲಿ ಅಧ್ಯಕ್ಷ ಟಿ.ಸಿ. ಪಡಸಲಗಿ, ಉಪಾಧ್ಯಕ್ಷ ಬಿ.ಎಸ್. ಸಾವಂತನವರ, ಡಿ.ಆರ್. ಪಾಟೀಲ, ಪ್ರವೀಣ ನಾಡಗೌಡ, ಮಲ್ಲಿನಾಥ ಅಸ್ಕಿ, ಪದ್ಮರಾಜ ಹಟ್ಟಿ, ಕಿರಣ ಕುಳ್ಳಿ, ಬಿ.ಪಿ. ಬದನಿಕಾಯಿ, ಪ್ರಾಚಾರ್ಯ ಸಂತೋಷ ಕುಳಿ ವೇದಿಕೆಯಲ್ಲಿದ್ದರು. ಸ್ಫೂರ್ತಿ ಲಾಳಕೆ ಪ್ರಾರ್ಥನೆಯೊಡನೆ ಭರತನಾಟ್ಯ ಪ್ರದರ್ಶಿಸಿದರು. ಮಾಯಕ್ಕ ಹೊಸೂರ ಸಂಗಡಿಗರು ಸ್ವಾಗತಗೀತೆ ಹಾಡಿದರು. ಪ್ರಾಚಾರ್ಯ ಸಂತೋಷ ಕುಳ್ಳಿ ಸ್ವಾಗತಿಸಿದರು. ಕಾವ್ಯ ಹುಲ್ಲೋಳ್ಳಿ, ಶೋಭಾ ಕರಿಗಾರ ನಿರೂಪಿಸಿದರು. ಬಸವರಾಜ ಬಾಳಿಕಾಯಿ ವಂದಿಸಿದರು.