ಧಾರವಾಡದಲ್ಲಿ ತಡರಾತ್ರಿ ಮೊಳಗಿದ ಗುಂಡಿನ ಸದ್ದು

ಧಾರವಾಡ:

ಫೈನಾನ್ಸ್‌ ವ್ಯವಹಾರ ಮಾಡುತ್ತಿದ್ದ ಅಭಿಷೇಕ ಬಡ್ಡಿಮನಿ (31) ತಡರಾತ್ರಿ 12ರಿಂದ 1ರ ಸಮಯದಲ್ಲಿ ಗುಂಡು ಹಾರಿಸಿದ್ದಾನೆ. ಕಾರಿನಲ್ಲಿ ಬಂದಿದ್ದ ಮೂವರೊಂದಿಗೆ ನಡೆದ ಜಗಳ ವಿಕೋಪಕ್ಕೆ ಹೋಗಿ ಬೈಕ್‌ ಮೇಲಿದ್ದ ಅಭಿಷೇಕ ಕಾರಿನ ಮೇಲೆ ಎರಡು ಸುತ್ತು ಗುಂಡು ಹಾರಿಸಿದ್ದಾನೆ. ಸುದ್ದಿ ತಿಳಿದ ಉಪ ನಗರ ಪೊಲೀಸರು ಸ್ಥಳಕ್ಕೆ ದೌಡಾಯಿಸಿ ಅಭಿಷೇಕನನ್ನು ಬಂಧಿಸಿ, ಇತರ ಮೂವರನ್ನು ಸಹ ವಶಕ್ಕೆ ಪಡೆದು ತೀವ್ರ ತನಿಖೆ ಕೈಗೊಂಡಿದ್ದಾರೆ.

ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಆಯುಕ್ತರು, ಘಟನೆಯಲ್ಲಿ ಉಪನಗರ ಪೊಲೀಸರು ಅಭಿಷೇಕನೊಂದಿಗೆ ಇತರ ಮೂವರನ್ನು ತಮ್ಮ ವಶಕ್ಕೆ ಪಡೆದು ತನಿಖೆ ನಡೆಸುತ್ತಿದ್ದಾರೆ. ಘಟನೆ ಕುರಿತು ಎರಡು ಎಫ್ಐಆರ್‌ ದಾಖಲಾಗಿವೆ. ಅಭಿಷೇಕ ಹೇಳಿಕೆ ಅನ್ವಯ ರಾತ್ರಿ 12ರ ಸುಮಾರಿಗೆ ಮನೆಗೆ ಹೊರಟ ವೇಳೆ ಮೂವರು ಅಪರಿಚಿತರು ಬೈಕ್‌ಗೆ ಅಡ್ಡಗಟ್ಟಿ ಕಾರು ನಿಲ್ಲಿಸಿ ಜಗಳ ತೆಗೆದು ಹಲ್ಲೆಗೆ ಯತ್ನಿಸಿದ್ದಾರೆ. ಅಲ್ಲದೇ, ಪರವಾನಗಿ ಹೊಂದಿರುವ ಪಿಸ್ತೂಲ್‌ ಕಸಿದುಕೊಳ್ಳಲು ಪ್ರಯತ್ನಿಸಿ ತನ್ನನ್ನು ಮುಗಿಸಲು ಹೊಂಚು ಹಾಕಿದ್ದರು ಎಂದು ಹೇಳಿಕೆ ನೀಡಿದ್ದಾನೆ. ಇತರ ಮೂವರಾದ ದಿನೇಶ, ಪ್ರಜ್ವಲ್‌ ಹಾಗೂ ಗಣೇಶ, ಅಭಿಷೇಕ ಕುಡಿದ ಮತ್ತಿನಲ್ಲಿ ಏರ್ರಾಬಿರ್ರಿ ಬೈಕ್‌ ಚಲಾಯಿಸಿ ಕಾರಿಗೆ ಗುದ್ದಿದ್ದಾನೆ. ರಿಪೇರಿ ಮಾಡಿಕೊಡುವಂತೆ ಕೇಳಿದಾಗ ಜಗಳ ತೆಗೆದ. ಅದು ವಿಕೋಪಕ್ಕೆ ಹೋಗಿ ಹಲ್ಲೆಗೆ ಯತ್ನಿಸಿದ. ಬಳಿಕ ತನ್ನ ಜೇಬಿನಿಂದ ರಿವಾಲ್ವಾರ್‌ ತೆಗೆದು ಕಾರಿನ ಮೇಲೆ ಎರಡು ಬಾರಿ ಗುಂಡು ಹಾರಿಸಿದನೆಂದು ದೂರಿನಲ್ಲಿ ತಿಳಿಸಿದ್ದಾರೆ ಎಂದು ಮಾಹಿತಿ ನೀಡಿದರು.

ಮೇಲ್ನೋಟಕ್ಕೆ ಅಭಿಷೇಕ ತನ್ನ ಪರವಾನಗಿ ಪಿಸ್ತೂಲನ್ನು ದುರುಪಯೋಗಪಡಿಸಿಕೊಂಡಿದ್ದಾನೆ ಎಂದು ಕಂಡುಬಂದಿದೆ. ಧಾರವಾಡ ಸುಶಿಕ್ಷಿತರ ನಾಡಾಗಿದ್ದು ಶಾಂತಿಯ ಸ್ಥಳವಾಗಿದೆ. ಇಂತಹ ಘಟನೆಗಳು ಮರುಕಳಿಸಬಾರದು. ಆದ್ದರಿಂದ ಪರವಾನಗಿ ಹೊಂದಿರುವವರು ಯಾವುದೇ ಕಾರಣಕ್ಕೂ ತಮ್ಮ ಪಿಸ್ತೂಲ್‌ಗಳನ್ನು ದುರುಪಯೋಗಪಡಿಸಿಕೊಳ್ಳಬಾರದು. ಒಂದು ವೇಳೆ ದುರುಪಯೋಗಪಡಿಸಿಕೊಂಡರೆ ಅವರ ಪರವಾನಗಿ ರದ್ದುಗೊಳಿಸಲಾಗುವುದು ಎಂದು ಎನ್‌. ಶಶಿಕುಮಾರ ಎಚ್ಚರಿಕೆ ನೀಡಿದರು.