ಲಕ್ಷ್ಮೇಶ್ವರ ಹೆಸರಿಗಷ್ಟೇ ಬಯಲು ಶೌಚ ಮುಕ್ತ ತಾಲೂಕು

ಅಶೋಕ ಡಿ. ಸೊರಟೂರ

ತಾಲೂಕಿನ ಗೊಜನೂರ ಗ್ರಾಮದಲ್ಲಿ ಪಾಳಾ ಬಾದಾಮಿ ರಸ್ತೆಗೆ ಹೊಂದಿಕೊಂಡಂತೆ 10 ಶೌಚಾಲಯಗಳನ್ನು ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ಕಟ್ಟಿಲಾಗಿತ್ತು. ಆದರೆ, ಅವುಗಳ ಉದ್ಘಾಟನೆ ಮಾಡದೆ ಹಾಗೆಯೇ ಬಿಟ್ಟು ಕೆಲ ವರ್ಷಗಳ ನಂತರ ಕೆಡವಿ ಹಾಕಿರುವ ಘಟನೆ ಕಂಡು ಬಂದಿದೆ.

ಲಕ್ಷ್ಮೇಶ್ವರ ಪಟ್ಟಣದಲ್ಲಿನ ಬಹುತೇಕ ಸಾಮೂಹಿಕ ಶೌಚಾಲಯಗಳಲ್ಲಿ ಮೂಗು ಮುಚ್ಚಿಕೊಂಡು ಒಳಗೆ ಹೋಗುವಂತ ಸ್ಥಿತಿ ಇವೆ. ಕೆಲವು ಕಡೆಗಳಲ್ಲಿ ನೀರಿನ ಸೌಲಭ್ಯ ಇಲ್ಲದೆ ಮನೆಯಿಂದಲೆ ತಂಬಿಗೆ ನೀರು ತೆಗೆದುಕೊಂಡು ಶೌಚಕ್ಕೆ ಹೋಗುತ್ತಾರೆ. ಇದರಿಂದ ಸ್ವಚ್ಚತೆಯು ಮರೀಚಿಕೆಯಾಗಿದೆ ಎಂದರೆ ತಪ್ಪಾಗಲಾರದು.

ಮಹಿಳೆಯರ ಪಾಡು ದೇವರಿಗೆ ಪ್ರೀತಿ

ತಾಲೂಕಿನ 14 ಗ್ರಾಪಂಗಳ ವ್ಯಾಪ್ತಿಯಲ್ಲಿ 16704 ಕುಟುಂಬಗಳು ವಾಸಿಸುತ್ತಿದ್ದು. ಇವುಗಳಲ್ಲಿ 932 ಎಸ್‌ಸಿ, 316 ಎಸ್‌ಟಿ ಹಾಗೂ 1859 ಕುಟುಂಬಗಳು ಶೌಚಾಲಯ ಹೊಂದಿಲ್ಲ ಎಂಬುದು 2024-25ನೇ ಸಾಲಿನ ವರದಿಯ ಅಂಕಿ ಅಂಶಗಳು ಕೂಡಾ ಹೇಳುತ್ತವೆ, ಬಯಲು ಮುಕ್ತ ಶೌಚಾಲಯವೆಂಬುದು ಕೇವಲ ನಾಟಕವೆಂದು. ಇನ್ನೂ ಕೆಲವರಿಗೆ ಶೌಚಾಲಯ ನಿರ್ಮಿಸಿಕೊಳ್ಳುವಷ್ಟು ಜಾಗೆಯೂ ಇಲ್ಲ. ಗೊಜನೂರ ಗ್ರಾಮದಲ್ಲಿ ಬಹಳಷ್ಟು ಮನೆಗಳು ಶೌಚಾಲಯ ಹೊಂದಿಲ್ಲವೆ ಎಂಬುದು ನಾಚಿಕೆಗೇಡಿನ ಸಂಗತಿಯಾಗಿದೆ.

ಲಕ್ಷ್ಮೇಶ್ವರ ಪಟ್ಟಣದ ಒಂದನೇ ವಾರ್ಡಿನ ಕೌಡೇಶ್ವರಿ ನಗರ ಹಾಗೂ ಭೋವಿ ಓಣಿ, ಹಳ್ಳದಕೇರಿ, ಮಾನ್ವಿ ಪೇಟ್ರೋಲ್ ಬಂಕ್ ಹತ್ತಿರ, ಅಂಬೇಡ್ಕರ್ ನಗರ ಸೇರಿದಂತೆ ಇತರೇ ಓಣಿಯ ಪುರಷರು ಹಾಗೂ ಮಹಿಳೆಯರು ಬಹಿರ್ದೆಷೆಗೆ ಹೋಗುವುದು ಸಾಮಾನ್ಯ ಸಂಗತಿಯಾಗಿದೆ.