ಕುಮಾರಸ್ವಾಮಿ ಸೇರಿದಂತೆ ಕೇಂದ್ರ ಸಚಿವರ ಮೇಲೆ ಭೂಕಬಳಿಕೆ ಆರೋಪ

ಕಾರಟಗಿ: ಭ್ರಷ್ಟಾಚಾರದ ಬಗ್ಗೆ ಮಾತನಾಡುವ ಬಿಜೆಪಿಯವರು ತಮ್ಮ ಪಕ್ಷದಲ್ಲಿ ಆರೋಪ ಎದುರಿಸುತ್ತಿರುವ ನಾಯಕರ ಬಗ್ಗೆಯೂ ಮಾತನಾಡಬೇಕು. ರಾಜ್ಯದ ರೈತರು, ರಸ್ತೆ, ಮಳೆ ಸೇರಿದಂತೆ ಜನರ ಸಮಸ್ಯೆಗಳ ಕುರಿತು ಸದನದಲ್ಲಿ ಚರ್ಚೆ ನಡೆಸುವುದನ್ನು ಬಿಟ್ಟು ಸದನದ ಅಮೂಲ್ಯ ಸಮಯ ಬಿಜೆಪಿಯವರು ವ್ಯರ್ಥ ಮಾಡುವುದನ್ನು ಬಿಡಲಿ ಎಂದು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಶಿವರಾಜ ತಂಗಡಗಿ ಹೇಳಿದರು.

ವಾಲ್ಮೀಕಿ ಅಭಿವೃದ್ಧಿ ನಿಗಮದ ಮಾಜಿ ಸಚಿವ ನಾಗೇಂದ್ರ ವಿಚಾರವಾಗಿ ಬಿಜೆಪಿ ಪ್ರತಿಭಟನೆ ನಡೆಸುತ್ತಿರುವುದನ್ನು ಟೀಕಿಸಿದ ಅವರು, ಸಚಿವ ನಾಗೇಂದ್ರ ಅಪರಾಧಿ ಅಲ್ಲ, ಆರೋಪ ಎದುರಿಸುತ್ತಿರುವ ವ್ಯಕ್ತಿ. ಆರೋಪಗಳಿಗೆ ಕಾನೂನು ಪ್ರಕ್ರಿಯೆಯಲ್ಲಿಯೇ ಉತ್ತರ ನೀಡಲಾಗುವುದು. ರಸ್ತೆಯಲ್ಲಿ ಧಿಕ್ಕಾರ ಕೂಗುವ ಬದಲು ಸದನದಲ್ಲಿ ದಾಖಲೆ, ಸಾಕ್ಷ್ಯ ಮುಂದಿಟ್ಟು ಚರ್ಚಿಸಲಿ. ಸರ್ಕಾರ ಉತ್ತರ ನೀಡಲು ಸಿದ್ಧವಿದೆ ಎಂದರು.

ಈ ಪ್ರಕರಣಕ್ಕೆ ಸಂಬಂಧಿಸಿ ನಾನು ಯಾವ ಅಧಿಕಾರಿಗೂ ಪ್ರಕರಣ ದಾಖಲಿಸಿ ಅಥವಾ ದಾಖಲಿಸಬೇಡಿ ಎಂದು ಹೇಳಿಲ್ಲ. ಇಂಥಹದ್ದನ್ನೆಲ್ಲ ಬಳಸಿಕೊಳ್ಳಲು ಮುಂದೆ ಬರುವ ಮಾಜಿ ಶಾಸಕನಿಗೆ ಬಸವರಾಜರೆಡ್ಡಿ ಸಾವಿನ ಪ್ರಕರಣದ ಬಗ್ಗೆ ಏನೂ ಗೊತ್ತಿಲ್ಲ. ಅದರ ತಳ, ಬುಡವೂ ಗೊತ್ತಿಲ್ಲ. ಯಾವ ವಿಷಯದ ಬಗ್ಗೆ, ಏನು ಗೊತ್ತಿದೆ ಎಂದು ನಾನು ಆತನ ಬಗ್ಗೆ ಮಾತನಾಡಲಿ. ಆತ ಸುಮ್ಮನೇ ಕ್ಷೇತ್ರದಲ್ಲಿ ಅಡ್ಡಾಡುತ್ತಾನೆ. ಆತನ ಆರೋಪ ಬಿಡಿ, ಆತನ ಬಗ್ಗೆಯೇ ನಾನು ಮಾತನಾಡುವುದಿಲ್ಲ. ಇನ್ನು ಸತ್ತ ಹೆಣದ ಮೇಲೆ ರಾಜಕೀಯ ಮಾಡುವ ಜಾಯಮಾನವೂ ನನ್ನದಲ್ಲ ಎಂದು ಬಿಜೆಪಿ ಆರೋಪಗಳಿಗೆ ತಿರುಗೇಟು ನೀಡಿದರು.