ಜಿಲ್ಲೆಯ ಅಂಗನವಾಡಿಗಳಲ್ಲಿ ಮೂಲಭೂತ ಸೌಕರ್ಯಗಳ ಕೊರತೆ: ನ್ಯಾಯಾಧೀಶ ಕೆ.ಸಿ. ಸದಾನಂದಸ್ವಾಮಿ

ಹಾವೇರಿ: ಜಿಲ್ಲೆಯ ಬಹುತೇಕ ಅಂಗನವಾಡಿಗಳಲ್ಲಿ ಮೂಲಭೂತ ಸೌಕರ್ಯಗಳ ಕೊರತೆ ಕಂಡುಬಂದಿದೆ. ಅಂಗನವಾಡಿ ಕೇಂದ್ರಗಳ ನ್ಯೂನತೆ ಬಗ್ಗೆ ಸರ್ಕಾರದ ಗಮನ ಸೆಳೆಯುವ ನಿಟ್ಟಿನಲ್ಲಿ ವರದಿ ತಯಾರಿಸಲಾಗಿದ್ದು, ರಾಜ್ಯ ಕಾನೂನು ಸೇವಾ ಪ್ರಾಧಿಕಾರಕ್ಕೆ ಸಲ್ಲಿಸಲಾಗುತ್ತಿದೆ ಎಂದು ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ ಕೆ.ಸಿ. ಸದಾನಂದಸ್ವಾಮಿ ತಿಳಿಸಿದರು.

ಅಪೌಷ್ಟಿಕತೆ ನಿವಾರಣೆಗೆ ರಾಜ್ಯ ಸಲಹಾ ಸಮಿತಿ ನಿರ್ದೇಶನದಂತೆ, ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಅಧ್ಯಕ್ಷರು, ಸದಸ್ಯ ಕಾರ್ಯದರ್ಶಿಗಳು, ತಾಲೂಕು ಕಾನೂನು ಸೇವೆಗಳ ಪ್ರಾಧಿಕಾರದ ಅಧ್ಯಕ್ಷರು, ಸದಸ್ಯ ಕಾರ್ಯದರ್ಶಿಗಳು ಹಾಗೂ ಪೆನಲ್ ವಕೀಲರು ಜಿಲ್ಲೆಯ ೧೯೯೧ ಅಂಗನವಾಡಿಗಳ ಪೈಕಿ ೮೨೧ ಅಂಗನವಾಡಿಗಳಿಗೆ ಅನಿರೀಕ್ಷಿತ ಭೇಟಿ ನೀಡಿ, ಪರಿಶೀಲನೆ ನಡೆಸಲಾಗಿದೆ ಎಂದು ತಿಳಿಸಿದರು.

ಸೌಲಭ್ಯಗಳ ಕೊರತೆ

ಹಾವೇರಿ ತಾಲೂಕಿನ ೨೯೯ ಅಂಗನವಾಡಿಗಳಲ್ಲಿ ಭೇಟಿ ನೀಡಲಾದ ೩೪ ಅಂಗನವಾಡಿಗಳ ಪೈಕಿ ಆರು, ರಾಣಿಬೆನ್ನೂರು ತಾಲೂಕಿನ ೩೭೯ ಅಂಗನವಾಡಿಗಳಲ್ಲಿ ಭೇಟಿ ನೀಡಲಾದ ೩೭೦, ಹಿರೇಕೆರೂರು ತಾಲೂಕಿನ ೩೬೫ ಅಂಗನವಾಡಿಗಳ ಪೈಕಿ ೧೭೫, ಬ್ಯಾಡಗಿ ತಾಲೂಕಿನ ೧೬೬ ಅಂಗನವಾಡಿಗಳಲ್ಲಿ ಭೇಟಿ ನೀಡಲಾದ ನಾಲ್ಕು ಅಂಗನವಾಡಿಗಳ ಪೈಕಿ ಮೂರು, ಹಾನಗಲ್ ತಾಲೂಕಿನ ೩೩೫ ಅಂಗನವಾಡಿಗಳ ಪೈಕಿ ೪೭, ಶಿಗ್ಗಾಂವಿ ತಾಲೂಕಿನ ೨೩೬ ಅಂಗನವಾಡಿಗಳ ಪೈಕಿ ೩೩, ಸವಣೂರ ತಾಲೂಕಿನ ೨೧೧ ಅಂಗನವಾಡಿಗಳ ಪೈಕಿ ೩೯ ಅಂಗನವಾಡಿಗಳು ಮೂಲ ಸೌಕರ್ಯಗಳನ್ನು ಹೊಂದಿರುತ್ತವೆ ಎಂದು ತಿಳಿಸಿದರು.

ಹಿರಿಯ ದಿವಾಣಿ ನ್ಯಾಯಾಧೀಶರು ಹಾಗೂ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿಗಳಾದ ಬಿ.ಆರ್. ಮುತಾಲಿಕದೇಸಾಯಿ ಉಪಸ್ಥಿತರಿದ್ದರು.