ಯುವ ಜನತೆಯನ್ನು ಸಾಹಿತ್ಯದತ್ತ ಸೆಳೆಯುವ ಕೆಲಸವಾಗಲಿ: ಲೇಖಕ ಪ್ರವೀಣ ಜಿ. ನಾಯಕ

ದಾಂಡೇಲಿ: ಯುವ ಜನರನ್ನು ಸಾಹಿತ್ಯದತ್ತ ಸೆಳೆಯುವ ಕೆಲಸವಾಗಬೇಕು ಎಂದು ಉಪನ್ಯಾಸಕ, ಲೇಖಕ ಪ್ರವೀಣ ಜಿ. ನಾಯಕ ನುಡಿದರು.

ಎಲ್ಲವೂ ಎಲ್ಲ ಕಾಲಕ್ಕೂ ಸತ್ಯ ಅಲ್ಲ. ಅದು ಬರವಣಿಗೆಗೂ ಅನ್ವಯಿಸುತ್ತದೆ. ಪುರಾಣಗಳು ಇಂದಿಗೂ ಪ್ರಸ್ತುತವಾಗಬೇಕೆಂದೇನಿಲ್ಲ. ಅದನ್ನು ವಿಮರ್ಶಿಸುವ, ಪರಾಮರ್ಶಿಸುವ ಕೆಲಸ ಇಂದಿನ ಬರಹಗಾರರಿಂದ ಆಗಬೇಕಿದೆ ಎಂದರು.

ಮುಖ್ಯ ಅತಿಥಿಗಳಾಗಿದ್ದ ಗಸ್ತು ಅರಣ್ಯ ಪಾಲಕ ಪ್ರವೀಣ ಮ್ಯಾಗೇರಿ ಎಂ. ಸಾಹಿತ್ಯದ ಸಂಘ ಮನುಷ್ಯನನ್ನು ಸುಸಂಸ್ಕೃತನನ್ನಾಗಿ ಮಾಡುತ್ತದೆ ಎಂದು ಹೇಳಿ ಜಾನಪದ ಗೀತೆ ಹಾಡಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಜಿಲ್ಲಾ ಕಸಾಪ ಅಧ್ಯಕ್ಷ ಬಿ.ಎನ್. ವಾಸರೆ ಮಾತನಾಡಿ, ಕವಿತೆ ಬರೆಯುವ ಹೊಸ ತಲೆಮಾರು ಅಪ್ಪ, ಅಮ್ಮ, ಪ್ರೀತಿ, ಊರು ಈ ಸಂಗತಿಗಳಿಗಷ್ಟೇ ಜೋತು ಬೀಳದೇ ಸಮಾಜದಲ್ಲಿ ನಡೆಯುವ ಸಂಘರ್ಷಗಳ ಬಗ್ಗೆ, ಸಾಮಾಜಿಕ ಅಸಮಾನತೆಗಳ ಬಗ್ಗೆ, ದೌರ್ಜನ್ಯಗಳ ಬಗ್ಗೆ ಬರೆಯುವ ತೀಕ್ಷ್ಣತೆ ಹೊಂದಬೇಕು. ಉರ್ಮಿಳೆ ಪತಿವೃತೆಯಾಗದ ಬಗ್ಗೆ, ಕರ್ಣ ಪಾಂಡವನಾಗದ ಬಗ್ಗೆ ಪ್ರಶ್ನಿಸಿ ಬರೆಯಬೇಕು. ಆ ಮೂಲಕ ಒಂದು ಕವಿತೆ ಆಳುವರಿಗೂ ಬಿಸಿ ಮುಟ್ಟಿಸಲು ಸಾಧ್ಯವಿದೆ. ಸಾಹಿತ್ಯಕ್ಕೆ ಸಮಾಜದ ಕಣ್ತೆರೆಸುವ ಶಕ್ತಿಯಿದೆ ಎಂದರು.

ರಕ್ಷಾ ಕಿಂದಳ್ಕರ ಪ್ರಾರ್ಥಿಸಿದರು. ಕಿಶೋರ ಕಿಂದಳ್ಕರ ಸ್ವಾಗತಿಸಿದರು. ಕಲ್ಪನಾ ಪಾಟೀಲ ವಂದಿಸಿದರು. ಸುರೇಶ ಕಾಮತ ಕವಿಗೋಷ್ಠಿ ನಿರ್ವಹಿಸಿದರೆ, ಎನ್.ಆರ್. ನಾಯ್ಕ ಕಾರ್ಯಕ್ರಮ ನಿರೂಪಿಸಿದರು. 15ಕ್ಕೂ ಹೆಚ್ಚು ಯುವ ಕವಿಗಳು ತಮ್ಮ ಕವಿತೆ ವಾಚಿಸಿದರು. ಕಸಾಪ ಕಾರ್ಯದರ್ಶಿ ಗುರುಶಾಂತ ಜಡೆಹಿರೇಮಠ, ಕೋಶಾಧ್ಯಕ್ಷ ಶ್ರೀಮಂತ ಮದರಿ ಹಾಗೂ ಪದಾಧಿಕಾರಿಗಳು ಸಹಕರಿಸಿದರು.