ಕೊಟ್ಟೂರು ಪಪಂ ಆಡಳಿತ: ಯಾರಿಗೆ ಯೋಗ?

ಜಿ. ಸೋಮಶೇಖರ

20ನೇ ವಾರ್ಡ್‌ನ ಸದಸ್ಯೆ ರೇಖಾ ಬದ್ದಿ ನಿರಾಯಾಸವಾಗಿ ಅಧ್ಯಕ್ಷರಾಗಿ ಆಯ್ಕೆಯಾಗುವ ಪೂರಕ ವಾತಾವರಣ ಸೃಷ್ಟಿಯಾಗಿದೆ ಎಂದು ಹೇಳಲಾಗುತ್ತದೆ.

ಅಧ್ಯಕ್ಷ ಸ್ಥಾನಕ್ಕೆ 20ನೇ ವಾರ್ಡ್ ಸದಸ್ಯೆಯಾಗಿರುವ ರೇಖಾ ಬದ್ದಿ ಪ್ರಬಲ ಆಕಾಂಕ್ಷಿಯಾಗಿದ್ದಾರೆ. ಚುನಾವಣೆಯಲ್ಲಿ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿ ಗೆಲುವು ಸಾಧಿಸಿದ್ದರು. ಇದೀಗ ಅಧ್ಯಕ್ಷ ಸ್ಥಾನ ಪರಿಶಿಷ್ಟ ಜಾತಿ ಮಹಿಳೆಗೆ ಮೀಸಲಾಗಿರುವ ಹಿನ್ನೆಲೆಯಲ್ಲಿ ರೇಖಾ ಅವರು ಬಹುಮತ ಪಡೆಯಲು ಆವಶ್ಯವಿರುವಷ್ಟ ಸದಸ್ಯರ ಬೆಂಬಲ ಗಳಿಸಿದ್ದಾರೆ ಎಂದು ಹೇಳಲಾಗುತ್ತಿದೆ. ಈ ನಿಟ್ಟಿನಲ್ಲಿ ಏನೆಲ್ಲ ತಂತ್ರಗಾರಿಕೆ ಬೇಕೋ ಅದನ್ನೆಲ್ಲ ಮಾಡಿದ್ದಾರೆ. ರೇಖಾ ಅಧ್ಯಕ್ಷ ಗಾದಿಗೇರಿವುದು ನಿಶ್ಚಿತ ಎಂದು ಅವರ ಬೆಂಬಲಿಗರು ಹೇಳುತ್ತಿದ್ದಾರೆ.

ಉಪಾಧ್ಯಕ್ಷ ಸ್ಥಾನಕ್ಕೆ ಪೈಪೋಟಿ: ಉಪಾಧ್ಯಕ್ಷ ಸ್ಥಾನ ಸಾಮಾನ್ಯ ವರ್ಗಕ್ಕೆ ಮೀಸಲಾಗಿರುವುದರಿಂದ ಬಿಜೆಪಿ ಮತ್ತು ಕಾಂಗ್ರೆಸ್ ಸದಸ್ಯರಲ್ಲಿ ತೀವ್ರ ಪೈಪೋಟಿ ಕಂಡುಬಂದಿದೆ. ಕಾಂಗ್ರೆಸ್‌ನಿಂದ ತೋಟದ ರಾಮಣ್ಣ, ವಿದ್ಯಾಶ್ರೀ ಹೆಸರು ಕೇಳಿಬರುತ್ತಿದ್ದರೆ ಬಿಜೆಪಿಯಿಂದ ಮರಬದ ಕೊಟ್ರೇಶ್, ಜಿ. ಸಿದ್ದಯ್ಯ, ಪಕ್ಷೇತರ ಸದಸ್ಯ ಬಾವಿಕಟ್ಟಿ ಶಿವಾನಂದ ಹೆಸರು ಕೇಳಿಬಂದಿವೆ.

ಈ ನಡುವೆ ಜೆಡಿಎಸ್‌ನ ಶಾಸಕ ನೇಮರಾಜ ನಾಯ್ಕ ತಟಸ್ಥವಾಗಿರುವ ಸಾಧ್ಯತೆ ಇದೆ. ಶಾಸಕರು ಮತ್ತು ಜೆಡಿಎಸ್ ನಾಯಕರನ್ನು ಯಾರೊಬ್ಬರೂ ಈ ವರೆಗೆ ಸಂಪರ್ಕಿಸಿಲ್ಲ. ಹೀಗಾಗಿ ಇಡೀ ಚುನಾವಣೆ ಪ್ರಕ್ರಿಯೆಯಿಂದ ದೂರ ಇರುವ ನಿರ್ಧಾರ ತೆಗೆದುಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಶನಿವಾರ ಅವರು ಚುನಾವಣೆಯಲ್ಲಿ ಭಾಗವಹಿಸುವ ಸಾಧ್ಯತೆ ಕಡಿಮೆ ಎಂದು ಜೆಡಿಎಸ್‌ ನಾಯಕರು ಹೇಳುತ್ತಾರೆ.

ಪಪಂ ಆಡಳಿತದ ಅಧಿಕಾರ ಹೊಂದುವ ಸಂಖ್ಯೆ ಬಲ ಇಲ್ಲದ ಕಾರಣಕ್ಕಾಗಿ ಬಿಜೆಪಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸುವುದಿಲ್ಲ. 6 ಸದಸ್ಯರು ಮಾತ್ರ ಸದ್ಯಕ್ಕೆ ಪಕ್ಷದಲ್ಲಿದ್ದು, ಚುನಾವಣೆ ವೇಳೆಗೆ ಕಾದುನೋಡುವ ತಂತ್ರ ಬಳಸಿ, ಆನಂತರ ಪಕ್ಷದ ನಿರ್ಧಾರ ಪ್ರಕಟಿಸುತ್ತೇವೆ ಎಂದು ಹೊಸಪೇಟೆ ಬಿಜೆಪಿ ಜಿಲ್ಲಾಧ್ಯಕ್ಷ ಪಿ. ಚನ್ನಬಸವನಗೌಡ ಹೇಳಿದರು.